Սաղմոս 18.1 - Դեպի ինձ երկարում է Իր ձեռքը

Ա Ա Ա

Կցորդ.		Մենք հոգնում և պայքարում ենք, որովհետև մեր հույսը կենդանի Աստծո վրա է (1Տմ 4, 10):
կամ.		Շատերը կգան արևելքից ու արևմուտքից և ընթրիքի կնստեն երկնքի արքայությունում (հմմտ. Մտթ 8, 11):

²Ես սիրում եմ Քեզ, Տեր, զորություն իմ,

³Տեր, վեմ իմ, պաշտպանություն իմ, ազատարար իմ,

Աստված իմ, ժայռ, որի վրա եմ ապավինում,

վահան իմ, փրկության իմ ուժ, հենարան իմ.

⁴բացականչեցի. «Օրհնյալ է Տերը»,

բոլոր թշնամիներիցս փրկվեցի:

⁵Մահվան ցանցերը պաշարում էին ինձ,

քշում տանում էին ինձ կատաղի հորձանքները.

⁶դժոխքի շղթաները պատում էին ինձ,

մահվան ցանցերի որսն էի դարձել:

⁷Տրտմությանս մեջ կանչեցի. «Տե՜ր»,

աղաղակեցի իմ Աստծուն.

Իր օթևանից լսեց իմ ձայնը,

Իր ականջներին հասավ իմ աղաղակը:

***

⁸Երկիրը խռովվում է ու դողում,

սասանվում են լեռների հիմքերը,

ցնցվում են, որովհետև Նա զայրացել է.

⁹բարկության ծուխ է դուրս գալիս,

Նրա բերանից՝ սպառող կրակ,

Նրա չորսկողմը՝ հրաշեկ ածուխ:

¹⁰Խոնարհում է երկինքը և իջնում,

Նրա ոտքերի ներքո՝ խավար ամպեր.

¹¹հեծնում է քերովբեին ու սլանում,

սավառնում է քամու թևերի վրա:

¹²Խավարն Իր համար քող է դարձնում,

մթին ջրերն ու խիտ ամպերը՝ վրան.

¹³Նրա փայլատակման առաջ ամպերը ցրվում են

կարկուտով և կրակի կայծերով:

¹⁴Բարձրյալը որոտում է և առաքում Իր ձայնը.

կարկուտ և կրակի կայծեր:

¹⁵Տերը նետեր է արձակում և ցրում է նրանց,

սարսափահար են կայծակների շաչյունից.

¹⁶բացվում է ծովերի հատակը,

երևում են աշխարհի հիմքերը

Քո սպառնացող ձայնի դիմաց, Տեր,

զայրույթիդ քամու փչման դիմաց:

¹⁷Վերևից դեպի ինձ երկարում է Իր ձեռքը և բռնում ինձ,

բարձրացնում է ինձ ջրերի հորձանքից.

¹⁸ազատում է ինձ իմ հզոր թշնամուց,

ինձնից ավելի ուժեղ հակառակորդներից:

¹⁹Սպասում էին կործանմանս օրը,

բայց Տերը իմ օգնականն էր.

²⁰դուրս բերեց ինձ ազատ տարածքներ,

ազատեց, որովհետև սիրում է ինձ:

***

²¹Տերն ինձ վարձատրում է ըստ իմ արդարության,

հատուցում է ինձ ձեռքերիս անմեղության համաձայն.

²²պահպանեցի Տիրոջ ճանապարհները,

չարագործ ես չեղա, իմ Աստծուց հեռու:

²³Նրա որոշումները բոլորն էլ իմ առջևն են,

ինձնից չեմ վանում Նրա հրամանները.

²⁴անբիծ եմ ես Նրա համար,

արթուն հսկում եմ, մեղքից հեռու.

²⁵Տերն ինձ վարձատրում է ըստ իմ արդարության,

դեպի Ինքն ուղղված ձեռքերիս անմեղության համաձայն:

²⁶Դու հավատարիմ ես նրա հետ, ով հավատարիմ է,

անստգտանելի մարդու հետ՝ անստգտանելի.

²⁷անկեղծ ես նրա հետ, ով անկեղծ է,

չարասերի հետ Դու խորամանկ ես.

²⁸Դու փրկում ես խոնարհ ժողովրդին,

բայց խոնարհեցնում ես մեծամիտների աչքերը:

²⁹Տեր, Դու լույս ես իմ ճրագին,

իմ Աստվածը լուսավորում է իմ խավարը.

³⁰Քո հետ՝ նետվում եմ բազմությունների դեմ,

իմ Աստծո հետ՝ հաղթահարում եմ պարիսպները:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։