23-27. Հարստությունների վտանգը

→ Մտթ 19, 23-26; Ղկս 18, 24-27;  ⁓ Մրկ 4, 19

≈ 1Տմ 6, 17; Ծնդ 18, 14; Սղմ 62, 11; Զքր 8, 6-7

 

²³Եվ շուրջբոլորը նայելով՝ Հիսուսն ասաց Իր աշակերտներին. «Որքա՜ն դժվարությամբ նրանք, ովքեր հարստություններ ունեն, կմտնեն Աստծո արքայություն»: ²⁴Աշակերտներն ապշած մնացին Նրա խոսքերի վրա, բայց Հիսուսը հավելեց՝ ասելով նրանց. «Որդյակներ, որքա՜ն դժվարին է մտնել Աստծո արքայություն: ²⁵Ավելի դյուրին է, որ ուղտը ասեղի ծակի միջով անցնի, քան թե հարուստը Աստծո արքայություն մտնի»: ²⁶Նրանք, է՛լ ավելի ապշած, միմյանց ասում էին. «Ուրեմն ո՞վ կարող է փրկվել»: ²⁷Նայելով նրանց, Հիսուսն ասաց. «Մարդկանց համար անհնարին է, բայց ո՛չ Աստծո համար: Արդարև, Աստծո համար ամեն ինչ հնարավոր է»: