Հեղինակի խօսք



Ն.Ս. Ֆրանցիսկոս Պապ

Մանուկ Հիսուսի դեմքում մենք տեսնում ենք Աստծո դեմքը, որը մեզ չի հայտնվում ուժի ու զորության, այլ՝ մի նորածնի տկարության ու դյուրաբեկության մեջ։ Այսպիսին է մեր Աստվածը, այսքա՜ն մոտիկ է գալիս, հանձինս մի մանկան։



Ն.Ս. Ֆրանցիսկոս Պապ

Աստվածաշունչը մեծ պատմությունն է, ուր պատմվում են Աստծո ողորմության հրաշալիքները։ Նրա ամեն մի էջը թաթախված է Հոր սիրով, որը արարչության առաջին իսկ պահից սկսած կամեցել է տիեզերքի մեջ դրոշմել Իր սիրո նշանները։



Ն.Ս. Ֆրանցիսկոս Պապ

Երեխաներն ու տարեցները կառուցում են ժողովուրդների ապագան. երեխաները, որովհետև նրանք են առաջ տանելու պատմությունը. տարեցները, որովհետև ավանդում են իրենց կյանքի փորձառությունն ու իմաստությունը։ Երբեք մի՛ հոգնեք սերունդների մեջ այս երկխոսությունը մշակելու և սնուցելու գործում, հավատքը դարձնելով ձեր բևեռային աստղը, իսկ Աստծո Խոսքը՝ այն գլխավոր դասը, որ պետք է յուրացնեք և ապրեք ամենօրյա կյանքի կոնկրետության մեջ։



Ն.Ս. Ֆրանցիսկոս Պապ

Մանուկ Հիսուսը, Իր Մայր Մարիամի և Սուրբ Հովսեփի հետ, ընտանեկան պարզ, բայց մեծապես լուսավոր սրբապատկեր են։ Լույսը, որ ճառագայթում է նրանից, ողորմության և փրկության լույս է համայն աշխարհի համար, ճշմարտության լույս է յուրաքանչյուր մարդու, ողջ մարդկության և յուրաքանչյուր ընտանիքի համար։



Լուիջի Վերդի

«Տե՜ր, եթե կամենաս, կարող ես ինձ բուժել» (Մրկ 1, 40)։ Կամենում եմ. բժշկվի՛ր քո սառը և ինքնությունից զուրկ, վախվորած և ճանապարհ ընկնելու անկարող հավատքից։ Կամենում եմ. բժշկվի՛ր անզուսպ բնավորությունից, բռնությունից, հպարտությունից, փակ մտքից ու սեղմ հորիզոններից։ Կամենում եմ. բժշկվի՛ր աչքերումդ բույն դրած ատելությունից, անհամբերությանդ հասցրած վերքերից և այն խավար թշնամուց, որ կրծում է սիրտդ։ Կամենում եմ. բժշկվի՛ր ինքդ քո հանդեպ ունեցած վախից, կղզիացումիցդ, որով պաշտպանվում ես, ընդունելու փոխարեն։ Թող որ մի անսահման ու անսպառ գորով ընկերակցի քո քայլերի սկզբին։



Ռոբերտո Լաուրիտա

Ե՛կ, ո՜վ Սուրբ Հոգի, նեցուկ կանգնիր մեր սրտերին, երբ վրա են հասնում փորձությունները, երբ մեզ սպասում են ծաղրանքն ու խոնարհեցումները, հեգնանքն ու անարդարությունները. երբ հաջողության հասնելու ու փառքի մեր կարիքը ընդհարվում է խաչի դառն ու դաժան իրականության հետ։



Կառլո Դե Ամբրոջո

Ով բարի է, տալիս է մի քիչ. ով սիրում է, ապրում է տալու համար։ Ով բարի է, համբերում է վիրավորանքին. ով սիրում է, մոռանում է։ Ով բարի է, կարեկցում է. ով սիրում է, օգնում է։ Ով բարի է, ժպտում է. ով սիրում է, ժպտալու պատճառ է պարգևում։ Ով բարի է, սկսում է ու ավարտում. ով սիրում է, սկսում է ու գործում է միշտ։ Ով բարի է, անում է այն, ինչ կարող է. ով սիրում է, անում է անհնարինը։ Ով բարի է, օգնում է մոտիկներին. ով սիրում է, միշտ մոտիկ է մնում օգնելու համար։ Ով բարի է, չափում է իր օգնությունը. ով սիրում է, օգնում է առանց չափի։



Սբ. Իսահակ Նինվեացի (640-700)

Ինչպես մեկը, ով ցանկանում է հունձք ունենալ, մինչ սերմանում է ծովում, այդպես է նա, ով աղոթում է, բայց իր սիրտը փակ է պահում ողորմածության առաջ։



Սբ. Թերեզա Ավիլացի (1515-1582)

Այս պահին, ո՜վ Աստված իմ, ողջ ազատ կամքովս և առանց որևէ վերապահման, ես Քեզ եմ ընծայում իմ կամքը։ Ցավոք, Տեր իմ, կամքս միշտ չէ, որ համապատասխանում է Քո կամքին։ Դու կամենում ես, որ սիրեմ ճշմարտությունը, իսկ ես հաճախ սիրում եմ սուտը։ Դու կամենում ես, որ ես փնտրեմ հավիտենականը, իսկ ես բավարարվում եմ ժամանակավորով ու վաղանցուկով։ Դու կամենում ես, որ ես ձգտեմ վեհ բաների, իսկ ես չնչին բաներից եմ կառչում։ Այն, ինչը որ իրոք տառապանք է պատճառում ինձ, Տեր, ամենայն վստահությամբ չիմանալն է, թե արդյոք սիրո՞ւմ եմ Քեզ ամեն ինչից վեր։ Ընդմիշտ ազատիր ինձ ամեն չարիքից, թող որ Քո կամքը կատարվի իմ մեջ. միայն Դու, Տեր իմ, եղիր իմ ամեն ինչը։



Անհայտ Հեղինակ

Ո՜վ Աստված իմ Հիսուս Քրիստոս, այնպես արա, որ ես միշտ իմ սրտում կրեմ Քո սերն ու Քո հոգին. այնպես արա, որ ես միշտ իմ մտքի մեջ կրեմ Քո կամքը. այնպես արա, որ ես միշտ իմ շուրթերի վրա կրեմ Քո խոսքը. այնպես արա, որ իմ անձը միշտ կատարի Քո կամքը, որպեսզի հնարավորինս շուտով ես դառնամ Քո պատկերով ու Քո նմանությամբ։ Ամեն։



Ժորժ Բեռնանոս (1888-1948)

Եկեղեցին բարենորոգողների կարիք չունի, այլ միայն ու միայն՝ Սրբերի։



Դիտրիխ Բոնհոֆֆեր (Սուրբ Ծնունդ, 1943թ.)

Խավար է տիրում իմ մեջ, բայց Քո մոտ գերառատ է լույսը։ Միայնակ եմ ես, բայց Դու ինձ չես լքում։ Սարսափահար եմ, բայց Քեզնից ստանում եմ հարկավոր օգնությունը։ Անհանգիստ եմ, մտամոլոր, բայց Քեզնից գալիս է խաղաղությունը։ Իմ մեջ դառնություն կա, բայց Քո մոտ կա համբերություն։ Ես չեմ ճանաչում Քո ճանապարհները, բայց Դու գիտես իմ կյանքի ուղին։



Ռաբինդրանաթ Թագոր

Դու ինձ աղքատ ստեղծեցիր, աստղերի ժպիտով միայն շրջապատված. Դու ինձ մի սիրտ տվեցիր, ճանապարհների երկայնքին մուրացկան։ Անցա, իբրև պանդուխտ, դռնե դուռ ընկած, և, երբ իմ տոպրակը լցվում էր, Դու ինչ որ մեկին ուղարկում էիր կողոպտելու ինձ։ Իմ երկար օրվա ավարտին եկա տրտնջալու Քո հարուստ Տան դռան շեմին. ահա՛ իմ զամբյուղը դատարկ։ Բայց տեսա, թե ինչպես ես վար իջնում և ձեռքիցս բռնում, և հայտնվեցի կողքիդ, Քո գահին բազմած։



Անհայտ Հեղինակ

Ընկերության (նաև և հատկապես ամուսնական ընկերության) տաճարի կառուցումը երբեք չի ավարտվում։ Այն փլուզվում է և քարը քարի վրա չի մնում, եթե ամեն առավոտ չենք աշխատում կրկին ու կրկին։ Ամեն անգամ, որ արևը ծագում է, հարկավոր է սիրել ընկերոջը մի նոր սիրով, դիտել նրան մի նոր ուշադրությամբ, ներել նրան մի նոր կարեկցանքով ու հասկացողությամբ։ Նրա հետ քայլելու համար հարկավոր է փոխակերպվել, լիովին բացել սեփական հոգու պատուհանները, որպեսզի քամին սրբի ու հեռու տանի սովորույթների փոշին։



Ջոն ՄըքՔարթի

Հոգևոր կյանքի մարտահրավերն իմ համար կայանում է Աստծո գեղեցկությունն ամեն ինչում տեսնելու մեջ։ Մի՞թե Աստվածաշունչը չի ասում, որ ոչինչ չի կարող բաժանել մեզ Աստծո սիրուց (հմմտ. Հռմ 8, 38-39)։ Դժոխքի ամենամութ փոսն անգամ չի կարող թաքնվել հարուցյալ Աստծո գեղեցկության դիմաց։