Հեղինակի խօսք



Սուրբ Օգոստինոս

Մեր ներկայ կեանքն ամբողջ մի յոյս է։



Ջովաննի Պապինի

Հարստացէք աղքատութեան հոգիով. այն աղքատութեան, որ թշուառութիւն չէ, այլ՝ ազատութիւն ու երջանկութիւն։



Սրբուհի Գերթրուդ

Խաչին մասնակցութեան մէկ օրն աւելի արժէ՝ քան հոգեւոր միւս գործերի հարիւր տարին։



Թէոդորետոս Կիւրացի

Ձեր հաւատքը, եթէ զերծ լինի իշխելու տենչից եւ լոկ խօսակցական հմտութիւնից, Սուրբ Հոգու զօրութեամբ մարդկանց ցոյց կը տայ փրկութեան ճանապարհը։



Սբ. Գրիգոր Նիւսացի

Պատկերը ճշմարտապէս պատկեր չէ, եթէ չունի իր բնօրինակի բոլոր յատկութիւնները: [...] Աստուածութեան բնորոշ յատկանիշն անըմբռնելի լինելն է. պատկերը պէտք է արտայայտի նաեւ այս յատկութիւնը: Եթէ պատկերի էութիւնը հնարաւոր լինէր ըմբռնել, մինչ իր բնօրինակը ենթակայ չէ որեւէ ըմբռնումի, այդպիսի տարբերութիւնը նրան կը զրկէր բնօրինակի պատկերը կոչուելու իրաւունքից: Բայց մենք երբեք չենք հասնում սահմանելու մեր հոգեւոր մասի բնութիւնը, ճիշտ ինչպէս երբեք չենք հասնում սահմանելու մեր Արարչի բնութիւնը. [...] սա նշանակում է, հետեւաբար, որ մենք այն խորհրդի մէջ, որ մեր ներսում է, կրում ենք անըմբռնելի աստուածութեան դրոշմը:



Ջորջ Մերեդիթ

Եթէ աղօթքից յետոյ ոտքի է կանգնում մի աւելի լաւ մարդ, ուրեմն աղօթքն ընդունուել է։



Սբ. Գրիգոր Նազիանզացի

Տիեզերքի մեծ Ճարտարապետը մտայղացաւ եւ ստեղծեց մի էակ, որն օժտուած է երկու բնութիւններով՝ տեսանելիով եւ անտեսանելիով. Աստուած ստեղծեց մարդուն՝ նախապէս գոյութիւն ունեցող նիւթից դուրս հանելով նրա մարմինը, որը կենդանացրեց Իր սեփական Հոգիով: [...] Այսպիսով, որոշակի առումով, ծնուեց մի նոր տիեզերք, որը միաժամանակ փոքր է եւ մեծ: Աստուած նրան դրեց երկրի վրայ, [...] այս «խառը» երկրպագուն, որպէսզի դիտի տեսանելի բնութիւնը, սկսի մասնակցել անտեսանելիին, իշխի երկրի արարածների վրայ, հնազանդուի ի վերուստ ստացած հրամաններին, լինելով մէկը, որ միաժամանակ երկրային է եւ երկնային, անկայուն է եւ անմահ, տեսանելի է եւ անտեսանելի, գտնուելով մեծութեան եւ ոչնչութեան միջեւ կէս ճանապարհին, լինելով միաժամանակ մարմնեղէն եւ հոգեղէն. [...] կենդանի, որն ընթացքի մէջ է դէպի մի հայրենիք, եւ – ահա՛ խորհրդի գագաթնակէտը – Աստծոյ նման է դառնում պարզապէս համաձայնութիւն տալով աստուածային կամքին:



Ռոջեր Շութց

Քրիստոսի հետ ամէն մի ճշմարիտ հանդիպում առաջնորդում է դէպի մարդիկ։



Սբ. Իսահակ Նինուէացի

Իր մեծ սիրոյ համաձայն, Աստուած չկամեցաւ պարտադրել մեր ազատութեանը, թէեւ կարող էր այդպէս վարուել, այլ թողեց, որ դէպի Ինքը գնանք միայն մեր սրտի սիրով:



Որոգինէս

«Ինչ վերաբերւում է ինձ, մուրացկան եմ ես եւ աղքատ» (Սղմ 70, 6): Քրիստոսն է, որ ասում է այս խօսքերը, Նա, որ ազատակամօրէն Ինքն Իրեն մուրացկան դարձրեց յանուն մարդու հանդէպ տածած Իր սիրոյ, հարստացնելու համար մարդուն:



Ք. Շարլիէ

Աստուածաշունչը սակաւախօս է Մարիամի վերաբերեալ, բայց չպէտք է խաբուել այդ լռութիւնից։ Երբ մի արարածի համար ասուած է, որ Յիսուսի Մայրն էր եւ որ Յիսուսն Աստուած է, անշուշտ աւելացնելու ոչինչ չի մնում իր գովքին ու փառքին։



Սբ. Մաքսիմոս Խոստովանող

Մեր նկատմամբ ունեցած Իր հոգատար խնամքի պատճառով Աստուած Ինքն Իրեն դարձրել է մուրացկան, [...] Իր խանդաղատանքով տառապելով մինչեւ ժամանակների վախճանը, իւրաքանչիւրի տառապանքի չափով:



Ռօլ Ֆոլլերո

Տէ՜ր, ահա՛ իրական բորոտները. էգոիստները, ամբարիշտները, նրանք՝ ովքեր ապրում են ճահճացած ջրերում, յարմարաւէտութիւններին ստրկացածները, վախկոտները, նրանք՝ ովքեր վատնում են կեանքը։



Սբ. Ամբրոսիոս Միլանցի

Յանձինս Քրիստոսի մենք ունենք ամէնը: [...] Եթէ ուզում ես բժշկել քո վէրքը, Նա բժիշկ է: Եթէ տապից տոչորւում ես, Նա աղբիւր է: Եթէ օգնութեան կարիք ունես, Նա ուժ է: Եթէ մահուան սպառնալիքի տակ ես, Նա կեանք է: Եթէ խաւարից փախչում ես, Նա լոյս է: Եթէ քաղցած ես, Նա կերակուր է. «Ճաշակեցէք եւ տեսէք, թէ որքա՜ն քաղցր է Տէրը: Երանելի՜ է այն մարդը, ով ապաւինում է Նրան» (Սղմ 33, 9):



Սբ. Յովհաննէս Քսաներեքերորդ Պապ

Կը թողնեմ, որ ոտնատակ ճզմեն ինձ, բայց կամենում եմ համբերատար ու բարի լինել մինչեւ հերոսութիւն։ Միմիայն այդ դէպքում արժանի կը լինեմ մասնակցելու Յիսուս Քրիստոսի քահանայութեանը։