« ԱՅԴ ԲԱՆԵՐԻՆ Ի ՏԵՍ ԿՓԱՅԼԵՍ ԼՈՒՅՍՈՎ » (Ես 60, 5)

Սբ. Գերթրյուդ Հելֆթացի (1256-1301). « Հոգևոր Վարժանքներ », 7 (SC 127).

[...] Ինչպիսի՜ն է լինելու բերկրանքը, Աստված իմ, ինչպիսի՜ն՝ ցնծությունը, ինչպիսի՜ն՝ խնդությունը, երբ կքողազերծես իմ առաջ պայծառ շողարձակումը Քո Աստվածության, և հոգիս կտեսնի քեզ դեմ առ դեմ։ [...]

Այնժամ, հոգի իմ, «կտեսնես և առատության մեջ կլինես, հիացմունքով կդիտի ու կընդարձակվի սիրտդ, երբ քո վրա կհեղվի բազմությունը հարստությունների», վայելքների ու մեծվայելչության՝ Երրորդության այն անծայրածիր «ծովի» փառքի, որն արժանի է անվերջ պաշտամունքի. երբ «քեզ կգա ազգերի զորությունը», որն «արքաների Արքան ու տերերի Տերը» (Ես 60, 5; 1Տմ 6, 15), Իր ուժեղ աջով, Իր համար փրկագնեց թշնամու ձեռքից. երբ կընկղմվես աստվածային հորդառատ ողորմության ու սիրո մեջ։ [...]

Այնժամ կտրվի քեզ տեսության գավաթը և կարբեցնի քեզ (Սղմ 22, 5 ըստ Վուլգաթայի) Աստվածային Դեմքի փառքի արբեցնող ու վսեմ գավաթը։ Ծարավդ կհագեցնես «աստվածային վայելքների գետակից» (Սղմ 36, 9), երբ Լույսի Ակունքն ինքնին կհագեցնի քեզ Իր լիությամբ ի հավիտյան։

Այնժամ կտեսնես երկինքներն Աստծո փառքով լիուլի լցված, – Աստծո, որ բնակվում է դրանց մեջ, – և այն կուսական Աստղին, ով, Աստծուց հետո, երկինքն ամբողջ լուսավորում է իր մաքրագույն լույսով⁽¹⁾, և նրանց, ովքեր Աստծո մատների զարմանահրաշ գործերն են⁽²⁾, և «առավոտյան աստղերին», որ բազում բերկրանքով միշտ կանգնած են Աստծո ներկայությանը և ծառայում են Նրան⁽³⁾։

Ո՜վ իմ սրտի Աստված և իմ նախասիրյալ ժառանգություն (հմմտ. Սղմ 73, 26), ա՜հ, մինչև ե՞րբ է պապակ մնալու հոգուս իղձը՝ Քո քաղցրագույն Դեմքի ներկայության։ [...] Այնպես արա՛, որ շուտով կարողանամ հասնել Քեզ, ո՜վ Աստված, «աղբյուր կենդանի» (Սղմ 36, 10), որպեսզի կարողանամ Քո մեջ ընդմիշտ հագենալ⁽⁴⁾ հավիտենական կյանքով։ «Շուտո՜վ շողացրու Դեմքդ իմ վրա» (Սղմ 31, 17), որպեսզի կարողանամ ուրախությամբ տեսնել Քեզ դեմ առ դեմ։ Շուտո՜վ, շուտո՜վ տեսնել տուր Քեզ ինձ, որպեսզի երջանիկ՝ վայելեմ Քեզ ընդմիշտ։ [...]