Սաղմոս 71 [70] - Մի՛ լքիր ինձ, երբ հասնի ծերությունը

Ա Ա Ա

Իր տարիներն ապրած և ծերությանը հասած տարեց մի մարդ – հավանաբար Տաճարին ծառայող մի դպիր – մի հայացք է նետում իր անցյալի վրա. մանկությունից ի վեր, իր երկարատև կյանքի յուրաքանչյուր օրը կամեցել է հավատարիմ մնալ Տիրոջը և ապրել Նրա հետ մտերմությամբ: Աստծո փառաբանությունն է եղել իր կյանքի ընկերը: Խորապես վստահասիրտ լինելով, նա աղերսում է Աստծուն օգնության հասնել իրեն, որովհետև կամենում է շարունակել փառաբանել Նրան իր բոլոր ուժերով: Նրա աղոթքը նմանվում է Երեմիա Մարգարեի «խոստովանություններին» (Եր 17, 14-18): Հետագայում, այս անձնական աղոթքը վերածվել է հավաքական աղոթքի, Իսրայելի համար: Որպես այդպիսին, մեր անձնական աղոթքներում գործածելուց բացի, մենք այն կարող ենք աղոթել Քրիստոսի Եկեղեցու համար:

Կցորդ.		Ես գիտեմ, թե ում եմ հավատացել: Նա կպահպանի իմ ավանդը մինչև այն օրը (հմմտ. 2Տմ 1, 12):
կամ.		Մենք երանելի ենք հռչակում նրանց, ովքեր հարատևել են (Հկբ 5, 11):
կամ.		Բարի պատերազմը մղեցի, ընթացքս ավարտեցի, հավատքս պահպանեցի (2Տմ 4, 7):
կամ.		Ով մինչև վերջ կհարատևի, նա կփրկվի (Մտթ 24, 13):
կամ.		Տերը կերպարանափոխելու է մեր թշվառության մարմինը, կերպարանակից դարձնելու համար Իր փառավոր մարմնին (հմմտ. Փլպ 3, 21):
կամ.		Ամենակարողը մեծ գործեր կատարեց ինձնում, և Սուրբ է Նրա Անունը (Ղկս 1, 49):

¹Քեզ եմ ապավինում, Տեր,

թող ընդմիշտ ամոթով չմնամ.

²արդարությանդ համաձայն՝ ազատիր ինձ և պաշտպանիր,

մոտեցրու ինձ ականջդ և փրկիր ինձ:

³Եղիր իմ համար մի վեմ, որ ընդունում է ինձ,

մի օթևան միշտ հասանելի.

որոշել ես փրկություն պարգևել ինձ,

Դու ես իմ ժայռն ու իմ ամրոցը:

⁴Ամբարիշտի ձեռքից ազատիր ինձ, Աստված իմ,

այլասերվածի ու բռնավորի գրավումից.

⁵Դու ես, Տեր Աստված, իմ հույսը,

երիտասարդությունիցս ի վեր Դու ես իմ հենարանը:

⁶Մայրական արգանդում արդեն Քեզ էի վստահում,

մորս ծոցում Դու էիր իմ պաշտպանը.

հավիտյան Դու ես լինելու իմ գովքը:

⁷Շատերին մի հրաշք թվացի,

բայց Դու ես իմ օգնությունն ու իմ ուժը.

⁸բերանս լի է Քո գովասանքով,

ամբողջ օրը՝ Քո փառքով.

⁹ծերությունը հասած՝ մի՛ մերժիր ինձ,

երբ պակասում են ուժերը, մի՛ լքիր ինձ:

¹⁰Թշնամիներս խոսում են իմ դեմ,

ովքեր լրտեսում են ինձ, միասին դավադրում են.

¹¹ասում են. «Աստված նրան լքել է, հետապնդեցեք նրան,

շտապեցեք, չունի մեկը, որ ազատի նրան»:

¹²Ո՜վ Աստված, հեռու մի՛ մնա,

Աստված իմ, շուտով հասիր ինձ օգնության.

¹³թող շփոթության մատնվեն և ոչնչացվեն նրանք,

ովքեր դավեր են նյութում իմ կյանքի դեմ.

ամոթով ու անարգությամբ թող պատվեն,

ովքեր փնտրում են իմ դժբախտությունը:

***

¹⁴Ես չեմ դադարում հուսալ և գովել Քեզ,

¹⁵բերանս հռչակում է Քո արդարությունը,

ամբողջ օրը՝ փրկության Քո գործերը.

դրանք անքանակ են և չեմ կարողանում հաշվել:

¹⁶Վերապրում եմ Քո սքանչելիքները, Տեր Աստված,

միայն Քո արդարությունն եմ մտաբերում.

¹⁷երիտասարդությունիցս ի վեր Դու կրթում ես ինձ, Աստված,

մինչև այսօր ես հռչակում եմ Քո հրաշքները:

¹⁸Հասել են ծերությունն ու սպիտակ մազերը,

ո՜վ Աստված, ինձ մի՛ լքիր.

նրան, ով գալիս է, կավետեմ Քո զորությունը,

ապագա սերնդին՝ Քո հրաշագործությունները:

¹⁹Արդարությունդ, Աստված, հասնում է մինչև երկինք,

Դու ես, որ կատարում ես մեծագործություններ.

ո՜վ Աստված, ո՞վ է Քեզ նման:

²⁰Անցկացրեցիր ինձ բազում փորձությունների միջով,

բայց Դու ես լինելու, որ վերապրեցնելու ես ինձ,

երկրի խորքերից բարձրացնելու ես ինձ:

²¹Ինձ վեր կբարձրացնես, ինձ ավելի մեծ դարձնելու համար,

կրկին Դու կլինես ինձ մխիթարողը.

²²տավիղի վրա կդավանեմ հավատարմությունդ, Աստված,

քնարի վրա կերգեմ Քո համար, ո՜վ Սուրբդ Իսրայելի:

²³Շուրթերս երգելու են Քո համար,

որովհետև Դու փրկեցիր իմ կյանքը.

²⁴լեզուս, ամբողջ օրվա ընթացքում,

խորհրդածելու է արդարությանդ գործերը.

որովհետև նրանք, ովքեր չարիք են կամենում ինձ,

ամոթահար են մնալու ու ստորացած:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։