Հեղինակի խօսք



ԺԴ. դարի անգլիացի անանուն հեղինակ

Ուշադրութիւն դարձրու այն բաներին, որոնք քեզ տակաւին պակասում են, եւ ո՛չ թէ այն բաներին, որոնք արդէն ունես։ Սա՛ է խոնարհութիւնը ձեռքբերելու եւ պահպանելու ամենակարճ ճանապարհը։



Անապատի Հայրերի կեանքից

Եղբայրներից մէկը հարցրեց Աբբա Պիմէնին. «Ի՞նչ պէտք է անեմ: Երբ խցումս միայնակ աղօթում եմ, քաջութիւնը պակասում է ինձ»: Ծերը պատասխանեց նրան. «Ոչ ոքի մի՛ արհամարհիր, մի՛ դատապարտիր, մի՛ կշտամբիր: Աստուած քեզ խաղաղութիւն կը տայ եւ կը խորհրդածես անդորրի մէջ»:



Էպիկտետոս

Աստուած մեզ տուել է երկու ականջ, բայց միայն մէկ բերան, որպէսզի լսենք կրկնակի, բայց խօսենք կիսով չափ։



Անապատի Հայրերի կեանքից

Եղբայրներից մէկը հարցրեց Աբբա Պիմէնին, ասելով. «Իմ հետ մի քանի եղբայրներ են բնակւում: Ուզո՞ւմ ես, որ ես հրամայեմ նրանց»: Ծերը նրան ասաց. «Ո՛չ, այլ՝ դու առաջինը եղիր գործը անելու մէջ, իսկ նրանք, եթէ ուզում են ապրել, կը մտածեն իրենք իրենց մասին»: Եղբայրը նրան ասաց. «Բայց, հայր, նրանք իրենք են ուզում, որ ես հրամայեմ իրենց»: Ծերը նրան ասաց. «Ո՛չ, այլ՝ նրանց համար օրինակ դարձիր, ո՛չ թէ՝ օրէնսդիր»:



Ջորդանո Ֆրոզինի

Նոր աշխարհը, վախճանաբանական տիեզերքը, սկսւում է Քրիստոսի Յարութեամբ։ Նրանով իսկապէս հասել է աշխարհի վախճանը. ժամանակը, որ մնում է, սոսկ տարածման ու ամբողջացման ժամանակ է։ Մարդկային պատմութեան ճակատագիրն այլեւս որոշուած է ընդմիշտ։ Յարութիւնը արարչագործութեան վերջին խօսքն է։



Անապատի Հայրերի կեանքից

Ծերերից ոմանք եկան Աբբա Պիմէնին այցելելու, եւ ասելու նրան. «Եթէ տեսնում ենք, որ եղբայրներից մէկը քուն է մտնում հաւաքի ժամանակ, ուզո՞ւմ ես, որ յանդիմանենք նրան, որպէսզի արթուն մնայ»: Ասաց նրանց. «Ինչ վերաբերւում է ինձ, երբ տեսնում եմ, որ եղբայրներից մէկը քուն է մտնում, նրա գլուխը ծնկներիս եմ դնում եւ թողնում եմ, որ հանգստանայ»:



Անանուն Հեղինակ

Քրիստոնէութեան առանցքը հանդիսացող ճշմարտութիւնը սա է. Տիրոջ հանդէպ մեր սէրը չափւում է այն նոյն չափով, որով չափւում է մեր սէրը մերձաւորի հանդէպ։ Մարդասիրութեան որակով է որոշւում մեր աստուածասիրութեան որակը։



