ՊԱՇՏԱՄՈՒՆՔ ԵՎ ՀԱՂՈՐԴՈՒԹՅՈՒՆ (գրաբար)

 

Խաղաղութիւն ամենեցուն:

 

 

Եւ ընդ հոգւոյդ քում:

 

 

Աստուծոյ երկրպագեսցուք:

 

 

Առաջի Քո, Տէր:

 

 

 

Որ աղբիւրդ ես կենաց եւ բղխումն ողորմութեան, Հոգիդ Սուրբ, ողորմեա՛ ժողովրդեանս, որք խոնարհեալ երկիր պագանեն Աստուածութեանդ Քո: Պահեա՛ զսոսա ամբողջս. տպաւորեա՛ յոգւոջ սոցա զձեւ մարմնոյ ցուցակի՝ առ ի ժառանգութիւն եւ ի վիճակ հանդերձելոցդ բարեաց:

 

 

Քրիստոսիւ Յիսուսիւ Տերամբ մերով, ընդ որում Քեզ՝ Հոգւոյդ Սրբոյ, եւ Հօր ամենակալի, վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:

 

 

Պռօսխումէ:

 

 

 

Ի Սրբութիւն Սրբոց:

 

 

Միայն Սուրբ, միայն Տէր, Յիսուս Քրիստոս՝ ի փառս Աստուծոյ Հօր. Ամէն:

 

 

Օրհնեալ Հայր Սուրբ, Աստուած ճշմարիտ:

 

 

Ամէն:

 

 

Օրհնեալ Որդիդ Սուրբ, Աստուած ճշմարիտ:

 

 

Ամէն:

 

 

Օրհնեալ Հոգիդ Սուրբ, Աստուած ճշմարիտ:

 

 

Ամէն:

 

 

Օրհնութիւն եւ փառք Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից. Ամէն:

 

 

Ամէն: Հայր Սուրբ, Որդիդ Սուրբ, Հոգիդ Սուրբ:

Օրհնութիւն Հօր եւ Որդւոյ եւ Սրբոյ Հոգւոյն, այժմ եւ միշտ եւ յաւիտեանս յաւիտենից. Ամէն:

 

 

 

Նայեա՛ց, Տէր մեր Յիսուս Քրիստոս, յերկնից ի սրբութենէ Քումմէ, եւ յաթոռոյ փառաց թագաւորութեան Քո: Ե՛կ ի սրբել եւ ի կեցուցանել զմեզ, որ ընդ Հօր նստիս եւ աստ պատարագիս: Արժանի արա՛ տալ մեզ յանարատ Մարմնոյ Քումմէ եւ ի պատուական յԱրենէ, եւ ի ձեռս մեր՝ ամենայն ժողովրդեանս:

 

 

Տէր Աստուած մեր, որ կոչեցեր զմեզ յԱնուն Միածնի Որդւոյ Քո քրիստոնեայս, եւ շնորհեցեր մեզ մկրտութիւն հոգեւոր աւազանաւն ի թողութիւն մեղաց, եւ արժանի արարեր զմեզ հաղորդիլ սուրբ Մարմնոյ եւ Արեան Միածնի Քո: Եւ այժմ աղաչեմք զՔեզ, Տէր, արա՛ զմեզ արժանի ընդունիլ զսուրբ խորհուրդս զայս՝ մեզ ի մեղաց թողութիւն. եւ գոհութեամբ փառաւորել զՔեզ ընդ Որդւոյ եւ Սուրբ Հոգւոյդ, այժմ եւ միշտ եւ յաւիտեանս յաւիտենից. Ամէն:

 

 

Ի սուրբ, ի սուրբ, պատուական Մարմնոյ եւ յԱրենէ Տեառն մերոյ եւ Փրկչին Յիսուսի Քրիստոսի, ճաշակեսցուք սրբութեամբ, որ իջեալ ի յերկնից՝ բաշխի ի միջի մերում: Սա է կեանք, յոյս, յարութիւն, քաւութիւն եւ թողութիւն մեղաց: Սաղմոս ասացէ՛ք Տեառն Աստուծոյ մերոյ, սաղմոս ասացէ՛ք երկնաւոր Թագաւորիս մերոյ անմահի, որ նստի ի կառս քերովբէականս:

 

 

Օրհնեալ է Աստուած:

 

 

 

Զո՛ր օրհնութիւն, կամ զո՛ր գոհութիւն ի վերայ հացիս եւ բաժակիս ասասցուք. այլ, Յիսուս, զՔեզ միայն օրհնեմք՝ հանդերձ Հարբդ եւ ամենասուրբ Հոգւովդ, այժմ եւ միշտ եւ յաւիտեանս յաւիտենից. Ամէն:

 

 

Խոստովանիմ եւ հաւատամ, զի Դու ես Քրիստոս՝ Որդի Աստուծոյ, որ բարձեր զմեղս աշխարհի:

 

 

Լրումն Հոգւոյն Սրբոյ:

 

 

Հայր Սուրբ, որ անուանեցեր զմեզ անուանակցութեամբ Միածնի Քո, եւ լուսաւորեցեր Մկրտութեամբ հոգեւոր Աւազանին, արժանի արա՛ ընդունիլ զՍուրբ Խորհուրդս զայս՝ մեզ ի մեղաց թողութիւն: Տպաւորեա՛ ի մեզ զշնորհս Հոգւոյդ Սրբոյ՝ որպէս ի Սուրբ Առաքեալսն, որք ճաշակեցին եւ եղեն մաքրիչք ամենայն աշխարհի:

Եւ արդ՝ Տէր, Հայր բարերար, զհաղորդութիւնս զայս մասնաւորեա՛ ճաշակման երեկոյին աշակերտացն՝ բառնալով զխաւար մեղաց իմոց: Մի՛ հայիր յանարժանութիւնս իմ. եւ մի՛ արգելուր զշնորհս Հոգւոյդ Սրբոյ: Այլ ըստ անբաւ մարդասիրութեան Քո, պարգեւեա՛ զսա՝ քաւիչ մեղաց, լուծիչ յանցանաց. որպէս խոստացաւ եւ ասաց Տէր մեր Յիսուս Քրիստոս, թէ՝ Որ ուտէ զՄարմին Իմ եւ ըմպէ զԱրիւն Իմ, կեցցէ յաւիտեան:

Արդ՝ արա՛ զսա մեզ ի քաւութիւն, զի որք կերիցեն եւ արբցեն ի սմանէ, հանցեն զօրհնութիւն եւ զփառս Հօր եւ Որդւոյ եւ Հոգւոյդ Սրբոյ, այժմ եւ միշտ եւ յաւիտեանս յաւիտենից. Ամէն:

 

Գոհանամ զՔէն, Քրիստոս Թագաւոր, որ արժանի արարեր զիս զանարժանս հաղորդիլ սուրբ Մարմնոյ եւ Արեան Քո: Եւ այժմ աղաչեմ զՔեզ, մի՛ լիցի սա ինձ ի դատապարտութիւն, այլ ի քաւութիւն եւ ի թողութիւն մեղաց, յառողջութիւն հոգւոյ եւ մարմնոյ, եւ ի կատարումն ամենայն գործոց առաքինութեան, որպէս զի սրբեսցէ սա զշունչս իմ, զհոգի եւ զմարմին իմ, եւ արասցէ զիս տաճար եւ բնակարան Ամենասուրբ Երրորդութեանդ: Զի ընդ Սուրբս Քո արժանի եղէց փառաւորել զՔեզ ընդ Հօր եւ ընդ Սուրբ Հոգւոյդ, այժմ եւ միշտ եւ յաւիտեանս յաւիտենից. Ամէն:

 

 

Գոհանամ եւ մեծացուցանեմ եւ փառաւորեմ զՔեզ, Տէր Աստուած իմ, զի զիս զանարժանս արժանացուցեր յաւուր յայսմիկ հաղորդակից լինել աստուածային եւ սոսկալի խորհրդոյ Քո, անարատ Մարմնոյդ եւ պատուական Արեանդ: Վասն այսորիկ զսոսա ի բարեխօսութիւն ունելով՝ աղաչեմ, զամենայն աւուրս եւ ի ժամանակս կենաց իմոց՝ ընդ սրբութեան Քո պահեա՛ զիս. որպէս զի յիշելով զբարեգթութիւնս Քո, եւ կենդանի լինել ընդ Քեզ՝ որ վասն մեր չարչարեցար եւ մեռար եւ յարեար: Մի՛ մերձեսցի, Տէր իմ եւ Աստուած, խորտակիչն՝ կնքելով անձին իմոյ պատուական Արեամբդ Քով: Ամենակարող, մաքրեա՛ զիս սոքօք յամենայն մեռելոտի գործոց իմոց՝ որ միայնդ ես անմեղ: Ամրացո՛ զկեանս իմ, Տէր, յամենայն փորձութենէ, եւ զպատերազմողն իմ դարձո՛ յետս պատկառեալ եւ ամաչեցեալ, որչափ յառնէ ի վերայ իմ: Ամրացո՛ զգնացս մտաց եւ լեզուի իմոյ եւ զամենայն ճանապարհս մարմնոյ իմոյ: Լե՛ր հանապազորդ ընդ իս՝ ըստ անսուտ խոստմանց Քոց, թէ՝ Որ ուտէ զՄարմին Իմ, եւ ըմպէ զԱրիւն իմ, նա յԻս բնակեսցէ, եւ ես՝ ի նմա: Դու ասացեր, մարդասէր. կացո՛ զբանս աստուածային անլուծանելի հրամանաց Քոց: Քանզի Դու ես Աստուած ողորմութեան եւ գթութեան եւ մարդասիրութեան, եւ պարգեւիչ ամենայն բարեաց. եւ Քեզ վայելէ փառք՝ հանդերձ Հարբդ եւ Ամենասուրբ Հոգւովդ, այժմ եւ միշտ եւ յաւիտեանս յաւիտենից. Ամէն:

