Սաղմոս 15 [14] - Ո՞վ կընդունվի օթևանիցդ ներս

Ա Ա Ա

Այս սաղմոսում պարունակված են տաճար մուտք գործելու ծիսական արարողություններից մեկի խոսքերը: Ուխտավորներն արտասանում են արարողակարգի ծիսական հարցումը: Քահանաները թվարկում են պայմանները, որոնք հարկավոր են Աստծուն արժանապես մերձենալու և Նրան հաճո պաշտամունք մատուցելու համար. դրանք են ճշմարտության սկզբունքներով ապրելը, արդարության համաձայն գործելը և մերձավորների հանդեպ սերը: Օրենքը, Մարգարեներն ու Սաղմոսները (Ղտ 19, 11-18; Միք 6, 6-8; Ես 33, 14-16; Սղմ 23, 49) միաձայն են անկեղծ պաշտամունքի այս պահանջների հարցում: Հիսուսը մեզ տալիս է միևնույն ուսուցումը (Մտթ 5, 23...):

Կցորդ.		Ով կատարում է իմ Հոր կամքը, նա կմտնի երկնքի արքայություն (հմմտ. Մտթ 7, 21):
կամ.		Եթե կամենում ես հավիտենական կյանքը ժառանգել, պահիր պատվիրանները (Մտթ 19, 17):
կամ.		Ով սիրում է իր մերձավորին, լիովին կատարում է օրենքը (Հռմ 13, 8):

¹Սաղմոս: Դավթի:

Տեր, ո՞վ կհյուրընկալվի վրանիցդ ներս,

ո՞վ կբնակվի Սրբությանդ լեռան վրա:

²Նա, ով ընթանում է անբծությամբ,

նա, ով գործում է արդարություն:

Նա, ով ասում է ճշմարտությունը, որ ունի իր սրտում,

³նա, ով իր լեզվով չի վարկաբեկում:

Նա, ով անարդարություն չի անում իր ընկերոջը

և չի ստորացնում իր մերձավորին:

⁴Իր աչքերից հեռացնում է այն, ինչն այլասերված է,

փառավորում է Տիրոջ հավատացյալներին:

Թեև երդվի ի վնաս իր, խոսքը չի փոխում,

⁵շահով դրամ փոխ չի տալիս,

կաշառք չի վերցնում անմեղների դեմ:

Նա, ով գործում է այսպես,

չի սասանվի հավիտյան:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։