«Ռաֆայել» անվանը տրվում է երկու բացատրություն, թեև դրանք միևնույն իմաստն են արտահայտում. առաջին բացատրության համաձայն՝ այն նշանակում է «Աստծուց շնորհված դեղ», իսկ երկրորդի համաձայն՝ «Աստված բժշկում է»:

Ռաֆայել Հրեշտակապետն Աստվածաշնչում հիշատակվում է միայն Տովբիթի գրքում, ուր պատմվում է, թե նա ինչպես է ընկերակցում պատանի Տուբիային նրա ճամփորդության ժամանակ, օգնում է դժվարությունների պահին, բժշկում է նրա սիրելիների հիվանդությունները: Այդպիսով, Ռաֆայելի կերպարն Աստվածաշնչում ներկայանում է որպես ճամփորդող և բժշկող Հրեշտակ, թեև նա մեկն է այն 7 Հրեշտակներից, որոնք կանգնած են Տիրոջ Գահի առաջ և նրան անդադար մատուցում են ամենավառ աղոթքների խունկը (հմմտ. Տվբ 12, 15): Ավանդաբար կարծվում է, թե Ավետարանն ակնարկում է հենց Ռաֆայել Հրեշտակապետին, երբ պատմում է այն Հրեշտակի մասին, որն իջնում է հուզելու Սիլոեի ավազանի ջրերը, որպեսզի հիվանդներն իջնեն այնտեղ և բուժվեն:

Քրիստոնյա ժողովուրդը Սբ. Ռաֆայել Հրեշտակապետին է դիմում հատկապես մարմնի հիվանդություններից Աստծո կամքի համաձայն ապաքինում գտնելու և ընտանիքի անդամների միջև սեր ու խաղաղություն հաստատելու համար: Ներկայումս Ռաֆայել Հրեշտակապետի ծիսական տոնը կատարվում է Սուրբ Միքայելի և Սուրբ Գաբրիելի հետ միասին, մինչ առաջ նրա հատուկ տոնի օրը Հոկտեմբերի 24ն էր:

 

 

 

Ո՜վ Աստված, որ Սուրբ Ռաֆայել Հրեշտակապետին որպես ճանապարհորդակից ընկեր տվեցիր Քո ծառա Տուբիային, խնդրում ենք, որ պարգևես մեզ, քանի որ մենք էլ Քո ծառաներն ենք, Երկնային Արքունիքի այս փառապանծ Իշխանի պաշտպանությունը միշտ վայելելու և նրա օգնականությամբ միշտ զորանալու շնորհը: Մեր Տեր Հիսուս Քրիստոսի Անվամբ և շնորհով: Ամեն: