24-27. Մարդու Որդու բացահայտ գալուստը

Ա Ա Ա

→ Մտթ 24, 29-31; Ղկս 21, 25-27

≈ Մտթ 8, 20; 13, 41; 2Օր 30, 3-4; Ես 13, 10; 34, 4; Դն 7, 13-14; Զքր 2, 6.10-17

²⁴Բայց այդ օրերին, այդ նեղությունից հետո,

արևը խավարելու է,

և լուսինն այլևս չի տալու իր լույսը,

²⁵և աստղերն ընկնելու են երկնքից

և երկնային զորությունները ցնցվելու են:

²⁶Եվ ապա տեսնելու են Մարդու Որդուն, որ ամպերի վրայով գալիս է մեծ զորությամբ ու փառքով: ²⁷Եվ այդ ժամանակ Նա ուղարկելու է Իր հրեշտակներին, և Իր ընտրյալներին հավաքելու է աշխարհի չորս կողմերից, երկրի ծագերից մինչև երկնքի ծագերը:

13, 26 - Հիսուսի վերադարձը կատարվելու է «ամպերի վրայով», որոնք խորհրդապատկերն են Աստծո ներկայության (հմմտ. Ել 34, 5; Ղևտ 16, 2; Թց 11, 25; 1Թգ 8, 10-11), բացահայտ ցուցադրությունը Նրա զորության ու Նրա փառքի: – Տե՛ս նաև Մտթ 24, 30⁺-ի չորրորդ մասը:

13, 27 - Աստվածաշնչյան տարբեր տարրեր միավորելով (հմմտ. 2Օր 13, 7; 30, 4; Զքր 2, 6), այս տողը հիշեցնում է Մովսեսին տրված խոստումը՝ ըստ 2Օր 30, 3-4 հատվածի: Հիսուսն է, որ ի կատար է ածելու Աստծո զավակների վերամիավորման այդ գործը:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։