Հեղինակի խօսք



Լուիջի Գալլի

Ամենահիվանդ ու ամենատկար սիրտն էլ կարող է հանգստի ու կազդուրման տարածք գտնել Խաչյալի անսահման չարչարանքների մեջ։ Հիսուսի Սրտի մեջ նույնիսկ միայն մեկ պահ մնալը բավական է յուրաքանչյուր մարդու ճամփորդության քայլերի հանդեպ կարեկցանքով լցվելու համար։



Կառլ Բարթ

Ներկա եղիր, Տեր, և գործիր այս տանը, նրանց մոտ, ովքեր բնակվում են այստեղ։ Հեռու վանիր բոլոր չար ոգիներին, որոնք հաճախ տիրապետում են այստեղ։ Պահպանիր մեր համար լույսը, որն այսքա՜ն հաճախ ենթարկվում է մեր աչքերում մարելու վտանգին։



Կառլ Բարթ

Քեզնից սա խնդրում ենք բոլոր մարդկային էակների համար. թող որ ժողովուրդներն ու կառավարությունները հպատակվեն Քո Խոսքին և այդպիսով կարողանան զարկ տալ արդարությանն ու խաղաղությանը երկրի վրա։



Կառլ Բարթ

Սովորեցրու մեզ հավատալ, որպեսզի հավատքի միջոցով մենք անցնենք մահվանից կյանքի։ Դու առաջինը սիրեցիր մեզ. մի՛ թող, որ անտարբեր մնանք, անվճռակամ, անզգա։



Ռաբինդրանաթ Թագոր

Ստացա այս աշխարհի տոնին մասնակցելու իմ հրավերը. իմ կյանքը օրհնվեց։ Իմ աչքերը տեսան, իմ ականջները լսեցին։ Այս տոնի ժամանակ միայն մի պարտականություն ունեի. նվագել իմ գործիքը։ Կարողություններիս ներածի լավագույն չափով կատարեցի իմ մասը, որ ինձ հատկացվել էր։ Արդ ասում եմ. հասել է վերջում պահը՝ մտնելու եւ տեսնելու Քո Դեմքը, և Քեզ ընծայելու իմ լռելյայն ողջույնը։



Էրնեստո Օլիվերո

Հիսուսը սիրում է մեզ։ Նույնիսկ երբ թույլատրում է, որ փորձության ենթարկվենք, մեզ երբեք միայնակ չի թողնում։ Նա երբեմն թույլատրում է, որ մեր կյանքն ամբողջովին շարունակական փորձությունների դաշտի վերածվի. կորցված հույսեր, հաղթահարելիք դժվարություններ, համակամությամբ ընդունելիք վշտեր։ Բայց որքան ավելի է ահագնանում մեր հուսահատությունը, այնքան ավելի ուժեղ է Նա մեզ սիրում։ Բավական է, որ մենք Իրեն ասենք «այո՛», նաև ամենասև պահերին, այն պահերին, երբ, մարդկայնորեն խոսելով, մեզ անհնարին է թվում, որ կարող է որևիցէ մի հույս գոյություն ունենալ։ Մեզնից յուրաքանչյուրը, երբ կարծում է, թե ճգնաժամի մեջ է, երբ իրեն դուրս նետված, չկամեցված է զգում, պետք է «այո՛» ասի Հիսուսին, վստահ, որ Նա իրեն կփոխհատուցի այս երկրի վրա արդեն, Իր սիրո հարյուրապատիկի չափով։



Հայր Մատթեո Լա Գրուա (իտալացի հայտնի էքզորցիստ)

Եթե ստրուկ ենք սովորույթների, մտքի, սրտի և մարմնի մեղքերի, ոտքի կանգնենք և քայլենք Իր հետ։ Այսպիսով կփշրենք մեր շղթաները, կխզենք մեր բոլոր կապանքները, կազատվենք լծից, որը մեզ պահում է որպես ստրուկ։



Հայր Մատթեո Լա Գրուա (իտալացի հայտնի էքզորցիստ)

Ես սուրբ չեմ։ Աստված Ինքն է, որ գործածում է ինձ։ Մեր Տիրոջ սիրո գործիքներից մեկն եմ։ Հավատքն է, որ բժշկում է, որ փրկում է։



