ՎՍՏԱՀՈՒԹՅԱՆ ԱՂՈԹՔ ՀԻՍՈՒՍԻ ՍՈՒՐԲ ՍՐՏԻՆ՝ ԱՆՍԱՀՄԱՆ ՍԻՐՈ ԱԿՈՒՆՔԻՆ
- 01
- 02
- 03
- 04
- 05
- 06
- 07
- 08
- 09
- 10
- 11
- 12
- 13
- 14
- 15
- 16
- 17
- 18
- 19
- 20
- 21
Բարությանդ ու մեծ ողորմությանդ վստահելով, Տե՜ր Հիսուս իմ, մոտենում եմ Քեզ, հիվանդս՝ Փրկչիդ, քաղցածս ու պապակս՝ կյանքի Աղբյուրիդ, մուրացիկս՝ երկնքի Թագավորիդ, ծառաս՝ Տիրոջդ, արարածս՝ Արարչիդ, վշտահարս՝ գթառատ Մխիթարչիդ: Որտեղի՞ց է ինձ այս երանությունը, որ Դու գալիս ես դեպի ինձ՝ Սուրբ Սրտիդ անծայրածիր սիրով: Ո՞վ եմ ես, որ նվիրվում ես ինձ: Ինչպե՞ս կարող եմ ես՝ մեղավորս ներկայանալ Քեզ: Իսկ Դու, ինչպե՞ս կարող ես բարեհաճել հյուրընկալվել ինձնից: Դու ճանաչում ես ծառայիդ, և գիտես, որ նրանում չկա բարի ոչինչ, որով արժանի լինի այս շնորհիդ: Այս իսկ պատճառով, չեմ կարողանում ուրիշ ոչինչ անել, եթե ոչ միայն՝ խոստովանել անարժանությունս, ճանաչել բարությունդ, փառաբանել ողորմածությունդ և երախտագիտությունս հայտնել Քեզ այսքա՜ն վիթխարի սիրույդ համար: Այս բոլորը կատարում ես զուտ գթությունիցդ մղված, առանց ուշադրություն դարձնելու գոյություն չունեցող արժանիքներիս, որպեսզի բարությունդ առավել հայտնի լինի, առավել ընդարձակորեն սերը գրավի էությունս, և որպեսզի միշտ ավելի հոգեհարազատ դառնա ինձ խոնարհությունը: Եվ քանի որ Դու այսպես ես կամենում, և այսպես պատվիրեցիր, որ կատարվի, ինձ նույնպես հաճելի է կամքդ:
Ո՜վ քաղցրագույն ու ամենաբարի Հիսուս, ինչպիսի՜ մեծարանք, երախտագիտություն և անդադար փառատրություն ենք պարտական Քեզ, Ամենասուրբ Մարմնիդ հաղորդվելու համար, որի մեծվայելչությունը բացատրելու կարող մարդ չկա: Ի՞նչ լավագույն ու փրկարար զգացում սնուցեմ ինձնում, քան Քո առջև լիովին խոնարհվելն ու փառավորելը Քո անսահման բարությունն իմ հանդեպ: Օրհնո՜ւմ եմ Քեզ, Աստվա՜ծ իմ, և գովում հավիտյան: Ահա՛ Դու Սրբությունն ես Սրբերի: Ահա՛ Դու երկնքից խոնարհվում ես դեպի ինձ: Ահա՛ Դու ընդառաջ ես ելնում ինձ, հրավիրում ես ինձ ճաշկերույթիդ: Փափաքում ես սնել ինձ երկնային կերակուրով, «հրեշտակների հացով» (Սղմ 77, 25), ուրիշ ոչնչով, եթե ոչ՝ Քեզնով միայն, «Հաց կենդանի, երկնքից իջած, կյանք աշխարհի» (Հվհ 6, 33. 51-52):
Ահա՛ թե որքա՜ն բարություն է շողարձակվում այնտեղ, ուր բխում է Սերը: Այս բոլորի համար, երախտագիտության ինչպիսի վա՜ռ զգացումներ, ի՜նչ գոհություններ ենք պարտական Քեզ: Քանի՜ցս անսահման է զորությունդ, քանի՜ցս աննկարագրելի՝ Քո ճշմարտությունը: Միայն մեկ խոսք արտասանեցիր և արարվեցին բոլոր գոյությունները. կատարվեց այն, ինչ հրամայեցիր: Դու, Տե՜ր բոլոր գոյությունների, որ ոչ ոքի կարիքը չունես, բայց որ այնուամենայնիվ կամեցար մեր մեջ բնակվել շնորհիվ Սիրույդ Խորհրդի, անարատ պահիր իմ ողջ էությունը հավիտենական Արքայությանդ համար:
Ցնծա՜, հոգի՜ իմ, և երախտագիտությունդ հայտնիր Աստծուն այս վեհ պարգևի ու այս եզակի մխիթարության համար, որ տրված է քեզ արցունքների այս հովտում, որովհետև մասնակից ես դառնում Փրկչի արժանիքներին: Հիսուսի սերը չի նվազում երբեք, և Նրա քավիչ ներգործության լայնածավալությունը նույնպես՝ անհնարին է սպառել, կարծես Աստված այսօր առաջին անգամ լինելով է իջնում մարդանալու, և մարդկության փրկության համար ճիշտ այս պահին է գամվում Խաչին, չարչարվում ու մահանում քո ու բոլորի համար:
Ամեն։
« Նմանություն Հիսուս Քրիստոսի » գրքից