Սրտացավ եղիր միության հարցին

Ա. – 1. Մինչ վավերացնում եմ Աստծո մեջ բարի տրամադրվածությունդ, որը կարծես անդրդվելի ժայռի վրա է հաստատված, մեծապես գովաբանում եմ Աստծուն, որ ինձ արժանացրեց տեսնելու քո անբիծ դեմքը: Թող որ ես կարողանամ այն վայելել Աստծո մեջ:

2. Հորդորում եմ քեզ – այն շնորհի զորությամբ, որով զգեստավորվել ես – շարունակել ընթացքդ և խրախուսել բոլորին, որպեսզի փրկվեն: Ե՛վ նյութական, և՛ հոգևոր ամեն տեսակ հոգածությամբ պաշտպանիր զբաղեցրածդ դիրքի բարի անունը: Սրտացավ եղիր միության հարցին, որից ավելի լավ բան չկա: Նեցուկ եղիր բոլորին, ինչպես Տերն էլ նեցուկ է քեզ: Բոլորի հանդեպ համբերատար եղիր, սիրո մեջ, ինչպես արդեն իսկ վարվում ես:

3. Նվիրվիր աղոթքին, անդադար: Այժմ ունեցածիցդ է՛լ ավելի մեծ իմաստություն խնդրիր: Արթուն հոգիով հսկիր: Յուրաքանչյուրի հետ անհատաբար խոսիր, Աստծո օրինակին հետևելով: Կատարյալ մարզիկի նման^[1], քո վրա վերցրու բոլորի հիվանդությունները^[2]. ուր ավելի է ջանքը, ավելի է նաև վաստակը: