10-12. Թե ինչո՛ւ է Հիսուսը առակներով խոսում

4, 10 - «Նրա շուրջը եղողները». Այսինքն՝ Հիսուսին ավելի մոտիկից հետևողները, որոնք մաս չեն կազմում Տասներկու Առաքյալների խմբին, բայց նաև ամբոխից առանձնանում են Հիսուսի նկատմամբ ավելի լուրջ ու մտերիմ դիրքորոշմամբ: – Տե՛ս նաև Մտթ 13, 9⁺-ի առաջին մասը:

 

4, 11 - «Ձե՛զ է տրված Աստծո արքայության խորհուրդը». Որոշ ձեռագրեր Մարկոսի այս տողը փոխում են՝ հարմարեցնելով Մատթեոսի հետ (13, 11): Գրաբարը նույնպես. «Ձեզ տուեալ է գիտել զխորհուրդս արքայութեան Աստուծոյ»։ Մարկոսի մտքում, մինչդեռ, ո՛չ թե խորհուրդների իմացությունն է (հոգնակի թվով. «μυστήρια» - «միստեռիա»), այլ՝ Աստծո արքայության խորհրդի (եզակի թվով. «μυστήριον» - «միստեռիոն») ունենալը, տիրապետելը, դրա տնօրինումը, մատակարարումը: Այս համատեքստում, «Ձե՛զ է տրված» խոսքը ստանում է «ձե՛զ է ավանդված, ձե՛զ է փոխանցված, ձե՛զ է հանձնված, ձե՛զ է վստահված» իմաստը: ꟷ

- «μυστήριον» - «միստեռիոն» - «խորհուրդ» եզրով Նոր Կտակարանում հասկացվում են աստվածային գաղտնածածուկ ճշմարտությունները, որոնք մի ժամանակ թաքնված էին, բայց այժմ բացահայտվում են Ավետարանում, Հիսուս Քրիստոսի անձի, խոսքերի ու գործերի մեջ: Քրիստոնեական խորհուրդներ ասելով հասկացվում են Քրիստոնեական Հավատքի այն կետերը, որոնք չափազանց բարձր են մարդկային մտքի համար և հիմնվում են միմիայն Հարուցյալ Քրիստոսի աստվածային հեղինակության վրա: Ուստի, «խորհուրդը» ո՛չ թե անճանաչելի բան է, այլ՝ մարդու կողմից ճանաչվելու համար կարիքն ունի Աստծո կողմից տրված հայտնության: ꟷ

- «ովքեր դրսում են». ''Դրսում'' գտնվողները հակապատկերն են Հիսուսի «շուրջը եղողների», որոնց մասին խոսվել էր նախորդ տողում: – Տե՛ս նաև Մտթ 13, 11-13⁺: