Սաղմոս 96 [95] - Տերը գալիս է դատելու երկիրը

Ա Ա Ա

Այս սաղմոսում, ինչպես 98րդ սաղմոսում նույնպես, Տիրոջը փառաբանելու կոչն ուղղված է ո՛չ միայն աշխարհի բոլոր ժողովուրդներին, այլ նաև ամբողջ արարչությանը. երկնքին, երկրին, ծովին, դաշտերին, անտառի ծառերին:

Տիրոջ գալստյան ավետումը որպես աշխարհի դատավոր և փրկիչ. սա՛ է բոլոր ժողովուրդների առաջ բացված Աստծո Արքայության բարի լուրը: Այսպես է այն քարոզում Հիսուսը (Մրկ 1, 14-15):

«Նոր երգ»ը, որին ակնարկում են երկու սաղմոսները, թերևս հայրենիք վերադարձողների երգն է բաբելոնյան աքսորի տառապանքներից հետո:

Պողոս Առաքյալը հաստատում է, որ «հին իրողություններն անցել են և ծնվել են նորերը», և որ «եթե մեկը Քրիստոսի մեջ է, նոր արարած է» (2Կր 5, 17): Սպասելով այն օրվան, երբ կկարողանանք հավիտյան երգել «Մովսեսի երգն ու Գառան երգը» (Հյտ 15, 3-4), պետք է ջանանք եղանակել Արքայության գալստյան «նոր երգ»ը: Քրիստոսի սիրով նորոգված մեր կյանքը նշան կլինի բոլորի համար (Հվհ 13, 35):

Տիեզերական այս ուրախ օրհներգը մնում է միշտ նոր, Ինքնին Աստծո իսկ նորությամբ. Նոր Կտակարանն այս սաղմոսի վերջին տողերն է գործածում ավետելու համար Քրիստոսի երկրորդ գալուստը դատաստանի օրը, երբ Նա նորոգելու է գոյություն ունեցող ամեն բան (Գրծ 17, 31; Հյտ 19, 11):

Կցորդ.		Ինձ տրվել է շնորհը՝ ժողովուրդներին ավետարանելու Քրիստոսի հարստությունները (հմմտ. Եփս 3, 8):
կամ.		Նրանք մի նոր երգ էին երգում Գառան գահի առաջ (հմմտ. Հյտ 14, 3):
կամ.		Ինձ է տրվել ամեն իշխանություն երկնքում և երկրի վրա: Գնացե՛ք, ուրեմն, և աշակերտ դարձրեք բոլոր ժողովուրդներին (հմմտ. Մտթ 28, 18-19):
կամ.		Աստված հաստատել է մի օր, որում դատելու է աշխարհն արդարությամբ (հմմտ. Գրծ 17, 31):

¹Նոր երգ երգեցեք Տիրոջը,

երգեցեք Տիրոջը, երկրներ բոլոր,

²երգեցեք Տիրոջը և օրհնեցեք Նրա Անունը:

Օրըստօրե ավետարանեցեք Նրա պարգևած փրկությունը,

³հեթանոսների մեջ պատմեցեք Նրա փառքը,

բոլոր ժողովուրդների մեջ՝ Նրա սքանչելիքները:

⁴Տերը մեծ է և արժանի է ամեն տեսակ գովքի,

ահարկու է աստվածներից գերիվեր,

⁵ոչնչություն են հեթանոսների աստվածները:

Տերը սփռեց տարածեց երկինքը,

⁶Նրա առջև պայծառություն և մեծվայելչություն,

Նրա Սրբավայրում՝ զորություն և գեղեցկություն:

⁷Մատուցեք Տիրոջը, ժողովուրդների ընտանիքներ,

մատուցեք Տիրոջը փառք և զորություն,

⁸մատուցեք Տիրոջն Իր Անվան փառքը:

Բերեք ընծաներ, մտեք Նրա օթևանից ներս,

⁹երկրպագեցեք Տիրոջը Սրբավայրի փառահեղության մեջ,

դողացեք Նրա առաջ, երկրներ բոլոր:

¹⁰Ասացեք հեթանոսների մեջ. «Տերը թագավորում է».

աշխարհն հաստատուն է և չի սասանվում,

Նա ուղղությամբ կառավարում է ժողովուրդներին:

¹¹Ուրախություն երկնքում, թող ցնծա երկիրը,

թող զվարճանա ծովը և ինչ որ նրանում պարունակված է,

¹²թող բերկրեն դաշտերը և իրենց լիությունը:

Անտառի ծառերը թող պարեն զվարթությամբ,

¹³երեսի առաջ Տիրոջ, որ գալիս է,

որ գալիս է դատելու երկիրը:

Դատելու է աշխարհն արդարությամբ

և ժողովուրդներին Իր ճշմարտությամբ:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։