Սաղմոս 37 [36] - Հեզերը ժառանգելու են երկիրը

Ա Ա Ա

Իր սրտում անդորր ունեցող մի ծերունի պատգամներ և ուսուցումներ է ավանդում արդարի ու ամբարշտի հակադիր ճակատագրի մասին: Իմաստության գեղեցիկ ուսուցումներ են նրանց համար, ովքեր զայրանում են չարագործների հաջողություններին ի տես: Նրանց հաղթանակները վաղանցուկ են: Կյանքի փորձառությունից քաղված դասերը և Աստծո խոսքի շուրջ կատարած խորհրդածություններն այս իմաստունին հայտնել են այն երանելի վախճանը, որը Տերը վերապահել է Իր մտերիմների համար. յուրաքանչյուր հավատարիմ հավատացյալ կանչված է վայելքով ու խաղաղությամբ բնակվելու խոստացված Սուրբ Երկրում, որը մարգարեական պատկերն է հավիտենական օթևանների: Հիսուսի ուսուցումները քողազերծում են մարգարեական այդ պատկերները. խոստացված անսահման երանությունը դա Աստծո Արքայությունն է, ճշմարիտ Սուրբ Երկիրը, որը խոստացված է բոլոր նրանց, ովքեր Աստծուն հավատարիմ են ու Նրա հանդեպ վստահասիրտ:

Կցորդ.		Եկեք, իմ Հոր օրհնյալներ, ժառանգեցեք ձեր համար պատրաստված արքայությունը (Մտթ 25, 34):
կամ.		Գանձեր մի՛ դիզեք երկրի վրա, այլ՝ երկնքում (հմմտ. Մտթ 6, 19-20):
կամ.		Ձեր լույսը թող փայլի մարդկանց առաջ, որպեսզի փառավորեն ձեր Հորը, որ երկնքում է (հմմտ. Մտթ 5, 16):

¹Դավթի:

Մի՛ զայրացիր ամբարիշտներին տեսնելով,

չարագործներին մի՛ նախանձիր.

²խոտի նման շուտով թառամում են,

չորանում են դաշտի խոտի նման:

³Հավատք ունեցիր Տիրոջ հանդեպ և բարիք գործիր,

բնակվիր երկրում և հավատարմությունը թող լինի քո սնունդը.

⁴Տիրոջ մեջ փնտրիր ուրախությունդ,

կկատարի սրտիդ փափաքները:

⁵Ընթացքդ կողմնորոշիր դեպի Տերը,

վստահիր Նրան և Նա կգործի.

⁶արշալույսի նման ծագել կտա արդարությունդ,

կեսօրվա նման փայլել կտա արդարությունդ:

⁷Լռություն պահպանիր Տիրոջ ներկայությանը,

և Նրանում հաստատիր քո հույսը.

մի՛ զայրացիր նրանց համար, ովքեր հասնում են հաջողության,

մարդու համար, որ դիմում է խաբեությունների:

⁸Հրաժարվիր զայրույթից, լքիր կատաղությունը,

մի՛ բարկացիր. չարիք կգործես.

⁹արմատախիլ է արվելու, ով գործում է չարիք,

ժառանգելու է երկիրը նա, ով հուսացել է Տիրոջը:

¹⁰Եվս մի քիչ և չարագործն անհետանալու է,

փնտրելու ես նրան և ահա՝ այլևս չկա.

¹¹հեզերը ժառանգելու են երկիրը

և վայելելու են անսահմանափակ խաղաղություն:

***

¹²Չարագործը դավեր է նյութում արդարի դեմ,

նրա դեմ կրճտացնում է ատամները.

¹³բայց Տերը ծիծաղում է նրա վրա,

արդեն տեսնում է նրա օրվա հասնելը:

¹⁴Չարագործները պատյանից հանում են սուրը և լարում աղեղը,

գետին տապալելու համար աղքատին ու խեղճին,

հարվածելու համար նրան, ով հետևում է ուղիղ ճանապարհին.

¹⁵բայց նրանց սուրը մտնելու է իրենց իսկ սիրտը,

նրանց աղեղները փշրվելու են:

¹⁶Ավելի լավ է արդարի ունեցած քիչը,

քան ամբարիշտների մեծ հարստությունը.

¹⁷որովհետև կոտրվելու են չարագործների բազուկները,

բայց Տերը թիկունք է կանգնում հավատացյալներին:

¹⁸Տերը ճանաչում է բարիների օրերը,

որպես պարգև ունենալու են հավիտենական ժառանգություն.

¹⁹նեղության ժամանակ չեն ամաչելու,

հագենալու են քաղցի օրերին:

²⁰Չարագործները, մինչդեռ, մահանալու են,

որովհետև Տիրոջ թշնամիներն են.

վերջանալու են դաշտերի խոտի նման,

ծխի նման բոլորը մեկ անհետանալու են:

²¹Չարագործը պարտք է վերցնում և չի վերադարձնում,

բայց արդարը ողորմում է և բաժին հանում.

²²օրհնյալները ժառանգելու են երկիրը,

անիծյալները բնաջինջ են լինելու:

²³Տերն առաջնորդում է մարդու քայլերը,

դարձնում է հաստատուն և սիրով հետևում է նրա ընթացքին.

²⁴եթե ընկնում է, ընկած չի մնում,

Տերն Իր ձեռքով նրան բարձրացնում է:

²⁵Երիտասարդ էի ես, իսկ այժմ՝ տարեց,

հավատացյալներից մեկին երբեք չեմ տեսել լքված,

ո՛չ էլ նրա որդիներին՝ հաց մուրալիս.

²⁶իր ունեցածից ամեն օր բաժին է հանում սիրով,

այս իսկ պատճառով՝ նրա սերունդը օրհնված է:

***

²⁷Հեռացիր չարից և գործիր բարին,

բնակության օթևան կունենաս միշտ.

²⁸որովհետև Տերը սիրում է արդարությունը,

երբեք չի լքում Իր մտերիմներին:

Նրանք պաշտպանություն են ունենալու հավիտյան,

մինչ չարագործների սերունդը անհետանալու է.

²⁹հավատացյալները ժառանգելու են երկիրը

և նրանում բնակվելու են ընդմիշտ:

³⁰Արդարի բերանը խոսում է իմաստություն,

նրա լեզուն հռչակում է արդարությունը.

³¹սրտում ունի իր Աստծո օրենքը,

իր քայլերը երբեք չեն սասանվելու:

³²Չարագործը դարանակալում է արդարին

և ցանկանում է նրան մահ հասցնել.

³³բայց Տերն արդարին չի թողնում նրա ձեռքում,

ատյանում չի թույլատրում արդարի դատապարտությունը:

³⁴Հույսդ Տիրոջ մեջ հաստատիր

և պահպանիր Նրա ճանապարհը.

կհասցնի քեզ երկրին տիրելուն

և դու կտեսնես չարագործների արմատախիլ լինելը:

³⁵Տեսա, թե ինչպես էր ամբարիշտը հաղթանակում,

ինչպես էր բարձրանում փարթամ ծառի նման.

³⁶կրկին անցա մոտով և ահա՝ այլևս չկար,

փնտրեցի և այլևս չգտա նրան:

³⁷Դիտիր անբիծին, զննիր հավատացյալին,

խաղաղության մարդուն է պատկանում ապագան.

³⁸բայց մեղավորները բոլորն էլ ոչնչացվելու են,

չարագործներին ապագան մերժված է:

³⁹Տիրոջից է գալիս հավատացյալների փրկությունը,

նրանց պաշտպանությունը՝ տրտմության ժամանակ.

⁴⁰Տերն օգնում է նրանց, ազատում չարագործներից և փրկում նրանց,

որովհետև Նրանում են փնտրում իրենց պաշտպանությունը:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։