Սուրբ Օգոստինոս

Երկու մարդիկ, ովքեր ուզում են տեսնել արեւածագը, իսկապէս յիմար կը լինէին, եթէ սկսէին վիճաբանել այն կէտի շուրջ, որտեղից արեւը ծագելու է, կամ արեւածագը դիտելու կերպերի շուրջ, ապա վիճաբանութիւնը սաստկացնելով դարձնէին կռիւ, հասնէին միմեանց ծեծելու եւ, կռուի թունդ պահին, մէկը միւսի աչքերը հանէին: Այդ ժամանակ արշալոյս դիտելու հարց չէր լինի այլեւս: [...] Մենք, որ ուզում ենք տեսնել Աստծուն, մաքրենք մեր սիրտը հաւատքի միջոցով, բուժենք խաղաղութեան դարմանով, քանի որ եռանդը, որով փոխադարձաբար սիրում ենք մէկս միւսիս, արդէն իսկ պարգեւներից մէկն է Նրա, դէպի ում են բարձրանալով ուղղւում մեր հայեացքները:



Մարթին Լութեր Կինգ

Վախը բախեց դռանը։ Հաւատքը գնաց բացելու։ Եւ ահա՛, ոչ ոք չկար։



Սբ. Յովհան Ոսկեբերան

Ճիշտ այն է, ինչ կամենում էր մատնացոյց անել Քրիստոսը, երբ ասում էր. «Իմ մօտ եկէք, դուք բոլորդ, որ յոգնած էք եւ ծանր բեռներ էք կրում, եւ ես կը մխիթարեմ ձեզ» (Մտթ 11, 28): Նա այսպէ՛ս է կանչում մեզ. չանցնե՛նք ու չգնա՛նք առանց լսելու Իրեն: Նա ձգում է մեզ դէպի Ինքը, չհեռանա՛նք Իրենից: Եթէ մեր մեղքերն անթիւ են, առաւե՛լ եւս հարկաւոր է գնալ Նրա մօտ, որովհետեւ հէնց սա՛ է մարդկանց այն տեսակը, որոնց Նա կանչում է: Արդարեւ, ասում է. «Չեմ եկել արդարներին կանչելու, այլ՝ մեղաւորներին» (Մտթ 9, 13): [...] Անուանուել է մխիթարութիւնների, ողորմութիւնների Աստուածը, որովհետեւ անդադար մխիթարում, քաջալերում է ապերջանիկներին ու վշտահարներին, նոյնիսկ եթէ հազարաւոր մեղքեր են գործել: Գոհանանք, ուրեմն, մեզ Իրեն յանձնելով, Իր մօտ գնալով, Իրենից չհեռանալով:



Դիտրիխ Բոնհոֆֆէր

Նա, ով չափազանց թանկարժէք է համարում իր ժամանակը եւ այդ ժամանակից չի կորցնում այլոց ունկնդրելու համար, իրականում երբեք ժամանակ չի ունենայ ո՛չ Աստծոյ, ո՛չ էլ մերձաւորի համար։ Ժամանակ կ\'ունենայ միայն իր եւ սեփական գաղափարների համար։



Սբ. Յովհաննէս Կղիմաքոս

Տեսել եմ հոգով եւ մարմնով հիւանդ ոմանց, ովքեր սարսափելի տանջւում էին իրենց մեղքերի մտքից եւ իրենք իրենց ենթարկում էին իրենց ուժերից վեր պայքարների: [...] Այդպիսիներին ասում եմ, որ Աստուած մեր զղջումը դատում է ո՛չ թէ մեր ջանքերի, այլ՝ մեր խոնարհութեան հիմքի վրայ:



Սիմոն Վէյլ

Պարտաւորութիւնն ունենք ճանաչելու այն ամէնը, ինչը որ իրաւունք չունենք մերժելու։



Սբ. Յովհաննէս Կղիմաքոս

Աստծոյ ողորմութիւնը սահման չունի, ոչինչ չի գերազանցում նրան: Ահա՛ թէ ինչու նա, ով յուսահատւում է, մահ է հայթայթում ինքն իր համար:



Ալբերտ Քամյու

Մարդը կարիքն ունի ինչ որ մի բանի, որը տարբեր լինի երկրից։