Սաղմոս 78.2 - Կրկին փորձեցին Աստծուն

Ա Ա Ա

Կցորդ.		Մեր հայրերը խմում էին մի ժայռից, և այդ ժայռը Քրիստոսն Ինքն էր (հմմտ. 1Կր 10, 4):
կամ.		Աստված մեր համար փրկության մի ուժ հարուցեց Դավթի՝ Իր ծառայի տանը (հմմտ. Ղկս 1, 69):
կամ.		Աստված նրան տալու է Դավթի՝ իր հոր գահը, և նա հավիտյան թագավորելու է Հակոբի տան վրա (հմմտ. Ղկս 1, 32-33):

⁴⁰Քանի՜ անգամ ապստամբեցին անապատում,

դառնացնելով Նրան միայնության այն տափաստաններում.

⁴¹կրկին փորձում էին Աստծուն,

համբերությունից հանում էին Իսրայելի Սրբին.

⁴²այլևս չէին հիշում Նրա ձեռքը,

ստրկությունից ազատագրվելու օրը:

⁴³Իր նշաններով հարվածեց Եգիպտոսին,

Իր հրաշքներով՝ Տայանի երկիրը.

⁴⁴արյան փոխեց նրանց գետերը,

աղբյուրները, որպեսզի խմել չկարողանային:

⁴⁵Բզեզներ ուղարկեց լափելու

և ներխուժող գորտեր՝ ապականելու.

⁴⁶բերքը հանձնեց թրթուռներին,

աշխատանքի արդյունքը՝ մարախին.

⁴⁷կարկուտով փչացրեց նրանց խաղողի այգիները,

նրանց պտուղները՝ հանկարծադեպ ցրտով:

⁴⁸Նախիրները կարկուտին մատնեց,

կայծակներին՝ նրանց բոլոր երամակները.

⁴⁹սանձազերծեց Իր բոցավառ ցասումը,

զայրույթը, բարկությունն ու զարհուրանքը,

և առաքեց չարիքի պատգամաբերներ:

⁵⁰Ճանապարհ հարթեց Իր բարկության առաջ,

նրանց կյանքը մահից չխնայեց,

ժանտախտի ձեռքը մատնեց նրանց կյանքը.

⁵¹հարվածեց Եգիպտոսի անդրանիկներին,

Քամի լավագույններին իրենց վրաններում:

⁵²Ոչխարների հոտի նման դուրս բերեց Իր ժողովրդին,

հոտի նման առաջնորդեց նրանց անապատ.

⁵³հուսալիորեն առաջնորդեց նրանց և չէին սարսափում,

և ծովը ծածկեց նրանց թշնամիներին:

⁵⁴Բերեց նրանց Իր Սրբության սահմանին,

Իր աջով տիրացած լեռանը.

⁵⁵նրանց առջևից վտարեց ժողովուրդներին,

սահմանելով նրանց տիրույթի մասերը,

վրաններում բնակեցնելով Իսրայելի տոհմերին:

***

⁵⁶Բայց կրկին փորձեցին Աստծուն,

ապստամբելով Բարձրյալի դեմ,

մերժելով պահպանել Նրա օրենքները:

⁵⁷Ինչպես իրենց հայրերը, խոտորվում էին ու դավաճանում,

ձախողվում էին թյուր աղեղի նման.

⁵⁸բարձունքների պաշտամունքներով զայրացնում էին Նրան,

կուռքերով գրգռում էին Նրա նախանձախնդրությունը:

⁵⁹Հայնժամ Աստված լսեց և զայրացավ,

խստորեն հեռացրեց Իրենից Իսրայելին.

⁶⁰լքեց Սելովի խորանը,

մարդկանց մեջ կանգնեցված բնակատեղին.

⁶¹բանտարկության մատնեց Իր զորությունը,

թշնամու ձեռքերին՝ Իր փառքը:

⁶²Հանձնեց Իր ժողովուրդը սրի,

զայրանալով Իր ժառանգության դեմ.

⁶³կրակը լափեց նրա երիտասարդներին,

նրա կույսերը ամուսնություն չտեսան.

⁶⁴նրա քահանաները սպանվեցին սրով,

նրա այրիները սուգ ու ողբ չարեցին:

***

⁶⁵Տերը քնից արթնացավ,

ինչպես գինուց սթափվող մի ռազմիկ.

⁶⁶թիկունքից հարվածեց Իր հակառակորդներին,

նրանց հավիտյան ամոթով ծածկեց:

⁶⁷Մերժեց Հովսեփի վրանը,

արհամարհեց Եփրեմի տոհմը.

⁶⁸Հուդայի տոհմն ընտրեց,

Սիոն լեռը, որ սիրում է.

⁶⁹բարձրացրեց Իր Սրբավայրն ինչպես երկինքը,

այն հավիտյան հաստատեց ինչպես երկիրը:

⁷⁰Եվ ընտրեց Դավթին՝ Իր ծառային,

վերցնելով նրան հոտերի ցանկապատի մոտից.

⁷¹հրամայեց նրան թողնել ոչխարներին,

դարձնելու համար նրան Հակոբի՝ Իր ժողովրդի,

Իսրայելի՝ Իր տիրույթի հովիվը:

⁷²Նա եղավ մաքուր սրտով հովիվ,

իմաստուն ձեռքով առաջնորդեց նրանց:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։