Հեղինակի խօսք



Ինդրո Մոնտանելլի

Կուսակցություններն այնքա՜ն են սիրում Աղքատներին, որ յուրաքանչյուր անգամ, որ հասնում են իշխանության, լծվում են նրանց թիվն ավելացնելու գործին։



«Նմանություն Հիսուս Քրիստոսի» գրքից

Ինչ որ կարող եմ փափաքել մխիթարությանս համար, այդ բոլորը չեմ սպասում այս աշխարհում, այլ՝ գալիք կյանքում: Նույնիսկ եթե աշխարհի բոլոր հաճույքներն ունենայի կամ կարողանայի վայելել դրանց բոլոր հեշտությունները, անկասկածելի է փաստը, որ դրանք չէին կարողանա երկար տևել: Հետևաբար, հոգի իմ, չես կարող լիովին սփոփված, ո՛չ էլ կատարելապես երջանիկ լինել, եթե ոչ միայն՝ Աստծուն միացած, որ մխիթարիչն է աղքատների և զորավիգը խոնարհների: Համբերիր մի քիչ, հոգի իմ, սպասիր աստվածային խոստմանը և Երկնքում կունենաս լիությունը բոլոր բարիքների: Եթե անհագ ծարավով վայելքներ փնտրես, կկորցնես հավիտենական բարիքները: Ունեցիր ժամանակավոր բարիքները գործածության համար, բայց կամքիդ մեջ վառ պահիր փափաքը հավիտենական կյանքի: Ծարավդ չես կարող հագեցնել վաղանցուկ վայելքներով, որովհետև դրանց համար չէ, որ ստեղծվել ես:



Սբ. Յոզեմարիա Էսքրիվա Դե Բալագեր («Օպուս Դեյ»ի Հիմնադիր, 1902-1975), «Ճանապարհ» գրքից

Երեսդ՝ կախ ... , վարմունքդ՝ կոպիտ ... , տեսքդ՝ ծիծաղելի ... , պահվածքդ՝ հակակրելի ... : Այսպե՞ս է, որ հույսն ունես խրախուսել ուրիշներին, որ Քրիստոսին հետևեն:



Սբ. Մայր Թերեզա Կալկութացի

Տե՜ր, ուզո՞ւմ ես իմ ձեռքերը, որպեսզի այս օրն անցկացնես աղքատներին ու հիվանդներին օգնելով, որոնք դրա կարիքն ունեն։ Տե՜ր, այսօր Քեզ եմ տալիս իմ ձեռքերը։ Տե՜ր, ուզո՞ւմ ես իմ ոտքերը, որպեսզի այս օրն անցկացնես այցելելով նրանց, ովքեր մի ընկերոջ կարիքն ունեն։ Տե՜ր, այսօր Քեզ եմ տալիս իմ ոտքերը։ Տե՜ր, ուզո՞ւմ ես իմ ձայնը, որպեսզի այս օրն անցկացնես խոսելով նրանց, ովքեր սիրո խոսքերի կարիքն ունեն։ Տե՜ր, այսօր Քեզ եմ տալիս իմ ձայնը։ Տե՜ր, ուզո՞ւմ ես իմ սիրտը, որպեսզի այս օրն անցկացնես սիրելով յուրաքանչյուր մարդու՝ միայն այն բանի համար, որ մարդ է։ Տե՜ր, այսօր Քեզ եմ տալիս իմ սիրտը։



Դիտրիխ Բոնհոֆֆեր

Լռության մեջ գտնվում է էականի հստակեցման, մաքրագործման և ըմբռնման զորությունը։



«Նմանություն Հիսուս Քրիստոսի» գրքից

Ամեն ինչից վեր և ամեն ինչում մշտատև հանգիստդ կարող ես Աստծո մեջ միայն գտնել, հոգի իմ, որովհետև Նա Ինքն է Սրբերի հավիտենական հանգիստը: Ո՜վ Հիսուս քաղցրագույն ու սիրելի, այնպես արա, որ հանգիստս միմիայն Քեզնում գտնեմ, գերիվեր՝ քան բոլոր արարածները. գերիվեր՝ քան առողջությունն ու գեղեցկությունը. գերիվեր՝ քան փառքն ու պատիվները, ուժն ու տիրապետությունը. գերիվեր՝ քան բոլոր գիտություններն ու մտային կարողությունները. գերիվեր՝ քան բոլոր հարստություններն ու արվեստները, ուրախություններն ու վայելքները, համբավն ու գովասանքները, հաճույքներն ու մխիթարությունները. գերիվեր՝ քան բոլոր խոստումներն ու ակնկալությունները, քան բոլոր արժանիքներն ու փափաքները. գերիվեր նաև՝ քան այն բոլոր պարգևներն ու շնորհները, որ Դու կարող ես տալ ինձ և շռայլել. գերիվեր՝ քան այն բոլոր սքանչացումներն ու ցնծությունները, որ միտքը կարող է ստանալ կամ զգալ. և վերջապես, գերիվեր՝ քան Հրեշտակներն ու Հրեշտակապետները, քան բոլոր երկնային զորությունները. գերիվեր՝ քան բոլոր իրողությունները տեսանելի ու անտեսանելի, քան այն ամենը, որ Դու չես, Աստված իմ: Որովհետև Դու, Աստված, Տեր իմ, գերազանց ես, քան բոլոր գոյությունները, միայն Դու ես բարձրյալ, միայն Դու՝ ամենակարող, միայն Դու՝ ինքնաբավ ու առատաբուխ, նրբագույն ու քաղցրանույշ: Միայն Դու ես գեղեցիկ ու սիրելի, ազնվագույն ու փառահեղ, քան բոլոր իրողությունները: Քեզնում են բովանդակված բոլոր բարիքները, Քեզնում են եղել միշտ և Քեզնում միայն կարող են գտնվել: Ահա այս իսկ պատճառով, ի՛նչ էլ պարգևես ինձ՝ Քեզնից տարբեր և Քեզնից դուրս, քիչ է ու անբավարար, այնպես՝ ինչպես անկատար են այն բոլոր մտային ըմբռնումներն ու խոստումները, որ տալիս ես ինձ՝ առանց սակայն իմ Քեզ տեսնելու և լիովին ունենալու: Սիրտս չի կարողանում իրական հանգիստ, ո՛չ էլ կատարյալ գոհունակություն գտնել, եթե ոչ միայն՝ Քեզնում, բարձրանալով գերիվեր, քան բոլոր պարգևներն ու արարածները:



Պետրու Մայոր (1756-1821)

Ազատիր ինձ, ո՜վ Տեր, ծուլությունից, որ ունեմ, և վախից, որով բռնվում եմ, հարմարավետ զիջումներից, ու պարտականություններիցս հեշտորեն փախչելուց։ Օգնիր ինձ, Տեր, լինելու այնպիսին, ինչպիսին որ չեմ, և ինչպես որ Դու կկամենայիր, որ ես լինեի։ Կարևոր չէ, թե ի՛նչ կմեռնի իմ մեջ, ինձ հետաքրքրում է միայն այն, ինչը որ կծնվի իմ մեջ Քո հետ միասին։ Օգնիր ինձ, ո՜վ Տեր, լրջորեն մոտենալու ժամանակին, հարգելու կյանքը, պահպանելու սերը. Քո կարիքն ունեմ, որպեսզի կարողանամ ապրել այնպես, ինչպես որ Դու կամենում ես։ Պարգևիր ինձ, ո՜վ Տեր, Քո ուժը՝ գործելու համար, հարատևություն հանձնառություններիս մեջ, բերկրանքը հավատքի, որ աճում է, հույսը և վստահասիրտ ինքնահանձնումը Քո սիրույն։



Սբ. Յոզեմարիա Էսքրիվա Դե Բալագեր («Օպուս Դեյ»ի Հիմնադիր, 1902-1975), «Ճանապարհ» գրքից

Իրական աղքատությունը կայանում է ո՛չ թե չունենալու, այլ՝ ունեցածից անջատ լինելու մեջ. անձանց և ինչքերի վրա տիրապետություն ունենալուց կամովին հրաժարվելու մեջ: Ահա՛ թե ինչու բազմաթիվ աղքատներ կան, որոնք իրականում հարուստ են: Եվ ընդհակառակն:



Սբ. Օգոստինոս Հիպպոնացի

Տո՛ւր ինձ, Աստված իմ, կարողությունն անելու այն, ինչ Դու հրամայում ես ինձ անել, և հրամայիր ինձ այն, ինչ կամենում ես։



Անդրե Ֆրոսսար

«Քրիստոնյաների Աստվածը հաշվել գիտի միայն մինչև մեկը», որովհետև Հիսուսի պատգամը նման չէ արդի իդեոլոգիաներին, որոնք միշտ հասցեագրված են ամբոխին, զանգվածներին, մարդկությանը, դասակարգին, ազգին, ժողովրդին, կուսակցությանը։ Հիսուսի պատգամը դա մի խոսք է, որ հավասարակշռված է յուրաքանչյուր անհատի համար, չի ընդունում անանունությունը, կամենում է օգնության հասնել զավակներից յուրաքանչյուրին մի Հոր, որի համար բոլորն ունեն մի անկրկնելի անուն, մի անձնական եզակի պատմություն։



«Նմանություն Հիսուս Քրիստոսի» գրքից

Ո՜վ քաղցր մտերիմ իմ Հիսուս, մաքրագույն սիրող, Տեր բոլոր արարածների, ո՞վ կտա ինձ արդյոք թևեր իրական ազատության, ճախրելու և Քեզնում հանգչելու համար: Ե՞րբ արդյոք կկարողանամ միանալ Քեզ հավիտենական միությամբ և ճաշակն առնել հոգեզմայլ անուշությանդ, Տեր Աստված իմ: Ե՞րբ արդյոք կկարողանամ ամփոփել անձս Քեզնում, այնպես, որ սիրույդ հայեցողության հետևանքում մոռանամ ինքս ինձ, Քեզ միայն զգամ՝ գերազանցելով բոլոր զգացումներն ու չափավորումները, այն կերպ, որ շատ քչերն են ճանաչում: Այժմ հաճախ եմ ողբում և վշտով եմ կրում ապերջանկությանս բեռը: Որովհետև թշվառության այս հովտում պատահում են բազում չարիքներ, որոնք շատ հաճախ են ինձ խռովում, տրտմեցնում ու մթագնում, հաճախ են խոչընդոտում ընթացքս և ցրում մտքիս կենտրոնացումը, դյութում են ինձ և պարուրում, արգելելով ինձ գալ դեպի Քեզ ազատորեն, վայելելու հոգեսփոփ գրկախառնումներդ, որ պատրաստված են երանյալ սուրբ հոգիներին: Թող հառաչանքներս և այստեղ՝ ներքևում կրած բազում նեղություններս հուզեն Քեզ:



Միքելե Բրամբիլլա

«Եկեղեցի-ապարանք»ի մասին մեզ պետք է ավելի հետաքրքրեն իր ավետարանական հիմքերը, քան թե վերնահարկի՝ այսօրվա քրիստոնյաների բնակարանները։



Հայր Անդրէ Լուֆ

Մի համայնք, որը մերժում և իրենից հեռացնում է մեղավորներին, դադարում է քրիստոնեական համայնք լինելուց։ Որովհետև այնտեղ, ուր մեղքը մերժվում ու հերքվում է այդ աստիճան, կամ ավելի ճիշտ է ասել՝ հմտորեն քողարկվում է, չի կարող տարածք լինել շնորհի համար, և Աստված զրկվում է Իր ամենամեծ ուրախությունից. դարձի եկող մեղավորին կրկին ետ ընդունելու ուրախությունից։



Սբ. Յոզեմարիա Էսքրիվա Դե Բալագեր («Օպուս Դեյ»ի Հիմնադիր, 1902-1975), «Ճանապարհ» գրքից

Աղտոտ ու անկյալ հողի փոշի ես: – Նույնիսկ եթե Սուրբ Հոգու շունչը քեզ երկրի բոլոր իրողություններից վեր բարձրացնի և խեղճությանդ վրա Արդարության Արեգակի գերազանց ճառագայթները հայելացնելով քեզ ոսկու նման փայլեցնի, մի՛ մոռացիր վիճակիդ աղքատությունը: Մի պահ անգամ տևող հպարտությունը քեզ կրկին գետին կնետի և դու կդադարես լույս լինելուց, դառնալով ցեխ:



Անհայտ Հեղինակ

Աստված։ Ոմանք վախենում են կորցնել Նրան, իսկ ոմանք վախենում են Նրան գտնել։