Սաղմոս 12 [11] - Ստության շրթունքները

Ա Ա Ա

Կեղծավորությունը, երկերեսանիությունն ու ստությունը վխտում են մարդկանց աշխարհում: Հիմնականում դրանց զոհն է դառնում աղքատը: Բայց Տերը խոստանում է միջամտել, իսկ Իր խոսքը հավատարիմ է ու ճշմարտացի:

Կցորդ.		Քո խոսքերի հիման վրա ես արդարանալու, քո խոսքերի հիման վրա ես դատապարտվելու (Մտթ 12, 37):
կամ.		Ձեր բերանից չար խոսքեր թող դուրս չգան, այլ հատկապես՝ խոսքեր բարության (հմմտ. Եփս 4, 29):
կամ.		Եթե մեկը խոսելիս չի մեղանչում, կատարյալ մարդ է (Հկբ 3, 2):
կամ.		Լեզուն անօրենության աշխարհն է, ապականում է մարմինը և հրդեհում կյանքը (հմմտ. Հկբ 3, 6):

¹Երգչախմբի ղեկավարի համար: Ութերորդականի վրա:

Սաղմոս: Դավթի:

²Փրկիր, Տեր, հավատարիմ ոչ ոք այլևս չկա,

մարդկանց միջից անհետացել է հավատարմությունը.

³յուրաքանչյուր ոք իր ընկերոջն ասում է ունայն խոսքեր,

խաբեության շրթունքները խոսում են երկերեսանի սրտով:

⁴Տերը թող լռեցնի ստության շրթունքները,

լեզուն, որ պարծենում է վիթխարի նախաձեռնություններով,

⁵ովքեր հաստատում են. «Մեր լեզվով գերակշռում ենք,

շրթունքներով, որ ունենք, ո՞վ կլինի մեզ տեր»:

⁶«Աղքատների շահագործման և խեղճերի հեծեծանքների պատճառով

ես ահա ոտքի եմ կանգնում, – ասում է Տերը, –

և փրկությունը բերում եմ նրան, ով այն փափաքում է»:

⁷Տիրոջ խոսքերը ճշմարտության խոսքեր են,

մաքրագործված արծաթ, յոթնապատիկ նրբացված.

⁸Դու, Տեր, պահպանում ես արդարներին,

այս սերնդից և ընդմիշտ.

⁹նույնիսկ եթե չորս կողմը պտտվեն չարագործները,

եթե ապականությունն աճի մարդկանց մեջ:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։