Թոնինո Լասքոնի

Ինձ դպրոցում բացատրեցին, թե ի՛նչ է ջրանիշը (ֆիլիգրանա)։ Դա մի թուղթ է, որին եթե նայում ես անուշադիր հայացքով և սակավ լուսավորված տեղում, թվում է պարզապես սպիտակ, դատարկ թուղթ։ Բայց եթե այդ թղթին նայում ես՝ այն լույսի դեմ պահելով, տեսանելի են դառնում նրա ներսում դրոշմված սքանչելի պատկերները։ Ուսուցիչը շոշափելի օրինակ էր բերել իր հետ։ Սպիտակ թուղթը պատուհանի ապակու վրա դրեց և մենք տեսանք, որ նրա ներսում դրոշմված էր Քրիստոսի գեղեցիկ Դեմքը։ Ես, Տեր իմ, մտածեցի, որ մարդը ջրանիշի նման է։ Եթե մարդուն նայում ենք անուշադիր, ցրված հայացքով, քիչ բան ենք տեսնում, գրեթե ոչինչ։ Բայց եթե նրան նայում ենք մեր ուշադրությունը նրա վրա կենտրոնացնելով, Լույսի մեջ, մարդկանցից յուրաքանչյուրի մեջ բացահայտում ենք Քո սքանչելի Դեմքը։ Մարդը, մարդկանցից յուրաքանչյուրը, թանկարժեք ջրանիշ է։ Տեր իմ, օգնիր ինձ տեսնելու մարդկանց Քո Լույսի մեջ։



Անն Սոֆի

Կա հայացքը նրա, ով դատում է ու դատապարտում, կա քննադատող խոսքը, կա ինչ որ մի դիրքի հասնելու փառամոլ հավակնոտությունը, ապահովությունների հիվանդագին կարիքը ... ։ Բայց Դու, Աստված իմ, միմիայն Սեր ես։ Եվ սա փոխում է ամեն ինչ։ Դու ամեն վայրկյան գալիս ես փոխելու աշխարհը. սովորեցրու մեզ «փրկարար ժեստերը», պարգևիր մեզ կարողությունը՝ փոխադարձելու Քո հայացքի քաղցրությունը, Քո սրտի համբերությունը։ ... Սովորեցրու մեզ մտնել լռության խաղաղության մեջ, այլոց ընդունելության քնքշալի գորովը։ Ամեն։



Ն.Ս. Ֆրանցիսկոս Պապ

Քրիստոսի՝ Մարիամից ծնված Աստվածորդու համերաշխությունը արտահայտությունն է Աստծո ողորմած ամենակարողության, որ բացահայտվում է մեր կյանքում, – հատկապես երբ այդ կյանքը տկարացած է, վերքերով պատված, ստորացված, խտրականության զոհ դարձած, տառապանքի տակ կքված, – նրա մեջ հեղելով հույսի ուժը, որը մեզ կրկին ոտքի է կանգնեցնում և զորավիգ կանգնում։



Ն.Ս. Ֆրանցիսկոս Պապ

Խաղաղություն հաստատելը և պահպանելը հմուտ արհեստավորին վայել գործ է. պահանջում է սեր, համբերություն, փորձառություն, դիմացկունություն։ Երանելի՜ են նրանք, ովքեր խաղաղություն են սերմանում իրենց ամենօրյա գործերով, ծառայության, եղբայրության, երկխոսության, ողորմության իրենց դիրքորոշումներով ու ժեստերով։



Ն.Ս. Ֆրանցիսկոս Պապ

Մեր կյանքը, իր ուրախություններով և իր վշտերով, մի եզակի ու անկրկնելի իրողություն է, որ հոսում է Աստծո ողորմած հայացքի ներքո։ Սա պահանջում է, հատկապես քահանայի կողմից, հոգևոր ուշադիր, խորաթափանց ու հեռատես կշռադատություն, որպեսզի յուրաքանչյուր ոք, առանց որևիցէ մեկին բացառելու, ինչպիսի՛ իրավիճակում էլ որ գտնվելու լինի, կարողանա կոնկրետ կերպով իրեն ընդունված զգալ Աստծո կողմից, ակտիվ կերպով մասնակցել համայնքի կյանքին և անդամակցել Աստծո Ժողովրդին, որն անխոնջ քայլում է դեպի Աստծո Արքայության լիությունը, որն Արքայությունն է արդարության, սիրո, ներման ու ողորմության։



Ն.Ս. Ֆրանցիսկոս Պապ

Խաղաղություն հաստատելու և խաղաղությունը պահպանելու համար շա՜տ ավելի քաջություն է հարկավոր, քան պատերազմելու համար։ Քաջություն է հարկավոր՝ ասելու համար այո՛ հանդիպմանը և ո՛չ ընդհարմանը. այո՛ երկխոսությանը և ո՛չ բռնությանը. այո՛ բանակցություններին և ո՛չ թշնամանքին. այո՛ պայմանագրերի կատարմանը և ո՛չ պռովոկացիաներին. այո՛ ազնիվ անկեղծությանը և ո՛չ երկերեսանիությանը։ Այս ամենի համար քաջություն է հարկավոր ունենալ, հոգու մի մեծ ուժ։



Ն.Ս. Ֆրանցիսկոս Պապ

Սիրույն է բնորոշ չմոռանալը։ Սիրույն է բնորոշ միշտ աչքի առջև ունենալը այնքա՜ն, այնքա՜ն բարիքը, որ ստացել ենք։ Սիրույն է բնորոշ պատմությանը նայելը. որտեղից ենք գալիս, մեր ծնողներին, մեր նախնիներին, հավատքի ընթացքին ... ։