ԸՆԴՀԱՆՐԱԿԱՆ ԱՂՈԹՔՆԵՐ (գրաբար)

 

 

Սովաւ շնորհեա՛ զսէր, զհաստատութիւն եւ զըղձալի զխաղաղութիւն ամենայն աշխարհի. Սրբոյ Եկեղեցւոյ եւ ամենայն ուղղափառ եպիսկոպոսաց, քահանայից, սարկաւագաց, թագաւորաց աշխարհի, իշխանաց, ժողովրդոց, ճանապարհորդելոց, նաւելոց, կապելոց, վտանգելոց, աշխատելոց, եւ որք ի պատերազմունս բարբարոսաց:

Սովաւ եւ օդոց շնորհեա՛ զբարեխառնութիւն եւ անդոց զպտղաբերութիւն, եւ ախտացելոց ի պէսպէս ցաւս՝ փութապէս զառողջութիւն:

Սովաւ հանգո՛ զամենեսեան յառաջագոյն ի Քրիստոս զննջեցեալսն՝ զնախահարս, զհայրապետս, զմարգարէս, զառաքեալս, զվկայեալս, զեպիսկոպոսունս, զերիցունս, զսարկաւագունս եւ զբնաւ ուխտ Եկեղեցւոյ Քում սրբոյ, եւ զամենեսեան՝ որք յաշխարհական կարգէ զարս եւ զկանայս հաւատով զվախճանեալս:

 

 

Ընդ որս եւ մեզ այց արասցես, բարերար Աստուած, աղաչեմք:

 

 

Յիշեա՛, Տէր, եւ ողորմեա՛:

 

 

Աստուածածնին Սրբոյ Կուսին Մարիամու եւ Յովհաննու Մկրտչին, Ստեփանոսի Նախավկային եւ Սրբոյ Հօրն մերոյ Գրիգորի Լուսաւորչին, եւ ամենայն Սրբոց, եղիցի յիշատակ ի Սուրբ Պատարագս, աղաչեմք:

 

 

Յիշեա՛, Տէր, եւ ողորմեա՛:

 

–––––––––––––––

 

 

 

Օրհնեալ, գովեալ եւ փառաւորեալ, հրաշալի եւ աստուածազարդ Յարութեանն (կամ՝ Ծննդեանն, կամ՝ Գալստեանն, կամ՝ Համբարձմանն, կամ՝ ... ) Քրիստոսի երկիր պագանեմք:

 

 

Փառք Յարութեան (կամ՝ ... ) Քո, Տէր:

 

 

 

Օրհնեալ, գովեալ եւ փառաւորեալ, հրաշալի եւ աստուածազարդ Տէրութեանն Քրիստոսի երկիր պագանեմք:

 

 

Փառք Տէրութեան Քո, Տէր:

 

 

 

Սուրբ եւ աստուածահաճոյ (Մարգարէին, Առաքելոյն, Հայրապետին, Մարտիրոսին, ... , Ա.Ա.), որոյ այսօր զյիշատակն կատարեցաք, եղիցի յիշատակ ի Սուրբ Պատարագս, աղաչեմք:

 

 

Յիշեա՛, Տէր, եւ ողորմեա՛:

 

–––––––––––––––

 

 

 

Յիշեա՛, Տէր, եւ ողորմեա՛, եւ օրհնեա՛ զՍուրբ, Կաթուղիկէ եւ Առաքելական Եկեղեցի Քո, զոր փրկեցեր պատուական Արեամբ Միածնի Քո, եւ ազատեցեր Խաչիւն Սրբով. շնորհեա՛ սմա զանշարժ զխաղաղութիւն:

Յիշեա՛, Տէր, եւ ողորմեա՛, եւ օրհնեա՛ զամենայն ուղղափառ Եպիսկոպոսունս, որք ուղիղ վարդապետութեամբ համառօտեն ի մեզ զբանն ճշմարտութեան:

 

 

Եւս առաւել զՍրբազան Պապն մեր զՏէր Ա.Ա. Քահանայապետ, եւ զԳերերջանիկ Պատրիարքն մեր զՏէր Ա.Ա. Կաթողիկոս, եւ զԱրհիապատիւ Առաջնորդն մեր զՏէր Ա.Ա. Արքեպիսկոպոս, շնորհեսցես մեզ ընդ երկայն աւուրս՝ ուղիղ վարդապետութեամբ:

 

 

Շնորհեա՛, Տէր:

 

 

 

Յիշեա՛, Տէր, եւ ողորմեա՛, եւ օրհնեա՛ զՔո առաջի կացեալ ժողովուրդս եւ զՊատարագիս մատուցողս, եւ պարգեւեա՛ սոցա զպիտոյսն եւ զօգտակարսն:

Յիշեա՛, Տէր, եւ ողորմեա՛, եւ օրհնեա՛ զուխտաւորս եւ զպտղաբերիչս Եկեղեցւոյ Քո Սրբոյ, եւ որք յիշեն զաղքատս ողորմածութեամբ. եւ հատո՛ նոցա զպարտս նոցա ըստ ընդաբոյս առատութեան Քո՝ հարիւրապատիկ աստ եւ ի հանդերձելումդ:

Յիշեա՛, Տէր, եւ ողորմեա՛, եւ գթա՛ ի հոգիս հանգուցելոցն, հանգո՛ զնոսին եւ լուսաւորեա՛, եւ դասաւորեա՛ ընդ Սուրբս Քո՝ յԱրքայութեանդ Երկնից, եւ արժանի արա՛ ողորմութեան Քում:

 

–––––––––––––––

 

 

Յիշեա՛, Տէր, եւ զհոգի ծառայի (կամ՝ աղախնոյ) Քո Ա.Ա. եւ ողորմեա՛ նմա՝ ըստ մեծի ողորմութեան Քում, եւ հանգո՛ այցելութեամբ ի լոյս երեսաց Քոց:

 

 

Յիշեա՛, Տէր, եւ զծառայ (կամ՝ զաղախին) Քո Ա.Ա. եւ ողորմեա՛ նմա՝ ըստ մեծի ողորմութեան Քում, եւ փրկեա՛ զնա յամենայն որոգայթից հոգւոյ եւ մարմնոյ:

 

–––––––––––––––

 

Յիշեա՛, Տէր, եւ զայնոսիկ՝ որք յանձնեցին մեզ յիշատակել յաղօթս զկենդանիս եւ զհանգուցեալս. կառավարեա՛ զկամս հայցմանց նոցա եւ զմերս՝ ընդ ուղղորդն, եւ որ լին է փրկութեամբ: Եւ վարձատրեա՛ բոլորեցունց զանանց եւ զերանելի բարութիւնսդ:

Եւ զտեալ զխորհուրդս մեր, տաճարացո՛ յընդունակութիւն Մարմնոյ եւ Արեան Միածնի Քո՝ Տեառն մերոյ եւ Փրկչին Յիսուսի Քրիստոսի: Ընդ որում Քեզ՝ Հօր Ամենակալի, հանդերձ կենդանարար եւ ազատիչ Սուրբ Հոգւովդ, վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:

 

 

Եւ եղիցի ողորմութիւն մեծիս Աստուծոյ եւ Փրկչիս մերոյ Յիսուսի Քրիստոսի ընդ ձեզ՝ ընդ ամենեսեան:

 

 

Ամէն: Եւ ընդ հոգւոյդ քում:

 

 

 

Աստուած ճշմարտութեան եւ Հայր ողորմութեան, գոհանամք զՔէն, որ ի վեր քան զերանելի նահապետացն՝ զմեր պարտաւորելոցս առաւել մեծարեցեր զբնութիւն: Վասն զի նոցա Աստուած կոչեցար, իսկ մեզ Հայր հաճեցար անուանիլ գթալով: Եւ այժմ, Տէր, աղաչեմք զՔեզ՝ զայսպիսի առ ի Քէն զնորոգ եւ զպատուական անուանադրութեանս շնորհ՝ օր ըստ օրէ պայծառացուցեալ ծաղկեցո՛ ի մէջ Եկեղեցւոյ Քում Սրբոյ:

 

 

Եւ տո՛ւր մեզ համարձակաձայն բարբառով բանալ զբերանս մեր, կարդալ զՔեզ, երկնաւորդ Հայր, երգել եւ ասել:

 

 

Հայր մեր, որ յերկինս ես.

սուրբ եղիցի Անուն Քո.

եկեսցէ Արքայութիւն Քո.

եղիցին կամք Քո, որպէս յերկինս եւ յերկրի:

Զհաց մեր հանապազորդ տո՛ւր մեզ այսօր:

Եւ թող մեզ զպարտիս մեր,

որպէս եւ մեք թողումք մերոց պարտապանաց:

Եւ մի՛ տանիր զմեզ ի փորձութիւն,

այլ՝ փրկեա՛ զմեզ ի չարէ:

 

 

 

Տէր տերանց, Աստուած աստուծոց, Թագաւոր յաւիտենական, Արարիչ ամենայն արարածոց, Հայր Տեառն մերոյ Յիսուսի Քրիստոսի, մի՛ տար զմեզ ի փորձութիւն, այլ փրկեա՛ ի չարէ, եւ ապրեցո՛ ի փորձութենէ:

 

 

Զի Քո է արքայութիւն եւ զօրութիւն եւ փառք յաւիտեանս. Ամէն: