Գլուխ Ա. - Հոդված 1. - Հատված Ա. / դ) Միակ Աստծո հանդեպ հավատքի հետևանքները
222. Աստծուն՝ Միակին հավատալը, և Նրան սեփական ողջ էությամբ սիրելը՝ մեր ամբողջ կյանքի համար ունենում է վիթխարի հետևանքներ.
223. Ճանաչում ենք Աստծո մեծությունն ու վեհությունը. «Ահա՛, Աստված այնքա՜ն մեծ է, որ չենք կարողանում ըմբռնել Նրան» (Հոբ 36, 26)։ Հենց սրա համար Աստված պետք է «առաջինը ծառայություն ընդունի»[1]։
224. Ապրում ենք երախտագիտություն հայտնելով. եթե Աստված Միակն է, ուրեմն այն ամենը, ինչը որ մենք ենք, և այն ամենը, ինչը որ մենք ունենք, գալիս է Իրենից. «Ի՞նչ ունես բնավ, որ չես ստացել» (1Կր 4, 7)։ «Արդյոք ինչպե՞ս կարող եմ հատուցել Տիրոջն այն ամեն ինչի համար, որ տվել է ինձ» (Սղմ 116, 12)։
225. Ճանաչում ենք բոլոր մարդկանց միությունն ու ճշմարիտ արժանապատվությունը. բոլորն էլ ստեղծված են ըստ «Աստծո պատկերի ու նմանության» (Ծնդ 1, 26)։
226. Սկսում ենք ճիշտ գործածել ստեղծված բաները. Միակ Աստծո հանդեպ հավատքը մեզ առաջնորդում է գործածելու Իրենից տարբեր ամեն բան այն չափով, որքանով որ դա մոտեցնում է մեզ Իրեն, և անջատվելու ամեն ինչից այն չափով, որքանով որ դա հեռացնում է մեզ Իրենից[2]։
227. Ինչ էլ որ պատահի, վստահում ենք Աստծուն, նաև նեղությունների դեպքում։ Սբ. Թերեզա Ավիլացու հետևյալ խոսքերը հիանալի կերպով արտահայտում են այս միտքը.
