13-16. Հիսուսն օրհնում է մանուկներին

10, 13 - «մոտեցնում». Հուն. «προσέφερον» - «պռոսեֆեռոն». Այն բայն է, որ գործածվում է ընծաների մատուցման համար (հմմտ. Մտթ 2, 11; 5, 23; Մրկ 1, 44; և այլն): Գրաբար. «մատուցանէին»։ ꟷ

- «հպվեր». Հուն. «ἅπτομαι» - «հապտոմայ» բայը նշանակում է հպվելով փոխել, հպվելով ազդել, հպվել ինչ որ մեկի կամ ինչ որ մի բանի այնպես, որ կոնկրետ արդյունք գրանցվի: Հիսուսի մարմնական հպումով, այսինքն, ակնկալում էին շնորհաբեր օրհնություն իրենց զավակների համար: ꟷ

- «նրանց». Այսինքն՝ երեխաներին: Մանկահասակ երեխաների ներկայությունն անկասկած աղմուկ ու իրարանցում է ստեղծել Հիսուսի շուրջը, ինչը որ հարգանքի պակաս է թվացել աշակերտներին, որոնք շարունակում էին տակավին կառչած մնալ Մեսսիայի վերաբերյալ հրեական պատկերացումներից: – Որոշ ձեռագրեր, թերևս տեսարանը որոշ չափով մեղմելու նպատակով, ավելացնում են. «ովքեր մոտեցնում էին»: Այսպիսով, աշակերտների կոշտ վարմունքը երեխաներից տեղափոխվում է նրանց ծնողների հանդեպ: Գրաբարը նույնպես այսպես է. «այնոցիկ որ մատուցանէինն»։ Թեև ճիշտ է նաև, որ հունարեն բնագրի կառուցվածքն այնպիսին է, որ միանշանակ չի հասկացվում, թե աշակերտների դիտողությունները կոնկրետ ո՛ւմ էին ուղղված: Ուստի այդ հավելումը կարող է նաև պարզապես հստակություն մտցնելու փորձ նկատվել:

 

10, 14 - «մանուկներին». Տե՛ս Մտթ 18, 3⁺: ꟷ

- «արգելք». Հուն. «κωλύετε» - «կօլյուէտէ». Նշանակում է ո՛չ միայն խոսքով արգելել, այլ՝ որևիցէ կերպ խոչընդոտել, խանգարել ընթացքը, ճանապարհը փակել: Այս խոսքը կարող է յուրահատուկ իմաստներ ստանալ, եթե հաշվի առնենք, որ դրված է այն դրվագից անմիջապես հետո, ուր Հիսուսը միանշանակ կերպով արգելել էր ամուսնալուծությունը։