– Գրադարան – Mashtoz.org

Ստրասբուրգի համալսարանի ռեկտոր է ընտրվել աստվածաբան և կաթոլիկ քահանա Հայր Միշել Դենեքենը
Ֆրանսիական (դժբախտ ու եղերական) Հեղափոխությունից 200 տարի անց կարծես թե նոր ու թարմ օդ է սկսել տարածվել հիվանդագին լաիկությամբ մինչ օրս տառապող Ֆրանսիայում։ Երկրի մեծությամբ երկրորդ համալսարանի՝ Ստրասբուրգի Համալսարանի նախագահ (ռեկտոր) է ընտրվել աստվածաբան, Հռոմեական Կաթոլիկ Եկեղեցու քահանա Հայր Միշել Դենեքենը։ Ստրասբուրգի Համալսարանում ուսանում է մոտ 50.000 ուսանող, իսկ դասախոսների ու գիտաշխատողների թիվը 4.000-ից ավելի է (իսկ տարեկան հաշվեկշիռը գերազանցում է 500 միլիոն եվրոյի ցուցանիշը)։

Հայր Միշել Դենեքենը ծնվել է 1957 թվականին և ավարտել է Ստրասբուրգի Համալսարանի աստվածաբանության և գերմանիստիկայի ֆակուլտետները։ 2001-2009 թվականներին եղել է Ստրասբուրգի Համալսարանի Կաթոլիկ Աստվածաբանության Ֆակուլտետի դեկանը (Faculté de théologie catholique de Strasbourg), իսկ 2002-2007 թվականներին տնօրենն է եղել Ստրասբուրգ 2 Համալսարանի Մշակութային Ձեռնարկների Ծառայության (Service de l'action culturelle de l'Université Strasbourg II)։ 2013 թվականին ընտրվել է ADUEIS-ի տնօրեն (Association pour le Développement des liens Université-Entreprises dans les Industries de Santé - Համալսարանի և Առողջապահության ոլորտի արդյունաբերական ձեռնարկությունների միջև զարգացման ուղիների Ընկերակցություն)։ Ապա դառնալով Ստրասբուրգի Համալսարանի փոխնախագահը, 2016 թվականի Դեկտեմբերի 13-ին ընտրվել է նախագահ (ռեկտոր)։ Այս պաշտոնը նա կվարի մոտակա 4 տարիների ընթացքում։

Հայր Միշել Դենեքենը աստվածաբանական և ա՛յլ բնույթի բազմաթիվ հատորների ու հոդվածների հեղինակ է։ Նրա օգտին քվեարկել են ընտրողներից 29ը, մինչ 9 հոգի քվեարկել է նրա մրցակցի օգտին, իսկ 1ը ձեռնպահ է մնացել։ Աթեիստական և իսլամական որոշ կազմակերպություններ բողոքել են այս ընտրության դեմ, օրինակ՝ Իսլամ Ուսանողների Միությունը և Կոմունիստ Ուսանողների Միությունը (հետաքրքիր համադրություն կազմելով)։ Կարևորագույն կազմակերպություններ, մինչդեռ, անվերապահորեն արտահայտվել են ի պաշտպանություն այս ընտրության, օրինակ՝ Ֆրանսիայի Համալսարանների Ռեկտորների Ներկայացուցչական Մարմինը (CPU) և Ստրասբուրգի Ուսանողների Ֆեդերատիվ Ընդհանուր Միությունը (AFGES)։

Ինչպես իրավացիորեն գրել է ֆրանսիական պարբերականներից մեկը, ով ընդդիմացել է Հայր Միշել Դենեքենի ընտրությանը, ո՛չ թե պաշտպանել է ազատությունն ու պետության լաիկության սկզբունքը, այլ ընդհակառակը՝ հարձակում է գործել այդ սկզբունքների դեմ։ «Ցանկանում էին նպաստել սեկոլարիզմի ներխուժմանը՝ լռեցնելու համար կրոնական որևէ կարծիք, խոչընդոտելով ազատ արտահայտվելու իրավունքին»։ Բարեբախտաբար, այդպես չստացվեց, և մաղթում ենք, որ սա լավ առիթ լինի ֆրանսիական ողջ հասարակության բարեփոխման համար. այնքան էլ լավ բան չէ 200 տարի ետ մնալը։
You can watch this video to help the site.
Շնորհակալություն կանխավ։