Բացառիկ խորհուրդներ են կատարվում Աստծո լռության մեջ
ԺԹ. – 1. Այս աշխարհի իշխանին[1] անհայտ մնացին Մարիամի կուսությունը, ինչպես նաև նրա ծննդաբերությունը և, նմանապես, նաև Տիրոջ մահը: Երեք բացառիկ խորհուրդներ, որ կատարվեցին Աստծո լռության մեջ[2]:
2. Ուրեմն ինչպե՞ս հայտնի դարձվեցին աշխարհին: Մի աստղ փայլեց երկնքում, առավել լուսավոր, քան մյուս բոլորը: Նրա լույսն անճառելի էր և նրա նորությունը զարմանք առաջացրեց: Մյուս բոլոր աստղերը, արևի ու լուսնի հետ, խմբվեցին այդ աստղի շուրջը: Նա, սակայն, իր պայծառությամբ գերազանցում էր մյուս բոլոր աստղերին: Եվ բոլորը սաստիկ հուզմունքով հարցնում էին, թե արդյոք որտեղի՞ց է այդ նորությունը, որ այդքա՜ն տարբեր է իրենցից[3]:
3. Այդ պահից սկսած խափանվում էին մոգությունները և խզվում էին չարության կապերը: Աստված մարդկային կերպարանքով հայտնվելով, որպեսզի մարդուն պարգևի հավիտենական կյանքի նորությունը, ջնջվում էր անգիտությունը և կործանվում էր հին թագավորությունը: Սկիզբ էր առնում այն, ինչն Աստված նախապատրաստել էր. դրա պատճառով ամեն բան արմատապես փոխվեց, քանի որ նախապատրաստվում էր մահվան վերացումը:
