3. - Արարչի և հայտնության միությունը (Իրենեուս Լուգդունացի)
-
01
-
-
02
-
-
03
-
-
04
-
-
05
-
[...] Եթե Արարիչը – և միայն սա՛ է ճիշտ – ինքնուրույն է տնօրինել և կատարելագործել բոլոր գոյությունները, քանի որ Նրա կամքի մեջ է բովանդակված բոլոր գոյությունների էությունը, ապա պարզ է, որ Նա է ամեն ինչի ճշմարիտ, ամենակալ Արարիչ Աստվածը, բոլոր տեսանելի ու անտեսանելի, զգալի և ո՛չ զգալի, երկնային ու երկրային իրականությունների Հայրը և Ստեղծողը: Իր զորության խոսքով Նա ամեն ինչ կազմում է, և ամեն ինչ կարգավորել է Իր իմաստությամբ. ամեն ինչ բովանդակում է, և ոչնչի կողմից բովանդակված չէ. արտադրողը, հիմնադիրը, հայտնագործողը, Արարիչը և Տերն է ամեն ինչի. Նրանից դուրս և Նրանից վեր չկա ո՛չ մի ա՛յլ Աստված։ [...]
Միայն մեկն է, ուրեմն, Արարիչ Աստվածը, Ով վեր է բոլոր Պետություններից ու Իշխանություններից, Տերություններից ու Զորություններից(1). Նա Հայր է, Աստված, Հիմնադիր, Արարիչ և Հեղինակ. Նա ինքնուրույն ստեղծեց բոլոր գոյությունները, այսինքն՝ Իր Խոսքի և Իր Իմաստության միջոցով, երկինքն ու երկիրը, ծովերը և այն ամենը, ինչ նրանց մեջ է: Նա արդար է և բարի. արարեց մարդուն, տնկեց դրախտը, կառուցեց աշխարհը, ուղարկեց ջրհեղեղը և փրկեց Նոյին: Նա Աբրահամի Աստվածն է, Իսահակի Աստվածը և Հակոբի Աստվածը. ողջերի Աստվածը, որ կանխավ ավետվել էր Օրենքի, խոստացվել` Մարգարեների, հայտնվել` Քրիստոսի, քարոզվել` Առաքյալների, հավատք ստացել` Եկեղեցու կողմից: Նա մեր Տեր Հիսուս Քրիստոսի Հայրն է. Նրա` Իր Բանի(2) և Իր Որդու միջոցով, Նա հայտնվում և բացահայտվում է բոլոր նրանց, ովքեր լսում են Նրան. արդարև, Նրան ճանաչում են միայն նրանք, ում Որդին հայտնում է: Որդին, Ով հավիտենապես գոյակից է Հորը, Նրան շարունակաբար հայտնում է Հրեշտակներին, Հրեշտակապետերին, Իշխանություններին, և բոլոր նրանց, ում Աստված կամենում է հայտնվել: [...]
Սբ. Իրենեուս Լուգդունացի (130-202), « Ընդդեմ հերետիկոսությունների », 2, 30.9.
