Օրուայ խօսք



Յովհաննէս 16, 33

Աշխարհում դուք նեղութիւններ էք կրում, բայց քաջալերուեցէք. ես յաղթեցի աշխարհին:



Սաղմոս 66, 1-20

Աղաղակեցէք առ Աստուած, բոլոր երկրներ, երգեցէք Նրա Անուան փառքը, դաւանեցէք Նրա փառքը գովասանքներով: Ասացէք Աստծուն. «Հրաշալի են Քո գործերը, Քո ուժի ներքոյ կքւում են թշնամիները. ամբողջ երկիրը երկրպագում է Քո առաջ, երգում է Քեզ, երգում է Քո Անուանը»: Եկէք եւ տեսէք Աստծոյ հրաշքները, զարմանահրաշ է Իր վարմունքը մարդու նկատմամբ. ծովը հաստատուն հողի փոխեց, ոտքով անցան գետը: Այս իսկ պատճառով, ուրախանանք Նրանում, Իր ուժի մէջ Նա տիրում է միշտ. Նրա աչքերը զննում են հեթանոսներին, Նրա դէմ գլուխ չեն բարձրացնում ապստամբները: Ո՜վ ժողովուրդներ, օրհնեցէք մեր Աստծուն, հնչեցրէք Նրա գովասանքը. Նա է, որ վերստին մեզ կեանք է տալիս եւ մեր ոտքերն անկումից վերապահում է: Ո՜վ Աստուած, մեզ փորձութեան ենթարկեցիր, հնոցից անցկացրիր մեզ, ինչպէս անցկացնում են արծաթը. Դու ես, որ առաջնորդեցիր մեզ գերութեան եւ ծանրութիւն կախեցիր մեր կողերին: Կամեցար, որ մարդիկ ձիերի նման անցնէին մեր գլուխների վրայով. մտանք կրակի ու ջրի մէջ, բայց յետոյ հանեցիր մեզ ազատութեան: Մտնելու եմ յարկերիցդ ներս ողջակէզներով, պահպանելու եմ Քեզ խոստացուած ուխտերը. շրթունքներիս արտասանած ուխտերը, բերանիս արտասանածը տրտմութեան ժամանակ: Կատարեալ ողջակէզ կը ներկայացնեմ Քեզ, խոյերի բուրմունքի հետ միասին, կ\'ընծայեմ Քեզ հորթեր ու այծեր: Եկէք, ունկնդրէք, Աստծուն երկրպագողներ, ձեզ կը պատմեմ այն՝ ինչ արեց իմ համար. երբ աղաղակս դէպի Նա բարձրացրի, բերանս արդէն երգում էր Նրա գովասանքը: Եթէ կասկած եղած լինէր իմ սրտում, Տէրը չէր լսի. մինչդեռ Աստուած լսեց ինձ, լսեց ու ընդունեց աղօթքի իմ աղաղակը: Թող օրհնեալ լինի Աստուած. Նա չմերժեց իմ աղօթքը, Նա Իր սէրը չհեռացրեց ինձնից:



Հմմտ. Մարկոս 11, 24

Այն ամէնը, որ խնդրում էք աղօթքում, հաւատացէք, որ արդէն իսկ ստացել էք:



Ղեւտացւոց 19, 26-31

Տէրը խօսեց Մովսէսի հետ ու ասաց. «Ես եմ ձեր Տէր Աստուածը։ [...] Կախարդութեամբ մի՛ զբաղուէք։ Գուշակութիւններ մի՛ արէք թռչունների թռիչքները դիտելով։ [...] Մահացած որեւէ մէկի յիշատակի համար ձեր մարմնի վրայ կտրուածքներ մի՛ արէք։ Ձեր մարմնի վրայ դաջուածքներ մի՛ արէք։ Ես եմ ձեր Տէր Աստուածը։ Մի՛ պղծիր քո դստերը՝ նրան պոռնկացնելով, որպէսզի երկիրը պոռնկութեան մէջ չընկնի ու անօրէնութեամբ չլցուի։ Իմ [տօն] օրերը կը պահէք եւ իմ սրբարանին երկիւղածութեամբ կը մօտենաք, քանզի ես եմ Տէրը։ Վհուկներին մի՛ հետեւէք եւ ոգեհմաների հետ մի՛ առնչուէք, որպէսզի նրանցով չպղծուէք»։



Հմմտ. Յովհաննէս 9, 31

Ով երկնչում է Աստծուց եւ կատարում է Նրա կամքը, մենք գիտենք, որ Աստուած լսում է նրան:



Ղեւտացւոց 19, 23

Տէրը խօսեց Մովսէսի հետ ու ասաց. «Երբ մտնէք այն երկիրը, որ Տէր Աստուած տալու է ձեզ, ամէն տեսակի պտղատու ծառեր տնկեցէ՛ք եւ նրա անմաքրութիւնը մաքրեցէ՛ք»։



2 Կորնթացիս 4, 16-18

Դրա համար էլ չենք տկարանում. այլ, թէպէտեւ մեր այս արտաքին մարդը քայքայւում է, բայց մեր ներքին մարդը նորոգւում է օրըստօրէ. որովհետեւ մեր թեթեւ նեղութեան առժամանակեայ յաճախանքը մեր մէջ առաջ է բերում յաւիտենական փառք, որ գերազանցում է ամէն ինչի. քանզի չենք նայում տեսանելի բաներին, այլ՝ անտեսանելիներին, որովհետեւ տեսանելիները ժամանակաւոր են, իսկ անտեսանելիները՝ յաւիտենական։



Սաղմոս 65, 2-14

Քեզ վայելում է օրհնութիւնը, Աստուած, Սիոնում, Քո առջեւ են աղօթքներ կատարւում Երուսաղէմում: Դէպի Քեզ, որ լսում ես աղօթքը, գալիս է ամէն մահկանացու: Մեր վրայ ծանրանում են մեր յանցանքները, բայց Դու ներում ես մեր մեղքերը: Երանելի է նա՝ ում ընտրում ես ու մօտիկ կանչում, բնակուելու է Քո օթեւաններում: Յագենալու ենք Քո տան բարիքներով, Քո տաճարի սրբութեամբ: Արդարութեանդ հրաշքներով Դու մեզ պատասխանում ես, Աստուած, փրկութիւն մեր, յոյս երկրի բոլոր սահմանների ու հեռաւոր ծովերի: Դու Քո ուժով հաստատուն ես դարձնում լեռները, զօրութեամբ գօտեպնդուած. Դու լռեցնում ես ծովի շառաչը, շառաչը նրա կոհակների, հանդարտեցնում ես խռովութիւնը հեթանոսների: Հեռաւոր սահմանների բնակիչները ապշում են ի տես Քո սքանչելիքների. ուրախութեամբ աղաղակել ես տալիս երկիրը, դռներն արեւելքի ու արեւմուտքի: Դու այցելում ես երկրին եւ ոռոգում ես այն, լիացնում ես բարիքներով. Աստծոյ գետը առատօրէն լի է ջրով, մարդկանց համար աճեցնում ես ցորենը: Անձրեւներով պատրաստում ես երկիրը, ոռոգում ես նրա ակոսները. հարթեցնում ու փափկացնում ես հողակոշտերը, օրհնում ես նրա ծիլերը: Քո բարիքներով պսակում ես տարին, որտեղով Դու անցնում ես, բխում է առատութիւնը. պարարտանում են անապատի արօտները եւ բլուրները ցնծութեամբ են զգեստաւորւում. մարգագետինները ծածկւում են երամակներով, ցորենով են զարդարւում հովիտները. ամէն բան երգում է եւ ուրախութեամբ ցնծում:



Ժողովող 4, 6

Լաւ է հանգիստ վաստակել մի բուռ, քան չարչարանքով ու տանջանքով՝ երկու բուռ։



Յայտնութիւն 19, 9

Քրիստոնեաների մասին գրուած է. «Երանի՜ նրանց՝ ովքեր հրաւիրուել են Գառան [= Յիսուս Քրիստոսի] հարսանեաց խնջոյքին»:



Ղեւտացւոց 19, 32

Տէրը խօսեց Մովսէսի հետ ու ասաց. «Ես եմ ձեր Տէր Աստուածը։ Ալեհեր մարդկանց առաջ ոտքի կը կանգնէք եւ կը պատուէք ծերերին։ Պիտի երկնչես քո Աստծուց։ Ես եմ քո Տէր Աստուածը»։



Հմմտ. Մատթէոս 22, 4

Յիսուսն ասում է. «Ահա՛, պատրաստեցի իմ խնջոյքը. ամէն բան պատրաստ է, եկէ՛ք հարսանիքի»:



Սաղմոս 64, 2-11

Լսիր, ո՜վ Աստուած, լացիս աղաղակը, թշնամուց պաշտպանիր կեանքս. հեռացրու ինձ չարագործների դաւադրութիւնից, նրանցից՝ ովքեր կազմակերպում են չարիքը: Դաշոյնի նման սրում են իրենց լեզուն, դառն խօսքեր են նետում նիզակների նման. գաղտնի հարուածելու համար անմեղին, յանկարծակի հարուածում են նրան առանց երկիւղի: Չարամիտ ծրագրերի են հետեւում, որոշում են դարաններ լարել, միմեանց միջեւ ասում են. «Ո՞վ է տեսնում դրանք». խնամքով պատրաստում են ոճիրները, իրագործում են իրենց ծրագրերից իւրաքանչիւրը, նրանց սիրտն ապականուած է ու անթափանցելի: Բայց Աստուած նիզակով հարուածում է նրանց, յանկարծակի զգում են վէրքը. իրենց իսկ լեզուն կործանելու է իրենց, ով նրանց տեսնելու է՝ գլուխ է թափահարելու: Յայնժամ բոլորը բռնուելու են երկիւղով, հռչակելու են Աստծոյ գործերը, եւ հասկանալու են այն՝ ինչ Նա արել է. արդարն ուրախանալու է Տիրոջ մէջ եւ Նրանում է հաստատելու իր յոյսը, սրտով ուղիղները դրանով փառաւորուելու են:



Ժողովող 4, 4

Ես տեսայ նաեւ, որ ամէն վաստակի եւ յաջողութեան համար մարդուս նախանձում է իր մերձաւորը։ Սակայն սա եւս ունայնութիւն է եւ հոգու տանջանք։ Յիմարը ձեռնածալ նստում եւ ինքն իրեն է ուտում։



Առակաց 4, 18-19

Արդարների ճանապարհները նման են ծագող լոյսի, որ առաջնորդում եւ լուսաւորում է նրանց, մինչեւ որ օրը լրիւ լուսաւորի։ Ամբարիշտների ճանապարհները նման են խաւարի, եւ նրանք չգիտեն, թէ ինչպէս են սայթաքելու։