43-52. Հիսուսի ձերբակալությունը

Ա Ա Ա

→ Մտթ 26, 47-56; Ղկս 22, 47-53; Հվհ 18, 2-11

≈ Հվհ 16, 32; Ամս 2, 16

⁴³Եվ իսկույն, մինչ Նա դեռ խոսում էր, եկավ Հուդան՝ Տասներկուսից մեկը, և նրա հետ՝ քահանայապետների ու օրենսգետների ու ժողովրդի ավագների կողմից ուղարկված և սրերով ու մահակներով զինված մի մեծ ամբոխ: ⁴⁴Դավաճանը նրանց նշան էր տվել՝ ասելով. «Ո՛ւմ որ համբուրեմ, նա՛ է. բռնեցե՛ք նրան և տարե՛ք զգուշությամբ»: ⁴⁵Եվ գալով, իսկույն մոտենալով Նրան, ասաց. «Ռաբբի՜», և համբուրեց Նրան: ⁴⁶Եվ նրանք ձեռքերը Նրա վրա դրեցին ու բռնեցին Նրան: ⁴⁷Նրա կողքին կանգնածներից մեկն այդ պահին սուրը դուրս քաշելով՝ քահանայապետի ծառային հարվածեց ու նրա ականջը կտրեց: ⁴⁸Այնժամ խոսքը նրանց ուղղելով՝ Հիսուսն ասաց. «Ինձ բռնելու համար սրերով ու մահակներով եք դուրս ելել, կարծես ավազակի դեմ: ⁴⁹Ամեն օր ձեր մոտ տաճարում էի՝ ուսուցանելով, և չբռնեցիք ինձ: Բայց այսպես եղավ, որպեսզի Գրվածքները կատարվեին»:

⁵⁰Այդ ժամանակ բոլորը, Նրան լքելով, փախան: ⁵¹Մի պատանի, սակայն, հետևում էր Նրան, իր մերկ մարմնի վրա վուշե սավան գցած. և բռնեցին նրան: ⁵²Բայց նա սավանը թողնելով՝ մերկ փախավ:

14, 43-52 - Այս հատվածի որոշ մանրամասնությունների և գործածված եզրերի իմաստի համար՝ տե՛ս Մտթ 26, 47-56⁺:

14, 47 - «կողքին կանգնածներից մեկն». Սուրը դուրս քաշողի ու քահանայապետի ծառային հարվածողի ինքնությունը ծածուկ է մնում նաև Մատթեոսի (26, 51) և Ղուկասի (22, 50) Ավետարաններում: Հովհաննեսն է իր Ավետարանում (18, 10) հայտնում, որ դա եղել է Պետրոսը: ꟷ

- «ականջը կտրեց». Պետրոսի դիտավորությունը, վստահաբար, Հիսուսին ձերբակալելու եկածի միայն ականջը կտրելը չի եղել: Ականջն է կտրել՝ վրիպելով:

14, 49 - «Գրվածքները». Որոշ ձեռագրեր ավելացնում են. «մարգարեների»: Գրաբարը ևս. «գիրք մարգարէիցն»։ ꟷ

- Հունարեն բնագրի կառուցվածքն այնպիսին է, որ այս տողը հնարավոր է թարգմանել նաև որպես մաղթանք. «Թող որ կատարվեն, ուրեմն, Գրվածքները»:

14, 51-52 - «Մի պատանի». Սա միայն Մարկոսի Ավետարանին բնորոշ հատված է: Մի հնագույն ավանդության համաձայն, պատանին, որի մասին խոսվում է այստեղ, հենց ինքը՝ Մարկոսն է: ꟷ

- «մերկ». Հուն. «γυμνός» - «գյումնոս». Հարաբերական իմաստով՝ թեթև հագնված, միայն ներքնազգեստով: Տե՛ս նաև Հվհ 21, 7⁺-ի երկրորդ մասը: ꟷ

- «վուշե սավան». Հուն. «σινδών» - «սինդօն». Նույն եզրն է, որ գործածվում է Հիսուսի թաղման սավանը մատնանշելու համար: Տե՛ս Մտթ 27, 59-60⁺: Գրաբարը. «կտաւ մի»։ ꟷ

- «և բռնեցին նրան». Որոշ ձեռագրեր ավելացնում են. «երիտասարդները»: Գրաբարը ևս. «ունէին զնա երիտասարդքն»։

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։