Սաղմոս 86 [85] - Պարզ սիրտ պարգևիր ինձ

Ա Ա Ա

Այս սաղմոսի մեջ մեզ տպավորում է սաղմոսերգուի հանդարտ ու հավասարակշռված ձայներանգը, որն Աստծուն դիմելու համար գրեթե բացարձակ կերպով գործածում է «Տեր» տիտղոսը:

Այս սաղմոսում գտնում ենք հոգևոր ներանձնական իրավիճակներ ու դիրքորոշումներ, որոնց փորձառությունը մենք նույնպես անկասկած ունեցել ենք. տրտմության ու թախիծի պահին արտասանված մի հրաբորբոք աղերսանք, որին սակայն զորավիգ է կանգնում համոզմունքը, որ Տերը բարի է. մի խոր վստահություն, որ վերածվում է բերկրալի օրհնության. կյանքի ընթացքը շարունակելու համար հարկավոր ուժը Աստծո մեջ գտնելու վստահությունը:

Քրիստոնյաների աղոթքը նույնպես պետք է հոգու անդորրի մեջ լինի, քանի որ նրանք չեն վախենում նրանցից, ովքեր միայն մարմինը կարող են սպանել (Մտթ 10, 28): Քրիստոնյան պետք է ընդունակ լինի գոհություն մատուցելու նաև դժվարությունների մեջ հայտնված ժամանակ, արդարության մեջ հարատևելու՝ հակառակ կրած հալածանքներին, և աղոթելու նրանց համար, ովքեր հալածում են իրեն (Մտթ 5, 11-12.44):

Պողոս Առաքյալը նեղությունների ժամին Աստծո մխիթարության փորձառությունն է ունեցել և ապրել է խաղաղությամբ (2Կր 1, 3-11): Մեզ արդեն տրվել է Աստծո «բարյացակամության նշանը», որը սաղմոսերգուն խնդրում է: Այդ նշանը հարուցյալ Հիսուսն է (Մտթ 12, 38-40; 16, 4), որը Հոր սիրո և ողորմության լիակատար ու վերջնական հայտնությունն է:

Կցորդ.		Օրհնյալ է Աստված և Հայրը մեր Տեր Հիսուս Քրիստոսի, որ մխիթարում է մեզ մեր բոլոր նեղություններում (հմմտ. 2Կր 1, 3-4):
կամ.		Ես մահացել էի, բայց այժմ ապրում եմ հավետ, և ունեմ մահվան ու դժոխքի բանալիները (հմմտ. Հյտ 1, 18):

¹Աղոթք: Դավթի:

Ականջ դիր, Տեր, պատասխանիր ինձ,

որովհետև աղքատ եմ ես ու խեղճ.

²պաշտպանիր ինձ, Աստված իմ, հավատարիմ եմ,

փրկիր ծառայիդ, որ հավատում է Քեզ:

³Ողորմիր ինձ, ո՜վ Տեր,

դեպի Քեզ եմ աղաղակում ողջ օրը.

⁴ուրախացրու ծառայիդ գոյությունը,

Քեզ եմ ընծայում, Տեր, իմ կյանքը:

⁵Դու բարի ես, Տեր, և ընդունակ ես ներելու,

ով կանչում է Քեզ, նրա համար լի ես սիրով.

⁶լսիր իմ աղոթքը, Տեր,

ուշադիր եղիր աղաչանքներիս ձայնին:

⁷Տրտմությանս օրը աղաղակում եմ Քեզ,

վստահ եմ, կպատասխանես ինձ, Տեր.

⁸քանի որ աստվածների մեջ ոչ ոք Քեզ նման չէ

և ոչինչ հավասար չէ Քո արարքներին:

⁹Ժողովուրդները, որ կազմավորեցիր, Տեր Աստված,

գալու են՝ պաշտելու Քո երեսը.

ճանաչելու են Անվանդ փառքը,

¹⁰որովհետև միայն Դու ես մեծ

և գործում ես հրաշքներ:

¹¹Սովորեցրու ինձ, Տեր, Քո ճանապարհը,

կկարողանամ քայլել ճշմարտությանդ մեջ.

պարգևիր ինձ մի պարզ սիրտ,

որ երկնչի Անունիցդ:

¹²Երախտագիտություն եմ հայտնում Քեզ,

Տեր իմ Աստված, ամբողջ սրտով,

հավետ փառավորելու եմ Անունդ.

¹³մեծ է Քո սերը իմ հանդեպ,

կխլես ինձ դժոխքի խորքերից:

¹⁴Ո՜վ Աստված, գոռոզ անձինք հարձակվում են վրաս,

բռնավորների մի ոհմակ դավում է ինձ,

Քեզ ոչնչով հաշվի չեն առնում:

¹⁵Բայց Դու, Տեր, ողորմած և կարեկցող Աստված,

դանդաղ՝ բարկության մեջ,

մեծ՝ սիրով ու հավատարմությամբ,

¹⁶դարձիր դեպի ինձ և ողորմիր ինձ,

և ծառայիդ պարգևիր Քո ուժը:

Փրկիր աղախնուդ որդուն,

¹⁷բարության մի նշան դարձրու ինձ.

թշնամիներս, ստորացած, կտեսնեն,

որ Դու, Տեր, օգնում և մխիթարում ես ինձ:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։