ՍԿԻԶԲ ՍՈՒՐԲ ՊԱՏԱՐԱԳԻ (գրաբար)

 

 

 

 

Եւ վասն Սրբուհւոյ Աստուածածնին բարեխօսութեանն, Տէր, ընկա՛լ զաղաչանս մեր եւ կեցո՛ զմեզ:

 

 

Սուրբ զԱստուածածինն եւ զամենայն Սուրբս բարեխօս արասցուք առ Հայր ի յերկինս, զի կամեցեալ ողորմեսցի եւ գթացեալ կեցուսցէ զարարածս իւր:

Ամենակալ Տէր Աստուած մեր, կեցո՛ եւ ողորմեա՛:

 

 

Ընկա՛լ, Տէր, զաղաչանս մեր, բարեխօսութեամբ Սրբուհւոյ Աստուածածնին՝ անարատ ծնողի Միածնի Որդւոյ Քո, եւ աղաչանօք ամենայն Սրբոց Քոց, եւ որոց (կամ՝ որոյ) այսօր է զյիշատակ (կամ՝ աւուրս շնորհիւ): Լո՛ւր մեզ, Տէր, եւ ողորմեա՛. ներեա՛, քաւեա՛ եւ թո՛ղ զմեղս մեր: Արժանաւորեա՛ գոհութեամբ փառաւորել զՔեզ ընդ Որդւոյ եւ ընդ Սրբոյ Հոգւոյդ, այժմ եւ միշտ եւ յաւիտեանս յաւիտենից: Ամէն:

 

 

Խոստովանիմ առաջի Աստուծոյ եւ Սրբուհւոյ Աստուածածնին եւ առաջի ամենայն Սրբոց, եւ առաջի ձեր, հարք եւ եղբարք, զամենայն մեղս, զոր գործեալ եմ: Քանզի մեղայ խորհրդով, բանիւ եւ գործով, եւ ամենայն մեղօք, զոր գործեն մարդիկ, մեղայ, մեղայ: Աղաչեմ զձեզ, խնդրեցէ՛ք վասն իմ յԱստուծոյ զթողութիւն:

 

 

Ողորմեսցի քեզ մարդասէրն Աստուած՝ Հզօրն, եւ թողութիւն շնորհեսցէ ամենայն յանցանաց քոց՝ անցելոյն եւ այժմուս, եւ յառաջակայէն փրկեսցէ զքեզ, եւ հաստատեսցէ յամենայն գործս բարիս եւ հանգուսցէ զքեզ ի հանդերձեալ կեանսն:

 

 

Ամէն: Ազատեսցէ եւ զձեզ մարդասէրն Աստուած եւ թողցէ զամենայն յանցանս ձեր, տացէ ժամանակ ապաշխարելոյ եւ գործելոյ զբարիս. ուղղեսցէ եւ զառաջակայ կեանս ձեր շնորհօք Սուրբ Հոգւոյն, Հզօրն եւ Ողորմածն, եւ Նմա փա՜ռք յաւիտեանս: Ամէն:

 

 

Յիշեսջի՛ր եւ զմեզ առաջի անմահ Գառինն Աստուծոյ:

 

 

Յիշեալ լիջիք առաջի անմահ Գառինն Աստուծոյ:

 

 

Քահանայն. – Մտից առաջի սեղանոյ Աստուծոյ առ Աստուած, որ ուրախ առնէ զմանկութիւն իմ:

Սպասաւորն. – Դատ արա ինձ, Աստուած, եւ իրաւ արա ինձ ի դատաստանի իմում:

Քահանայն. – Յազգէ որ ոչ է սուրբ, ի մարդոյ մեղաւորէ, նենգաւորէ, փրկեա՛ զիս:

Սպասաւորն. – Դու, Աստուած, հզօրիչ իմ ես. ընդէ՞ր մոռացար զիս, ընդէ՞ր տրտում գնամ ես ի նեղել թշնամւոյ իմոյ:

Քահանայն. – Առաքեա՛, Տէր, զլոյս Քո եւ զճշմարտութիւն Քո, զի առաջնորդեսցեն ինձ եւ հանցեն զիս ի լեառն Սուրբ եւ ի հարկս Քո:

Սպասաւորն. – Մտից առաջի սեղանոյ Աստուծոյ առ Աստուած, որ ուրախ առնէ զմանկութիւն իմ:

Քահանայն. – Խոստովան եղէց Քեզ օրհնութեամբ, Աստուած, Աստուած իմ:

Սպասաւորն. – Արդ, ընդէ՞ր տրտում ես, անձն իմ, կամ ընդէ՞ր խռովես զիս. յուսա՛ առ Աստուած, խոստովանեա՛ Նմա. «Փրկիչ երեսաց իմոց Աստուած է»:

 

 

Փա՜ռք Հօր եւ Որդւոյ եւ Հոգւոյն Սրբոյ:

 

 

Այժմ եւ միշտ եւ յաւիտեանս յաւիտենից: Ամէն:

Եւ եւս խաղաղութեան զՏէր աղաչեսցուք: Օրհնեսցուք զԱմենակալն Աստուած՝ զՀայր Տեառն մերոյ Յիսուսի Քրիստոսի, որ արժանի արար զմեզ կալ ի տեղւոջ փառաբանութեան եւ երգել զերգս հոգեւորս:

Ամենակալ Տէր Աստուած մեր, կեցո՛ եւ ողորմեա՛:

 

 

Ի յարկի սրբութեան եւ ի տեղւոջ փառաբանութեան, հրեշտակաց բնակարանիս եւ մարդկան քաւարանիս, առաջի աստուածընկալ եւ պայծառացեալ Սուրբ Նշանացս եւ Սուրբ Սեղանոյս, խոնարհեալ երկիւղիւ՝ երկիր պագանեմք. զսուրբ, զհրաշալի եւ զյաղթող զՅարութիւնդ (կամ՝ զՏէրութիւնդ) Քո օրհնեմք եւ փառաւորեմք. եւ Քեզ մատուցանեմք զօրհնութիւն եւ զփառս, ընդ Հօր եւ ընդ Հոգւոյդ Սրբոյ, այժմ եւ միշտ եւ յաւիտեանս յաւիտենից: Ամէն:

 

 

Յիշատակ Տեառն մերոյ Յիսուսի Քրիստոսի:

 

 

Յաղագս յիշատակի փրկագործ տնօրէնութեան Տեառն մերոյ եւ Փրկչին Յիսուսի Քրիստոսի:

 

 

Աստուած, Աստուած մեր, որ զերկնաւոր հացդ՝ զՏէր մեր Յիսուս Քրիստոս, զկերակուրդ ամենայն աշխարհի առաքեցեր Փրկիչ եւ կեցուցիչ եւ բարերար՝ օրհնել եւ սրբել զմեզ. Ինքնին Դու, Տէր, օրհնեա՛ եւ այժմ զառաջադրութիւնս զայս, ընկա՛լ զսա յերկնային Քո սեղանդ. յիշեա՛ որպէս բարերար եւ մարդասէր՝ զմատուցողս եւ որոց վասն մատուցանի: Եւ զմեզ անդատապարտ պահեա՛ ի քահանայագործութիւն աստուածային խորհրդոց Քոց, զի սուրբ եւ փառաւոր է ամենապատիւ մեծվայելչութիւն փառացդ Հօր եւ Որդւոյ եւ Հոգւոյդ Սրբոյ, այժմ եւ միշտ եւ յաւիտեանս յաւիտենից: Ամէն:

 

 

Հոգին Սուրբ եկեսցէ ի քեզ, եւ զօրութիւն Բարձրելոյն հովանի լիցի ի վերայ քո: