14-21. Փարիսեցիների ու Հերովդեսի թթխմորը

8, 15 - «թթխմոր». Հուն. «ζύμη» - «զյումէ». Տե՛ս Մտթ 13, 33⁺-ի երկրորդ մասը: ꟷ

- «Հերովդեսի». Տե՛ս Մտթ 16, 6⁺ և 16, 12⁺:

 

8, 17 - «Անզգայացա՞ծ են ձեր սրտերը». Տե՛ս 6, 52 և 6, 52⁺: – Բառացի՝ Քարացա՞ծ ունեք ձեր սիրտը: Գրաբար. «ապշութի՞ւն ունի զսիրտս ձեր»։

 

8, 18 - Հիսուսը աշակերտներին է ուղղում – այս անգամ հարցական ձևով – այն խոսքերը, որոնք 4, 11-12 հատվածում արտասանել էր նրանց վերաբերյալ, «ովքեր դրսում են»:

 

8, 19-21 - Հակառակ այն բանի, որ մոտիկից մասնակցել էին Հիսուսի ձեռամբ կատարված հրաշքներին, աշակերտները շարունակում են չհասկանալ, մանավանդ այն պահերին, երբ իրենք անձամբ ինչ որ մի կարիքի մեջ են հայտնվում (8, 14.16): Մանավանդ թե, նման դեպքերում թվում է, թե միշտ ավելի նվազ ու նվազ են հասկանում, դժվարանում են ուրիշներին քարոզված ճշմարտությունները կիրառել իրենց սեփական կյանքում, իրենց սեփական փորձառության մեջ: Եվ, ինչպես ասել էր փարիսեցիների վերաբերյալ (3, 5), Հիսուսն Իր աշակերտներին ևս հանդիմանում է «անզգայացած սիրտ» ունենալու համար (8, 17), այս առիթով գործածելով միևնույն բառապաշարը և՛ մտերիմների (աշակերտների), և՛ ընդդիմադիրների (փարիսեցիների) նկատմամբ: Վերջում տրվող հարցը, որ մեծապես ամաչեցնող է Հիսուսի (հին ու նոր) աշակերտների համար, վերամփոփում է ամբողջ հատվածի կենտրոնական գաղափարը. աշակերտները, Հիսուսի հետ սերտ հարաբերության մեջ լինելով հանդերձ, շատ անգամներ դժվարանում են ''տեսնել'', հասկանալ և ուղիղ մեկնաբանություն տալ իրականություններին, որոնց մասնակցում են: Ինչպես այն ժամանակ, այնպես էլ միշտ, և այսօր ևս:

 

8, 21 - Ձեռագրերի մի խումբ, Մարկոսի այս տողը Մտթ 16, 11 տողի հետ նույնացնելու նպատակով, գրում է. «Ուրեմն ինչպե՞ս չեք հասկանում»: Գրաբարը ևս. «Իսկ զիա՞րդ ոչ իմանայք»։