Ամենասուրբ Հաղորդության հանդեպ առավել խորը ակնածանք զարգացնելու ամենադյուրին ճանապարհն ամեն օր Պատարագին մասնակցելն է՝ Քրիստոսի Մարմինն ու Արյունը կանոնավոր կերպով ստանալու հնարավորության համար: Կարող եք նաև աղոթական ժամանակ անցկացնել Ամենասուրբ Հաղորդության առաջ, որտեղ դա հնարավոր է (հետաքրքրվելով և գտնելով Ձեր մոտակայքում գտնվող կաթոլիկ մի եկեղեցի, ուր Ամենասուրբ Հաղորդությունը պահելու համար նախատեսված Տապանակ կա):
Կարող եք նաև կարդալ աստվածաբանական և եկեղեցական գրություններ Ամենասուրբ Հաղորդության մասին[1], կամ պապական վավերագրեր, ինչպիսին է Հռոմի Պապ Հովհաննես Պողոս Երկրորդի «Եկեղեցին Ամենասուրբ Հաղորդության մասին» Կոնդակը։ Վերջապես, երբ մասնակցում եք Պատարագին, կարող եք կատարել հետևյալ աղոթքը, որ վերագրվում է Սուրբ Հայր (Պադռե) Պիոյին, ով այն ասել է Քրիստոսին Հաղորդության մեջ ընդունելուց հետո.
Եղի՜ր իմ հետ, ո՜վ Տեր, որովհետև ես Քո ներկայության կարիքն ունեմ, որպեսզի չմոռանամ Քեզ: Դու գիտես, թե որքա՜ն հեշտ է իմ համար հեռանալը Քեզնից:
Եղի՜ր իմ հետ, ո՜վ Տեր, որովհետև ես թույլ եմ և կարիքն ունեմ Քո ուժերի, որպեսզի իմ անկումներն այդքա՜ն հաճախակի չլինեն:
Եղի՜ր իմ հետ, ո՜վ Տեր, որովհետև Դու ես իմ կյանքը, և առանց Քեզ՝ իմ մեջ եռանդ չկա:
Եղի՜ր իմ հետ, ո՜վ Տեր, որովհետև դու ես իմ լույսը, և առանց Քեզ՝ ես խավարի մեջ եմ:
Եղի՜ր իմ հետ, ո՜վ Տեր, ցույց տալու համար ինձ Քո կամքը:
Եղի՜ր իմ հետ, ո՜վ Տեր, որպեսզի ես կարողանամ լսել Քո ձայնը և հետևել Քեզ:
Եղի՜ր իմ հետ, ո՜վ Տեր, որովհետև ես ցանկանում եմ Քեզ խորապես սիրել և միշտ Քո մոտ լինել:
Եղի՜ր իմ հետ, ո՜վ Տեր, եթե ուզում ես, որ ես հավատարիմ մնամ Քեզ:
Եղի՜ր իմ հետ, ո՜վ Տեր, որովհետև որքան էլ հոգիս աղքատ լինի, ես ուզում եմ, որ այն լինի Քո համար մխիթարության վայր, սիրո անոթ:
Եղի՜ր իմ հետ, Հիսո՜ւս, որովհետև ժամը ուշ է, և օրը մոտենում է ավարտին, կյանքն անցնում է, և մահը, դատաստանն ու հավերժությունը մոտենում են: Իմ ուժերը պետք է նորոգվեն, որպեսզի ճանապարհին կանգ չառնեմ, և հետևաբար՝ ես Քո կարիքն ունեմ: Ժամը ուշ է, և մահը մոտենում է։ Ես վախենում եմ խավարից, գայթակղություններից, ցամաքությունից, խաչից, վշտերից։ Ա՜հ, որքա՜ն Քո կարիքն ունեմ, իմ Հիսո՜ւս, այս աքսորի գիշերվա մեջ:
Եղի՜ր իմ հետ այսօր, Հիսո՜ւս: Վտանգներով լի կյանքում ես Քո կարիքն ունեմ:
Թո՜ւյլ տուր, որ Քեզ ճանաչեմ հացի բեկման մեջ, ինչպես Քեզ ճանաչեցին Քո աշակերտները, որպեսզի Հաղորդությունը լինի լույս խավարի մեջ, ինձ զորացնող ուժը, իմ սրտի միակ ուրախությունը:
Եղի՜ր իմ հետ, ո՜վ Տեր, որովհետև մահվան ժամին ես կամենում եմ միանալ Քեզ:
Եղի՜ր իմ հետ, Հիսո՜ւս, ես չեմ խնդրում աստվածային մխիթարություն, քանի որ ես արժանի չեմ դրան, այլ՝ Քո ներկայության պարգևը: Օ՜հ, այո՛, դա եմ Քեզնից խնդրում:
Եղի՜ր իմ հետ, ո՜վ Տեր, որովհետև ես փնտրում եմ միայն Քեզ, Քո սերը, Քո շնորհը, Քո կամքը, Քո սիրտը, Քո հոգին, որովհետև ես սիրում եմ Քեզ և ա՛յլ վարձատրություն չեմ խնդրում, բացի Քեզ ավելի ու ավելի սիրելուց:
Ուժեղ սիրով ես կսիրեմ Քեզ իմ ողջ սրտով այստեղ՝ երկրի վրա, և կշարունակեմ սիրել Քեզ կատարյալ սիրով ամբողջ հավերժության ընթացքում:
Ամեն։
