ԱՎԱՐՏԱԿԱՆ ՕՐՀՆՈՒԹՅՈՒՆ ԵՎ ԱՐՁԱԿՈՒՄ (գրաբար)

 

 

Որ օրհնես զայնոսիկ, որք օրհնեն զՔեզ, Տէր, եւ սուրբ առնես զյուսացեալսն ի Քեզ:

Սպասաւորն. – Օրհնեալ է Աստուած:

Քահանայն. – Կեցո՛ զժողովուրդս Քո, եւ օրհնեա՛ զժառանգութիւնս Քո: Զլրումն Եկեղեցւոյ Քո պահեա՛:

Սպասաւորն. – Ամէն:

Քահանայն. – Սրբեա՛ զսոսա, որք ողջունեցին սիրով զվայելչութիւն Տան Քո: Դու զմեզ փառաւորեա՛ աստուածային զօրութեամբ Քով. եւ մի՛ թողուր զյուսացեալքս ի Քեզ:

Սպասաւորն. – Ամէն:

Քահանայն. – Զխաղաղութիւն Քո պարգեւեա՛ ամենայն աշխարհի, եկեղեցեաց, քահանայից, թագաւորաց քրիստոնէից, եւ զինուորեալ մանկանց նոցա, եւ ամենայն ժողովրդեանս:

Սպասաւորն. – Ամէն:

Քահանայն. – Զի ամենայն տուրք բարիք եւ ամենայն պարգեւք կատարեալք ի վերուստ են իջեալ առ ի Քէն, որ ես Հայր լուսոյ: Եւ Քեզ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից:

 

 

Ամէն:

Եղիցի անուն Տեառն օրհնեալ, յայսմհետէ մինչեւ յաւիտեան:

Եղիցի անուն Տեառն օրհնեալ, յայսմհետէ մինչեւ յաւիտեան:

Եւ եղիցի անուն Տեառն օրհնեալ, յայսմհետէ մինչեւ յաւիտեան:

 

 

Կատարումն Օրինաց եւ Մարգարէից՝ Դու ես, Քրիստոս Աստուած Փրկիչ մեր: Որ լցեր զամենայն հայրակամ տնօրէնութիւնս Քո, լցո՛ եւ զմեզ Հոգւովդ Քով Սրբով:

 

 

Սուրբ Խաչիւս աղաչեսցուք զՏէր, զի սովաւ փրկեսցէ զմեզ ի մեղաց, եւ կեցուսցէ շնորհիւ ողորմութեան Իւրոյ:

Ամենակալ Տէր Աստուած մեր, կեցո՛ եւ ողորմեա՛:

 

 

Պահպանիչ եւ յոյս հաւատացելոց, Քրիստոս Աստուած մեր, պահպանեա՛ զժողովուրդս Քո ընդ հովանեաւ սուրբ եւ պատուական Խաչիւդ Քով ի խաղաղութեան: Փրկեա՛ յերեւելի եւ յաներեւոյթ թշնամւոյն: Արժանաւորեա՛ գոհութեամբ փառաւորել զՔեզ ընդ Հօր եւ ընդ Սրբոյ Հոգւոյդ, այժմ եւ միշտ եւ յաւիտեանս յաւիտենից. Ամէն:

 

 

Օրհնեցից զՏէր յամենայն ժամ, յամենայն ժամ օրհնութիւն Նորա ի բերան իմ:

 

 

 

Օրհնեալ եղերուք ի շնորհաց Սուրբ Հոգւոյն, երթա՛յք խաղաղութեամբ, եւ Տէր եղիցի ընդ ձեզ՝ ընդ ամենեսեան. Ամէն:

 

 

Տէր Աստուած, Յիսուս Քրիստոս, ողորմեա՛ ինձ: