ՍԿԻԶԲ ՍՈՒՐԲ ՊԱՏԱՐԱԳԻ (աշխարհաբար)

 

 

 

Եվ Սրբուհի Աստվածածնի բարեխոսությամբ, Տեր, ընդունիր մեր աղաչանքները և կյանք պարգևիր մեզ:

 

 

Սուրբ Աստվածածնին և բոլոր Սրբերին բարեխոս ունենանք երկնավոր Հոր առաջ, որպեսզի կամենալով ողորմի և գթալով կյանք տա Իր արարածներին:

Ամենակալ Տեր Աստված մեր, կյանք տուր և ողորմիր:

 

 

Ընդունիր, Տեր, մեր աղաչանքները, բարեխոսությամբ Սրբուհի Աստվածածնի՝ Քո Միածին Որդու անարատ ծնողի, և աղաչանքներով Քո բոլոր Սրբերի և նրանց (կամ՝ նրա), որոնց (կամ՝ որի) հիշատակն է այսօր (կամ՝ այս օրվա շնորհով): Լսիր մեզ, Տեր, և ողորմիր, ներիր, քավիր և թողություն շնորհիր մեր մեղքերին: Արժանացրու մեզ գոհությամբ փառավորել Քեզ Որդուդ և Սուրբ Հոգուդ հետ միասին, այժմ և միշտ և հավիտյանս հավիտենից: Ամեն:

 

 

Խոստովանում եմ Աստծո և Սրբուհի Աստվածածնի և բոլոր Սրբերի առաջ, նաև ձեր առաջ, հայրեր ու եղբայրներ, բոլոր մեղքերս, որ գործել եմ: Որովհետև մեղանչել եմ մտքով, խոսքով և գործով, և բոլոր մեղքերով, որ գործում են մարդիկ, մեղանչել ու մեղանչել եմ: Աղաչում եմ ձեզ, խնդրեցեք իմ համար Աստծուց թողություն:

 

 

Թող ողորմի քեզ մարդասերն Աստված՝ Հզորը, և թողություն շնորհի քո բոլոր հանցանքներին՝ անցյալի ու ներկայի, իսկ ապագա հանցանքներից թող փրկի քեզ, և հաստատի քեզ բոլոր բարի գործերի մեջ և հանգստացնի քեզ հանդերձյալ կյանքում:

 

 

Ամեն: Թող որ ձեզ նույնպես ազատի մարդասերն Աստված և թողություն շնորհի ձեր բոլոր հանցանքներին, տա ժամանակ ապաշխարելու և բարի գործեր կատարելու. թող որ ձեր առաջիկա կյանքը ևս ուղղի շնորհներով Սուրբ Հոգու, Նա, որ Հզոր ու Ողորմած է, և Նրան փա՜ռք հավիտյանս: Ամեն:

 

 

Մեզ նույնպես հիշիր Աստծո անմահ Գառան առաջ:

 

 

Հիշված կլինեք Աստծո անմահ Գառան առաջ:

 

 

Քահանան. – Մտնելու եմ Աստծո սեղանի առաջ, Աստծո մոտ, որ ուրախությամբ է լցնում իմ երիտասարդությունը:

Սպասավորը. – Դատիր ինձ, Աստված, և դատաստանիս ժամանակ պաշտպանիր իմ իրավունքը:

Քահանան. – Անսուրբ ժողովրդից, մեղավոր ու նենգավոր մարդուց փրկիր ինձ:

Սպասավորը. – Դու ես, ո՜վ Աստված, ինձ հզորացնողը. ինչո՞ւ մոռացար ինձ, ինչո՞ւ եմ տրտում քայլում թշնամուց չարչարված:

Քահանան. – Առաքիր, ո՜վ Տեր, Քո լույսն ու Քո ճշմարտությունը, որպեսզի առաջնորդեն ինձ և հանեն ինձ Սրբությանդ լեռը և հասցնեն ինձ Քո օթևաններին:

Սպասավորը. – Մտնելու եմ Աստծո սեղանի առաջ, Աստծո մոտ, որ ուրախությամբ է լցնում իմ երիտասարդությունը:

Քահանան. – Դավանելու եմ Քեզ օրհնությամբ, Աստվա՜ծ, Աստվա՛ծ իմ:

Սպասավորը. – Արդ, ինչո՞ւ ես տխուր, հոգի իմ, ինչո՞ւ ես խռովված. հույսդ Աստծո վրա դիր, դավանիր Նրան. «Աստված է իմ Փրկիչը»:

 

 

Փա՜ռք Հորը և Որդուն և Սուրբ Հոգուն:

 

 

Այժմ և միշտ և հավիտյանս հավիտենից: Ամեն:

Խաղաղության համար, հատկապես, Տիրոջն աղաչենք: Օրհնենք Ամենակալ Աստծուն՝ մեր Տեր Հիսուս Քրիստոսի Հորը, որ արժանացրեց մեզ կանգնել փառաբանության այս տեղում և երգել հոգևոր երգեր:

Ամենակալ Տեր Աստված մեր, կյանք տուր և ողորմիր:

 

 

Սրբության այս խորանում և փառաբանության այս տեղում՝ հրեշտակների բնակարանում և մարդկանց քավարանում, աստվածընկալ և պայծառացած Սուրբ Նշանների և Սուրբ Սեղանի առաջ երկյուղածությամբ խոնարհվելով՝ երկրպագում ենք. սուրբ, հրաշալի և հաղթող Հարությունդ (կամ՝ Տերությունդ) օրհնում ու փառավորում ենք. և Քեզ մատուցում ենք օրհնությո՜ւն և փա՜ռք, Հոր և Սուրբ Հոգու հետ միասին, այժմ և միշտ և հավիտյանս հավիտենից: Ամեն:

 

 

Մեր Տեր Հիսուս Քրիստոսի հիշատակը:

 

 

Մեր Տեր և Փրկիչ Հիսուս Քրիստոսի փրկագործ տնօրենության հիշատակի համար:

 

 

Աստվա՜ծ, Աստվա՛ծ մեր, որ երկնավոր Հացդ՝ մեր Տեր Հիսուս Քրիստոսին, որ կերակուրն է ամբողջ աշխարհի, առաքեցիր իբրև Փրկիչ և կյանք տվող և բարերար, մեզ օրհնելու և սրբացնելու համար. Դու Ինքդ, Տեր, այժմ էլ օրհնիր այս ընծան, ընդունիր սա Քո երկնային Սեղանի վրա. հիշիր, որպես բարերար և մարդասեր, այս Պատարագը մատուցողներին և նրանց, ում համար է այն մատուցվում: Իսկ մեզ անդատապարտ պահիր Քո աստվածային խորհուրդների քահանայագործության մեջ, որովհետև սուրբ և փառավոր է փառքի ամենապատիվ մեծվայելչությունը Հոր և Որդու և Սուրբ Հոգուդ, այժմ և միշտ և հավիտյանս հավիտենից: Ամեն:

 

 

Սուրբ Հոգին թող գա քո մեջ, և քո վրա հովանի թող լինի Բարձրյալի զորությունը: