Սաղմոս 80 [79] - Աստված, վերադարձրու մեզ

Ա Ա Ա

Հարևան ժողովուրդները ներխուժել են Պաղեստինի կենտրոնական մասը, կամ առնվազն՝ Հովսեփի տան տոհմերի (Եփրեմի ու Մանասեի) կողմից զբաղեցված տարածքները, ինչպես նաև նրանց եղբայր տոհմի՝ Բենիամինի հողերը: Սաղմոսը նկարագրում է Աստծո ժողովրդի անցյալի ու ներկայի պատմությունը, գործածելով փարթամ որթատունկի պատկերը: Մի ժամանակ այն տարածվում էր ամբողջ երկրով մեկ (ակնարկվում է Դավթի թագավորությանը): Այժմ այն ոտնակոխ է արվում հեթանոս օտարերկրացիների կողմից (անցորդները, որոնք քաղում են նրա պտուղները. վարազներն ու վայրի կենդանիները, որոնք ավերում են այն): Աստված չի կարող լքել Իր այգին, որն Իր իսկ ձեռքերով է տնկել ու հոգատարությամբ մշակել (Ես 5, 1-7; 27, 2-5; Եր 2, 21; 12, 10), քանի որ Ինքն է Իսրայելի հովիվը (Եզ 34, 31; Ես 40, 11; Եր 31, 10): Այս համոզումից են բխում սաղմոսի եռանդուն աղերսները և դարձի գալու վերջնական խոստումը:

Հիսուս Քրիստոսի Եկեղեցին Տիրոջ այգին է (Մտթ 20, 1-16; 21, 33-41; Հվհ 15, 1-5): Հիսուս Քրիստոսն Աստծո ժողովրդի բարի Հովիվն է (Հվհ 10, 1-18): Եկեղեցին նույնպես հալածվում ու թալանվում է իր թշնամիների կողմից, որոնցից վատթարագույնը բաժանումն է: Այս իսկ պատճառով, 80րդ սաղմոսը կարող է մեր աղոթքը դառնալ՝ Աստծուց խնդրելու համար քրիստոնյաների միջև հաշտությունն ու միությունը:

Կցորդ.		Ես եմ ճշմարիտ որթատունկը, իսկ իմ Հայրը այգեգործն է (Հվհ 15, 1):
կամ.		Ես որթատունկն եմ, իսկ դուք՝ ոստերը. ով մնում է իմ մեջ, շատ պտուղ է բերում (հմմտ. Հվհ 15, 5):
կամ.		Դու չես, որ կրում ես արմատին, այլ՝ արմատն է, որ կրում է քեզ (հմմտ. Հռմ 11, 18):
կամ.		Անհավատարմության պատճառով՝ որոշ ճյուղեր կտրվեցին, բայց դու պատվաստված ես մնում հավատքի զորությամբ (հմմտ. Հռմ 11, 20):
կամ.		Հոգին և հարսը ասում են. «Ե՛կ»: Եվ ով լսում է, թող ասի. «Ե՛կ» (Հյտ 22, 17):

¹Երգչախմբի ղեկավարի համար: «Շուշաններ»ի վրա: Վկայություն:

Ասափի: Սաղմոս:

²Ունկն դիր, Իսրայելի Հովիվ,

Դու, որ հոտի նման առաջնորդում ես Հովսեփին

և քերովբեներից վեր՝ բազմում ես գահի վրա.

³հայտնվիր Եփրեմի, Բենիամինի, Մանասեի առաջ,

շուտով վերարթնացրու զորությունդ

և եկ՝ բերելու մեզ փրկությունը:

⁴Ո՜վ Աստված, վերադարձրու մեզ,

հայտնիր Դեմքդ և կփրկվենք:

⁵Տեր, տիեզերքի Աստված,

մինչև ե՞րբ ես բարկացած մնալու

Քո ժողովրդի աղոթքի դեմ:

⁶Դու կերակրում ես մեզ արտասուքի հացով,

առատ արցունքներով հագեցնում ես մեր ծարավը.

⁷մեզ վեճի ես դնում մեր հարևանների հետ,

մեր թշնամիները ծաղրում են մեզ:

⁸Տիեզերքի Աստված, վերադարձրու մեզ,

հայտնիր Դեմքդ և կփրկվենք:

⁹Խաղողի այգին, որ Եգիպտոսից փոխադրեցիր,

այն տնկեցիր՝ հեթանոսներին արտաքսելով.

¹⁰հողն ազատեցիր նրա համար,

արմատներ նետեց և լցրեց երկիրը:

¹¹Նրա ստվերը ծածկում էր լեռներին,

ամենաբարձր մայրիներին՝ նրա ոստերը.

¹²նրա ճյուղերը տարածվում էին մինչև ծովը,

նրա բողբոջները՝ Գետի ուղղությամբ:

¹³Ինչո՞ւ քանդեցիր նրա ցանկապատը,

նրա պտուղները քաղում են ճանապարհի անցորդները.

¹⁴անտառի վարազը ապականում է այն,

այնտեղ արածում են դաշտերի գազանները:

¹⁵Տիեզերքի Աստված, վերադարձրու մեզ,

[հայտնիր Դեմքդ և կփրկվենք]:

Նայիր երկնքից և տես,

¹⁶այցելիր այս այգին և այն պաշտպանիր.

արմատը, որ Քո աջը տնկեց,

որդին, որին Քո համար հզոր դարձրեցիր.

¹⁷ովքեր այն քանդեցին ու այրեցին,

մեռնելու են երեսիդ սպառնալիքի ներքո:

¹⁸Ձեռքդ թող լինի աջ կողմիդ մարդու վրա,

մարդու որդու վրա, որին Քո համար հզոր դարձրեցիր.

¹⁹այլևս երբեք չենք հեռանալու Քեզնից,

վերապրեցրու մեզ և կկանչենք Քո Անունը:

²⁰Տեր, տիեզերքի Աստված, վերադարձրու մեզ,

հայտնիր Դեմքդ և կփրկվենք:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։