 

 

Մարմին Քո անապական լիցի ինձ ի կեանս:

 

 

Ամէն:

 

 

Եւ Սուրբ Արիւն Քո՝ ի քաւութիւն եւ ի թողութիւն մեղաց:

 

 

Ամէն:

 

 

Երկիւղիւ եւ հաւատով յառաջ մատիք եւ սրբութեամբ հաղորդեցարուք:

 

 

Ասացէք. «Մեղայ Աստուծոյ»:

 

 

Մեղայ Աստուծոյ:

 

 

Հաւատամք ի Հայր Սուրբ, Աստուած ճշմարիտ:

 

 

Ամէն:

 

 

Հաւատամք յՈրդին Սուրբ, Աստուած ճշմարիտ:

 

 

Ամէն:

 

 

Հաւատամք ի Հոգին Սուրբ, Աստուած ճշմարիտ:

 

 

Ամէն:

 

 

Խոստովանիմք եւ հաւատամք, զի սա է ճշմարիտ Մարմին եւ Արիւն Տեառն մերոյ Յիսուսի Քրիստոսի, որ բառնայ զմեղս աշխարհի:

 

 

Ամէն:

 

 

 

Մարմին եւ Արիւն Քրիստոսի՝ Որդւոյն Աստուծոյ, լիցի քեզ ի քաւութիւն եւ ի թողութիւն մեղաց:

 

 

Ամէն:

Աստուած մեր եւ Տէր մեր երեւեցաւ մեզ:

Օրհնեալ եկեալ Անուամբ Տեառն:

 

 

 

Կեցո՛, Տէր, զժողովուրդս Քո, եւ օրհնեա՛ զժառանգութիւնս Քո, հովուեա՛ եւ բարձրացո՛ զսոսա՝ յայսմհետէ մինչեւ յաւիտեան:

 

 

Գոհանամք զՔէն, Հայր ամենակալ, որ պատրաստեցեր մեզ նաւահանգիստ՝ Սուրբ զԵկեղեցի, տաճար սրբութեան, ուր փառաբանի Սուրբ Երրորդութիւնդ. Ալէլուիա:

Գոհանամք զՔէն, Քրիստոս Թագաւոր, որ պարգեւեցեր մեզ կենդանութիւն՝ կենարար Մարմնով եւ Արեամբդ Քով Սրբով. շնորհեա՛ զքաւութիւն եւ զմեծ զողորմութիւն. Ալէլուիա:

Գոհանամք զՔէն, Հոգիդ ճշմարիտ, որ նորոգեցեր Սուրբ զԵկեղեցի. անարատ պահեա՛ հաւատով Երրորդութեանդ՝ յայսմհետէ մինչեւ յաւիտեան. Ալէլուիա:

 

Գոհանամք զՔէն, Քրիստոս Աստուած, որ զայսպիսի ճաշակումն բարութեան շնորհեցեր մեզ ի սրբութիւն կենդանութեան: Սովիմբ պահեա՛ զմեզ սուրբս եւ անարատս, բնակեալ զմեօք՝ Քո աստուածային խնամովքդ: Հովուեա՛ զմեզ յանդաստանի կամաց Քոց սրբոց եւ բարեսիրաց, որով ամրացեալք յամենայն բանսարկուին ընդդիմութեանց, Քումդ եւեթ արժանի եղիցուք լսել ձայնի, եւ Քեզ միայնոյ քաջայաղթ եւ ճշմարիտ Հովուիդ հետեւել, եւ առ ի Քէն ընդունիլ զպատրաստեալ տեղի յԱրքայութեանդ Երկնից, Աստուած մեր եւ Տէր մեր եւ Փրկիչ Յիսուս Քրիստոս, որ ես օրհնեալ՝ ընդ Հօր եւ ընդ Սուրբ Հոգւոյդ, այժմ եւ միշտ եւ յաւիտեանս յաւիտենից. Ամէն:

 

 

Խաղաղութիւն ամենեցուն:

 

Անքնին, անհաս, Երրեակ Ինքնութեանդ, հաստիչ, ընդունող եւ անբաժանելի միասնական Սուրբ Երրորդութեանդ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն: