Սաղմոս 7 - Աստված արդար դատավոր

Ա Ա Ա

Մի մարդ, որն անարդարացիորեն մեղադրվել է, հռչակում է իր անմեղությունը և Աստծուց խնդրում է արդարություն անել:

Դժվար չէ այս սաղմոսը մարգարեական որոշակի կապի մեջ դնել Հիսուսի հետ, որին դավաճանեց Իր իսկ առաքյալներից մեկը, բայց որին անմեղ հռչակեց Սուրբ Հոգու վկայությունը (Հվհ 13, 21; Ղկս 22, 48; Հվհ 16, 8-11):

Մերը դարձնելով այս աղոթքը, կսովորենք դուրս գալ ինքներս մեզնից և աղոթել Եկեղեցու հետ միասին, որն անդադար մեղադրվում է ու հալածվում (Մտթ 25, 31-32; Հյտ 22, 20): Եղբայրներին հոգեպես միանալով, մեր մեջ կվերարծարծենք Քրիստոսի երկրորդ և վերջնական գալստյան հույսն ու վառ փափաքը:

Կցորդ.		Մեղքի վարձը մահ է, մինչ Աստծո պարգևը հավիտենական կյանք է ի Հիսուս Քրիստոս (Հռմ 6, 23):
կամ.		Համբերատար եղեք և ամրացրեք ձեր սրտերը, որովհետև Տիրոջ գալուստը մոտ է (Հկբ 5, 8):
կամ.		Ահա, դատավորը դռան սեմին է. որպես համբերության օրինակ ունեցեք մարգարեներին (հմմտ. Հկբ 5, 9-10):

¹Տրտունջ: Դավթի: Երբ նա Տիրոջ առաջ երգեց Յեմինի որդի Քուսի խոսքերի պատճառով:

²Տեր Աստված իմ, Քեզնում եմ ապաստան փնտրում.

փրկիր և ազատիր ինձ նրանից, ով հետապնդում է ինձ,

³ապա թե ոչ՝ կհոշոտի առյուծի նման,

կլափի և ոչ ոք ինձ չի ազատի:

⁴Տեր Աստված իմ, եթե բռնություն կա իմ ձեռքերում,

եթե չար հատուցեցի իմ բարեկամին,

⁵եթե անարդարացիորեն զրկեցի հակառակորդներիս,

⁶թող հետապնդի ինձ թշնամին և հասնի,

հողի վրա ոտնակոխ անի իմ կյանքը,

փոշու մեջ թավալեցնի փառքս:

⁷Ոտքի ել, Տեր, բարկությամբդ,

բարձրացիր թշնամիներիս սաստկության դեմ,

արթնացիր իմ համար և սկիզբ տուր դատաստանին,

⁸թող շուրջդ խմբվի ժողովուրդների հավաքը,

վերադարձիր և նախագահիր ի վերուստ.

⁹Տերը կլինի ժողովուրդների դատավորը:

Դատիր ինձ, Տեր, արդարությանս հարցով,

իմ փոխարեն՝ անմեղությունս թող խոսի.

¹⁰թող դադարի ամբարիշտների չարությունը,

հաստատությամբ ամրացրու արդար մարդուն,

Դու, որ քննում ես սիրտն ու խորքը,

Դու, միայն Դու, արդար Աստված:

¹¹Վահանս Աստծո մոտ է,

Նա սրտով ուղիղների փրկիչն է.

¹²Աստված արդար դատավոր է, հզոր և համբերատար,

ամեն օր չի սանձազերծում Իր բարկությունը:

¹³Ով դարձի չի գալիս և սրում է իր թուրը,

լարում է աղեղը և թիրախին նշան առնում,

¹⁴ինքն իր համար մահվան գործիքներ է պատրաստում,

իր աղեղներից՝ հրաբորբոք ածուխ:

¹⁵Ահա հղանում է չարիք,

իրենում կրում է ոճիր,

ինքն իր վրա դժբախտություն է ծնում:

¹⁶Եթե փոս է բացում և փորում խորացնում,

ինքն է ընկնելու այդ փոսի մեջ.

¹⁷իր իսկ գլխին է բարդվելու իր ոճիրը,

իր բռնությունը իր գլխին է թափվելու:

¹⁸Փառավորելու եմ Տիրոջն Իր արդարության համար,

երգելու եմ Բարձրյալ Տիրոջ Անունը:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։