Սաղմոս 89.1 - Գտա Դավթին՝ Իմ ծառային

Ա Ա Ա

Կցորդ.		Մենք սովորել ենք օրենքից, որ Քրիստոսը մնում է հավետ (Հվհ 12, 34):
կամ.		Խոստման համաձայն, Դավթի սերնդից Աստված Իսրայելի համար հարուցեց մի փրկիչ. Հիսուսը (հմմտ. Գրծ 13, 23):
կամ.		Աստված նրան տալու է Դավթի՝ իր հոր գահը, և նրա թագավորությունը վախճան չի ունենալու երբեք (հմմտ. Ղկս 1, 32-33):

²Հավիտյան երգելու եմ Տիրոջ սերը,

սերնդից սերունդ ավետարանելու եմ Քո հավատարմությունը.

³և ասում եմ. «Մի հավիտենական սեր է,

հավատարմությունդ երկնքից առավել հաստատուն է»:

⁴«Մի դաշինք կնքեցի Իմ ընտրյալի հետ,

երդում տվեցի Դավթին՝ Իմ ծառային.

⁵Ընդմիշտ կհաստատեմ քո սերունդը,

կպատրաստեմ քեզ մի գահ, որ տևի հավետ»:

***

⁶Երկինքը երգում է Քո հրաշքը, Տեր,

սրբերի հավաքը մեծարում է Քո հավատարմությունը.

⁷ո՞վ է հավասար Տիրոջը երկնքում,

ո՞վ է նման Տիրոջը աստվածների մեջ:

⁸Աստված փառավորված է սրբերի հավաքում,

մեծ և ահարկու է նրանց մեջ, ովքեր շրջապատում են Իրեն.

⁹ո՞վ է Քեզ նման, տիեզերքի Տեր Աստված,

հավատարմությամբ գոտեպնդված, քանի՜ցս հզոր ես, Տեր:

¹⁰Դու իշխում ես ծովի հպարտությանը

և հանդարտեցնում ես նրա փոթորկալի ալիքները.

¹¹Դու ոտնակոխ ես անում Ռահաբին պարտվածի նման,

հզոր բազուկով ցիրուցան ես անում թշնամիներին:

¹²Քեզ են պատկանում երկինքն ու երկիրը,

աշխարհը և նրա լիությունը, որ կազմավորեցիր.

¹³հյուսիսն ու հարավը, որ Դու ստեղծեցիր,

Թաբորն ու Հերմոնը ցնծում են Քո Անվամբ:

¹⁴Այո՛, բազուկդ հզոր է,

ուժեղ է ձեռքդ, Քո աջը՝ վեհ.

¹⁵արդարությունն ու իրավունքը գահիդ հենարաններն են,

շնորհն ու ճշմարտությունը քայլում են Քո առջևից:

¹⁶Երանի՜ ժողովրդին, որ ճանաչում է Քո գովքը

և քայլում է երեսիդ լույսի ներքո.

¹⁷ամբողջ օրը ցնծում է Անվամբդ,

պարծենում է արդարությամբդ, Տեր:

¹⁸Դու ես մեր զորության պայծառությունը,

սիրույդ համաձայն՝ ավելացրու մեր կորովը.

¹⁹այո՛, Տիրոջն է մեր վահանը,

մեր Մեսիա Թագավորը՝ Իսրայելի Սրբինը:

***

²⁰Մի ժամանակ խոսեցիր Քո մտերիմներին,

տեսիլքի մեջ ասացիր նրանց.

«Բարեհաճությունս շնորհել եմ մի ընտրյալի,

ժողովրդի մեջ բարձրացրել եմ մի պատանի:

²¹Գտա Դավթին՝ Իմ ծառային,

սրբության յուղովս օծեցի նրան.

²²ձեռքս միշտ լինելու է նրա հետ,

բազուկս լինելու է նրա ուժը:

²³Թշնամին չի կարողանալու խաբել նրան,

նրան չի խոնարհեցնելու այլասերված մարդը.

²⁴կհարվածեմ իր հակառակորդներին իր առաջ,

կհարձակվեմ նրան ատողների վրա:

²⁵Հավատարմությունս և սերս իր հետ են,

Անունս կավելացնի նրա կորովը.

²⁶կտարածեմ նրա ձեռքը մինչև ծովը,

մինչև Գետը կհասնի նրա աջը:

²⁷Ինձ կանչելու է. “Դու իմ Հայրն ես,

իմ Աստվածը և ժայռն իմ փրկության”.

²⁸նրան կկարգեմ որպես իմ առաջնեկը,

բարձրագույնը՝ երկրի թագավորների մեջ:

²⁹Հավիտյան կպահեմ նրան իմ սերը,

իր հետ կնքած դաշինքս չի լուծարվի երբեք.

³⁰հավիտյան կհաստատեմ իր որդուն,

նրա գահը կտևի որքան երկինքը:

³¹Եթե իր զավակները կլքեն իմ օրենքը,

չպահպանելով իմ վճիռները.

³²եթե կխզեն իմ կամքը,

պղծելով իմ պատվիրանները.

³³գավազանով կայցելեմ նրանց հանցանքին,

աղետներով՝ նրանց մեղքին:

³⁴Բայց իրենից չեմ հեռացնի իմ սերը,

չեմ դավաճանի իմ հավատարմությանը.

³⁵չեմ ջնջի իմ դաշինքը,

չեմ փոխի իմ շուրթերի խոստումը.

³⁶սրբությանս մեջ երդվեցի մեկընդմիշտ,

այս իսկ պատճառով, չեմ ստի Դավթին:

³⁷Նրա որդին մնալու է հավետ,

նրա գահն Իմ առջև՝ ինչպես արևը.

³⁸ինչպես լուսինը, հավիտյան հաստատված

երկնքում, հավատարմության վկա»:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։