Երախտիքի ու գովասանքի խոսքեր
Ա. – 1. Աստծո մեջ ընդունեցի ձեր հույժ սիրելի անունը[1]. անուն, որ ձեռք եք բերել ձեր բարեպաշտ նկարագրով, այն հավատքի ու սիրո համաձայն, որոնք հայտնվել են հանձինս Քրիստոս Հիսուսի, մեր Փրկչի: Դուք, իրոք, Աստծուն նմանվողներ էք[2], և Նրա արյան մեջ վերստին արծարծել եք ձեր նկարագրի բնածին գործունեությունը և այն հասցրել եք լիուլի կատարման:
2. Դրա ապացույցն է այն փաստը, որ շտապեցիք այցելել ինձ, հազիվ լսեցիք Ասորիքից ժամանելուս լուրը, շղթայված՝ ընդհանուր Անվան և մեր ընդհանուր հույսի պատճառով[3], և փափաքող – ձեր աղոթքների շնորհիվ – ստանալու Հռոմում գազանների դեմ մարտնչելու շնորհը, որպեսզի այդ շնորհը ստանալով՝ ես կարողանամ լինել հետևորդ[4]:
3. Աստծո անվամբ ընդունեցի, ուստի, ձեր բազմամարդ համայնքը հանձինս Ոնեսիմոսի[5], ձեր տեսանելի Եպիսկոպոսի. մի մարդ, որ սքանչելի է իր գործադրած սիրով: Խնդրում եմ ձեզ սիրել նրան Հիսուս Քրիստոսի համաձայն, և աղերսում եմ ձեզ բոլորիդ՝ նմանվել նրան: Օրհնյալ է Նա, ով ձեզ պարգևել է – և դուք արժանի էիք դրան – ունենալ նման Եպիսկոպոս: