Սաղմոս 109 [108] - Նրանք անիծում են, բայց Դու օրհնում ես

Ա Ա Ա

Սաղմոսարանում ատելության ու վրիժառության ուրիշ սաղմոսների էլ ենք հանդիպում (օրինակի համար, Սղմ 16; 35; 137; 139), բայց դրանցից ոչ մեկն այնքան կատաղի չէ, որքան այս մեկը: Անշուշտ, հարկավոր է միշտ հիշել, որ Արևելքում արտահայտվելիս հոժարությամբ են չափազանցում, ինչպես նաև ճիշտ է, որ երբ շարադրվում էր այս սաղմոսը, հավատքը տակավին այնքան հասունացած չէր, որ կարողանար փոխել տալ փոխադարձ վրիժառության հինկտակարանյան օրենքը: Բայց Ավետարանում ևս կան անեծքներ ու նզովքներ (Մտթ 23, 13-36; Ղկս 6, 24-26): Հիսուս Քրիստոսն ու Առաքյալները ներում էին իրենց թշնամիներին, բայց չար գործերի ետևում տեսնում էին թաքնված «հին թշնամուն» (Հյտ 12, 9), չար ոգիներին: Ահա այդ չարքերին նրանք ընդդիմանում էին ամբողջ ուժգնությամբ: Ընդունելով և գործածելով անեծքներ պարունակող սաղմոսները, Եկեղեցին քրիստոնյաներին կոչ է անում պայքարել չար ոգիների դեմ (Եփս 6, 12), սկսելով սեփական սրտի տարածքից:

Կցորդ.		Դուք ինքներդ ձեզնից դատաստան մի՛ արեք, այլ՝ թողեք, որ գործի աստվածային բարկությունը (հմմտ. Հռմ 12, 19):
կամ.		Օրհնեցեք նրանց, ովքեր հալածում են ձեզ, օրհնեցեք և մի՛ նզովեք (Հռմ 12, 14):
կամ.		Մի՛ թող, որ չարը հաղթի քեզ, այլ՝ բարիով հաղթիր չարին (Հռմ 12, 21):
կամ.		Սիրեցեք ձեր թշնամիներին, բարիք արեք ձեզ ատողներին (Ղկս 6, 27):
կամ.		Օրհնեցեք նրանց, ովքեր անիծում են ձեզ, աղոթեցեք նրանց համար, ովքեր ձեզ չարչարում են (Ղկս 6, 28):

¹Երգչախմբի ղեկավարի համար: Դավթի: Սաղմոս:

Գովաբանություններիս Աստված, լուռ մի՛ մնա,

²իմ դեմ բացվել է չարագործի բերանը.

նենգավոր բերանն իմ մասին ստեր է ասում,

³շրջապատում են ինձ ատելության խոսքերով,

առանց պատճառի իմ դեմ պատերազմում են:

⁴Սերս փոխհատուցում են մեղադրանքներով,

մինչ ես կանգնած եմ աղոթքի.

⁵բարիքի փոխարեն ինձ հատուցում են չարիք,

և ատելություն՝ իմ սիրո փոխարեն:

***

⁶«Թող մի ամբարիշտ նշանակվի նրա դեմ,

նրա աջ կողմում թող կանգնի ամբաստանողը.

⁷դատարանից թող հանցապարտ դուրս գա,

նրա աղոթքը թող վերածվի մեղքի:

⁸Թող կարճացվեն նրա կյանքի օրերը,

մի ուրիշը թող վերցնի նրա պաշտոնը.

⁹նրա որդիները որբեր դառնան,

նրա կինը թող դառնա այրի:

¹⁰Նրա որդիները մուրալով թափառեն,

դուրս վռնդվեն իրենց ավերված տներից.

¹¹վաշխառուն լափի նրա բոլոր ունեցվածքները,

օտարներն հափշտակեն նրա տիրույթը:

¹²Ոչ ոք թող նրա համար ողորմություն չխնդրի,

ոչ ոք չողորմի նրա որբերին.

¹³թող զրկված լինի սերնդից,

նրա անունը թող անհետանա գալիք սերնդի միջից:

¹⁴Նրա հայրերի հանցանքները թող հիշվեն Տիրոջ առաջ,

թող չջնջվի նրա մոր մեղքը.

¹⁵թող միշտ Տիրոջ առաջ լինեն,

նրա հիշատակը թող ջնջվի երկրից»:

***

¹⁶Ահա այսպես մերժում է ողորմություն անել,

հալածելով խեղճին ու աղքատին,

սպանելով խոնարհված սիրտ ունեցողներին.

¹⁷սիրեց նզովքը, թող ընկնի իր վրա,

ատեց օրհնությունը, թող նրանից հեռանա:

¹⁸Անեծքը, որ հագնում էր որպես պատմուճան,

թող ջրի նման թափանցի նրա որովայնից ներս,

թող յուղի նման ներծծվի ոսկորների մեջ:

¹⁹Թող նրա համար լինի որպես զգեստ, որ պատում է նրան,

գոտի, որ սեղմում է նրան ընդմիշտ.

²⁰որովհետև Տերն այդպես է վարձատրում զրպարտողներին,

նրան, ով չարիք է խոսել իմ դեմ:

²¹Իսկ Դու, Տեր, Աստված իմ,

միջամտիր Քո Անվան պատճառով,

հավատարիմ սիրույդ համաձայն՝ օգնիր ինձ:

²²Ես խեղճ եմ ու աղքատ,

սիրտս խոցված է ինձնում.

²³քայլում եմ ինչպես խոնարհվող ստվերը,

ինչպես մորեխը, որ ոտքի տակ ճզմվում է:

²⁴Ծնկներս նվաղել են պահքից,

մարմինս նիհարել է և ուժասպառ եղել.

²⁵նրանց համար դարձել եմ նախատինք,

ով ինձ տեսնում է, թափահարում է գլուխը:

²⁶Օգնիր ինձ, Տեր, Աստված իմ,

փրկիր ինձ հանուն Քո սիրո շնորհի.

²⁷թող ճանաչեն, որ ձեռքդ գործում է,

որ Դու, Տեր, միջամտում ես:

²⁸Նրանք անիծում են, բայց Դու օրհնում ես,

բարձրանում են, բայց խոնարհեցվում,

ծառադ ուրախությունից ցնծում է.

²⁹մեղադրողներս ծածկված են ամոթով,

պատված են անարգության պատմուճանի մեջ:

³⁰Լիաձայն երախտագիտություն եմ մատուցում Տիրոջը,

ամբոխների մեջ մեծարում եմ Նրան.

³¹որովհետև կանգնած է աղքատի աջին,

փրկելու համար նրանցից, ովքեր դատապարտում են նրան:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։