ԺԱՄԱՄՈՒՏՆԵՐ (գրաբար)

 

 

 

Որ ի Հօրէ առաքեցար, Փրկիչ, եւ մարմնացար ի Սուրբ Կուսէն. որ վասն մեր ի յերկնից իջեր եւ լուսաւորեցեր զտիեզերս. զխաղաղութիւն Քո տուր մեզ, Տէր, որ խաղաղութեանց ես թագավոր. զխաղաղութիւն եւ զողորմութիւն, որ յամենայնի ես Դու կարող, մարդասէր:

 

 

Որ ըստ ամենայն միտս անցանէ, զխաղաղութիւն Քո, Աստուած, տուր մեզ հանապազ, զՔեզ աղաչեմք:

 

 

Ի տաճարի Սրբոց եւ յիշատակի Սրբոց Մարտիրոսաց՝ զձեռս համբառնալով աղաչեմք. բարեխօսութեամբ սոցա եւ աղօթիւք զկենդանութիւնս մեր խաղաղացո՛, Աստուած, որպէս մարդասէր:

 

 

Ճգնաւորք Քրիստոսի, որք տանջանաց անօրինացն համբերեցէք եւ զմոլութիւն կռոցն խափանեցէք, դասաւորեալք ընդ հրեշտակս ի յերկինս. որք ունիք համարձակութիւն ի Քրիստոսէ. բարեխօսեցէ՛ք կեցուցանել զանձինս մեր, զձեզ աղաչեմք:

 

 

Միածին Որդի եւ Բանդ Աստուած եւ անմահ Էութիւն, որ յանձն առեր մարմնանալ ի Սրբուհւոյ Աստուածածնէն եւ ի միշտ Կուսէն. Անփոփոխելիդ մարդ եղեալ՝ խաչեցար, Քրիստոս Աստուած, մահուամբդ զմահ կոխեցեր. մինդ ի Սրբոյ Երրորդութենէն, փառաւորակից ընդ Հօր եւ ընդ Սրբոյ Հոգւոյն, կեցո՛ զմեզ:

 

 

 

Ցնծա՛ այսօր, ցնծա՛ եւ զուարճացի՛ր, Կաթուղիկէ Սուրբ, յիշատակաւ Սրբոյն Ստեփանոսի՝ նախավկային Քրիստոսի՝ Վկայեցելոյ Հօր. որ աղօթիւք բանայր զերկինս, զոր փակեաց Ադամ, եւ հրեշտակակերպ տեսլեամբ տեսանէր զԿերպարանն Հօր ի կերպի Ադամայ նստեալ յաթոռ փառաց. որ զբազմութիւն քարանցն որպէս զծաղիկս հաւաքելով բոլորէր պսակս՝ փոխանակ փշոցն եւ եղեգանն: Եւ զմարտիրոսական արիւնն խառնէր ընդ փրկական արեանն Քրիստոսի հոսեցելոյն ի կողէն: Վասն որոյ գերազանցեալ ի փառս առաւել քան զամենայն Սուրբս, հայցեա՛ եւ մեզ ի վերնատուողէն զպարգեւս կենաց անվախճանից եւ զմեծ զողորմութիւն:

 

 

Յորովայնէ ընտրեալ Սուրբ Ստեփանոս, յորովայնէ ընտրեալ Սուրբ Ստեփանոս, վկայ ճշմարիտ առաքելական քարոզութեանցն. որ ի վերայ անօրէն քարաձգողացն աղօթէիր առ Քրիստոս Աստուած՝ մի՛ համարիր սոցա զայս ի մեղս. ի ձեռն սորին բարեխօսութեանն՝ շնորհեա՛ մեզ զմեծ Քո զողորմութիւն:

 

 

 

Աստուածածին անհարսնացեալ, զԲանն անսկիզբն յղացար եւ զԱստուածն անիմանալին ծնար. զանպարագրելին ի գիրկս քո բարձեր. Նմա անդադար բարեխօսեա՛ վասն անձանց մերոց:

 

 

Աստուածածին զքեզ խոստովանեալ երկրպագէ Եկեղեցի ուղղափառաց, քանզի ուր Քերովբէքն բազմաչեայք եւ Աթոռք հրանիւթք եւ վեցթեւեան Սերովբէքն նայել ոչ իշխէին, կրեցեր անսերմնապէս յանապականումն ի յարգանդի քում՝ որպէս աղախին զՏէր, եւ ծնար որպէս մարդ զԱստուածն բոլորից, զմարմնացեալն առ ի քէն՝ զանճառ զԲանն, ի փրկութիւն աշխարհի եւ կեանք անձանց մերոց:

 

 

Աղաչեմք զքեզ, Սուրբ Կոյս Մարիամ Աստուածածին, Բարձրելոյն զօրութեամբն հովանաւորեալ եւ Սուրբ Հոգւոյն եկաւորութեամբն լուսաւորեալ. որ զամենայն գոյութեանց զՍտեղծիչն յղացեալ ծնար անճառապէս. Մարմնացելոյն առ ի քէն բարեխօսեա՛ կեցուցանել զանձինս մեր:

 

 

 

Ծերունին այսօր Սիմէովն՝ Հոգւովն գայր ի տաճարն, երեւելով Քերովբէիցն վեհագոյն. որոց թեւօքն սաւառնեալ՝ ո՛չ իշխէին նայել ի յահեղ փառացն, սա ի գիրկս իւր բարձեալ՝ համբուրէր համարձակապէս եւ գգուէր որպէս զմանուկ, եւ աղերսելով հայցէր արձակիլ ի խաղաղութիւն:

 

 

Անսկզբնական Բանդ Աստուած, ի վերջին աւուրս յանձն առեր լինել մարդ ի Կուսէն, եւ Արարիչդ յաւիտենից փակեցար ընդ ժամանակաւ. Սուրբ, Տէր սրբութեանց եւ անկարօտ մաքրութեանց, եկիր ի տաճարն քառասնօրեայ, զօրինացն կատարեցեր զարդարութիւն. զոր բարձեալ Սիմէովնի զանպարագրելիդ ի գիրկս իւր՝ հայցէր. Որ արձակիչդ ես կապելոց, արձակեա՛ զիս ի խաղաղութիւն: Վասն որոյ ընդ ծերունւոյն Սիմէովնի վերագոչեմք առ Քեզ, Տէր. Սուրբ, Սուրբ, Սուրբ, Տէր զօրութեանց, լի են երկինք եւ երկիր փառօք Քո՝ ի փրկութիւն մեզ, Քրիստոս Աստուած, փառք Քեզ:

 

 

Գնալով փառաց Քոց ի փառս՝ Կաթուղիկէ Եկեղեցի, դիմեալք ի Սեբաստիա վերին, ուր թագաւորեալքն յԱստուծոյ նահատակին ի յամօթ եւ ի քարընկէց յերեսս բանսարկուին. քաջալերելով զմիմեանս, զի մի՛ լուծեալ ոք բաղանեօք անցաւորիս՝ պակասեսցի. այլ դողալով առաքինաբար զինքն ըղերձեալ յանիւս աստուածային գանձուցն՝ հոլովիցի, աղաղակելով առ Քրիստոս. ընկա՛լ զորդեգրութիւն ժողովոյս մերոյ ի յոյս սիրողաց Քոց. Տէր, փառք Քեզ:

 

 

Զօրական եւ վկայ ճշմարիտ, քաջ նահատակդ Քրիստոսի՝ Սուրբդ Թէոդորոս, որ փոխանակեցեր զմարմինդ ընդ հոգւոյդ քում փրկանս, եւ ո՛չ ածեր զմտաւ զսպառնալիսն Մաքսիմիանոսի թագաւորին, այլ վերին ազդեցութեամբն՝ դիտելով զայրեցումն հոգւոց նոցա, վասն այնորիկ լուցեր զտաճար կռոց նոցա: Արդ, ի յաղթող պատերազմի, տօնողացս զօր նահատակութեան քոյ՝ բարեխօսեա՛ առ Տէր վասն անձանց մերոց:

 

 

 

 

ԶՂազարու ննջումն որպէս կանխագէտ յառաջ ասէիր. զի եւ ի Բեթանիա յառաջէիր, զի յարուսցես զսիրելին Քո. եւ Քեզ գոչելով ասեմք. Օրհնեալ որ գաս ի չարչարանս, կամաւ Հօր, ի փրկութիւն անձանց մերոց:

 

 

Յորժամ եկեալ Կենարարն ի գերեզմանն Ղազարու, յորժամ եկեալ Կենարարն ի գերեզմանն Ղազարու, աւետաւոր ձայնիւն աղաղակէր ասելով. Ղազարէ՛, արի՛, ե՛կ արտաքս: Իսկ մեռեալն ի գերեզմանէն յարեաւ, եւ նոյն Ինքն զանմահութեան պարգեւսն ետ սիրելւոյն, եւ աստուածային ձայնիւն ի գերեզմանէն կոչեաց. վասն որոյ եւ մանկունք եբրայեցւոց ոստովք օրհնէին զանմահ թագաւորութիւն Քո. Ովսաննա՛, օրհնեալ է գալուստ Քո, օրհնութիւն ի բարձունս. օրհնեալ որ եկիր եւ գալոցդ ես անուամբ Տեառն:

 

 

Ցնծա՛, Երուսաղէմ, եւ զարդարեա՛ զառագաստ քո, Սիովն. քանզի ահա՛ թագաւոր քո Քրիստոս նստեալ ի յաւանակի նորոյ՝ հեզութիւն ցուցանելով, եւ գայ մտանէ յառագաստ քո, Սիովն. եւ մեք աղաղակեմք՝ Ովսաննա՛, օրհնեալ եկեալ ի յանուն Տեառն, որ ունի զմեծ զողորմութիւն:

 

 

Քրիստոս յարեաւ ի մեռելոց. մահուամբ զմահ կոխեաց, եւ յարութեամբն Իւրով մեզ կեանս պարգեւեաց. Նմա փառք, յաւիտեանս. Ամէն:

 

 

 

Ահաւոր եւ սքանչելի է խորհուրդ փրկութեան մերոյ. որ անսկիզբն ի Հօրէ՝ անճառաբար մարմնացաւ ի Կուսէն, խաչի համբերելով եւ կամաւոր մահուամբ Իւրով զկենդանութեան մեզ պարգեւեաց շնորհս:

 

 

Քանզի յարեաւ ի մեռելոց Քրիստոս Աստուած, յաւիտենից Արարիչ եւ յարութիւն ազգի մարդկան, զոր օրհնեն անդադար զինուորութիւնք հրեշտակաց եւ ամենայն զուարթունք երկնից. ընդ որս գոչելով ասեմք. Փա՜ռք սոսկալի յարութեան Քո, Տէր:

 

 

 

Հիացան վերնական բազմութիւնքն՝ տեսանելով զՔեզ ի հրեղէն կառս բազմեալ. սարսեալ ասէին. Ո՞վ է սա, որ դիմեալ գայ յԵդովմայ, եւ եկեալ մտանէ փառօք ի փառս. Տէր, փառք Քեզ:

 

 

Որ յանպատում յաթոռ նստիս եւ յանմարմնոց վերօրհնիս, անհասանելի Բանդ Աստուած, ի յերկրի երեւեցար ճշմարիտ մարդ՝ զտնօրէնութեանն կատարեալ զխորհուրդ, խաչի եւ մահու համբերեցեր. եւ զհրաշալի զյարութիւնդ Քո ցուցեր հզօր զօրութեամբ. այսօր համբարձար փառօք ի յերկինս, եւ զկուսածին մարմինդ քո հրաշափառապէս լուսազարդեցեր. զոր տեսեալ Եսայիաս՝ նախաձայնեալ ասէր. Ո՞վ է սա, որ դիմեալ գայ յերկրէ. հիացեալ պետութեանց երկնից՝ գոչէին առ միմեանս. Համբարձէ՛ք, իշխանք, զդրունս ձեր ի վեր, եւ մտցէ թագաւոր փառաց: Այլ որ յամենայնի կարօղդ ես եւ հզօր, շնորհեա՛ եւ մեզ հանդիպել Քեզ ամպովք, ի միւսանգամ Քո գալստեանդ, որ միայնդ ես մարդասէր:

 

 

 

Աստուած զՔեզ խոստովանիմք, զՍուրբ Հոգիդ, եւ երկիր պագանեմք, որ ես պատճառ կենդանութեան եղելոցս եւ խաղաղարար աշխարհի. որ զտգիտութիւն աշակերտացն բազում գիտութեամբ լցեր, եւ ի հրեղէն լեզուս բաժանեալ անճառելեօք ցուցար նոցա. աղաղակեմք, Տէր, խնայեա՛ եւ կեցո՛ զմեզ:

 

 

Այսօր ի հրեղէն լեզուս բաժանեալ հանգեար յԱռաքեալսն՝ լուսաւորելով զնոսա. եւ այժմ աղաչեմք զՔեզ, Սուրբ Աստուած, որ ես պատճառ կենդանութեան եղելոցս եւ խաղաղարար աշխարհի, խնայեա՛ եւ կեցո՛ զմեզ:

 

 

Վասն որոյ եւ մեք զՀոգին Սուրբ ընդ Հօր միաւորեալ եւ ընդ Որդւոյ միասնական խոստովանիմք, եւ հայցեմք ի վերնատուողէդ մեզ զհոգեւորական զխաղաղութիւնդ. Տէր, փա՜ռք Քեզ:

 

 

Որք ծագեցան մեզ յարեւմտից որպէս զարեգակն, եւ լուսաւորեցին համանգամայն զաշխարհս Հայաստանեայց, փարատեցին զխաւարն անգիտութեան կռապաշտութեան եւ լուսաւորեցին զամենայն հոգի հաւատով աստուածգիտութեան. սոցա բարեխօսութեամբն, Քրիստոս Աստուած, պարգեւեա՛ աշխարհի Քում զխաղաղութիւն, եւ անձանց մերոց զմեղաց զթողութիւն, որպէս մարդասէր Տէր:

 

 

Զյաղթական ձեր զհանդէս զուարճացեալ տօնէ Եկեղեցի Սուրբ, քանզի սրբութեամբ ստացայք զկուսութիւն, եւ ի մարմնի զանմարմնոցն ցուցէք զհանդէս:

 

 

Հարսնացեալք Քրիստոսի՝ երկնաւոր Փեսային, դստերք վերին Սիովնի, խնդրեցէ՛ք ի Քրիստոսէ զհաշտութիւն եւ զմեծ զողորմութիւն:

 

 

Զյառաջընթացութիւն քո եւ զկարապետութիւն Աստուծոյ Բանին խափանել կարծելով, որ ի ձեռն կնոջն զնախաստեղծն ի դրախտէն արտաքս ընկէց, նաեւ այժմ զՀերովդիադա անօրէնութեամբ բորբոքեալ, եւ բազմելոցն Հերովդիայ՝ զկաքաւս ոտից աղջկանն հաճոյացոյց, զի զքոյդ հատցէ զգլուխ, որ զամենեցուն ձեռնադրեցեր զգլուխն՝ զՔրիստոս: Այլ դու, որ յանապատէ բարբառոյ ձայն, գոչեա՛ որում ձեռնադրեցեր՝ պարգեւել զխաղաղութիւն եւ զմեծ զողորմութիւն:

 

 

Տէր, որ հիմնեցուցեր զԵկեղեցի Քո ի վերայ վիմին հաւատոյ, եւ կարգեցեր ի սմա առաքեալս, հովիւս եւ վարդապետս՝ առ ի հաստատութիւն սրբոց. եւ ճգնութեամբ վկայից զթշնամին սորա վանեցեր. ի խաղաղութեան զսա պահեա՛, Աստուած, որպէս մարդասէր:

 

 

Առաքեալք եւ վկայք Քրիստոսի Աստուծոյ, ամենակալ Հոգւոյն զօրութեամբն զամենեսեան ընդհանուր յորդեգրութիւն կենաց կոչելով՝ միասնական Սուրբ Երրորդութեանն յորդորեցին երգել զփառս, ի յաւիտեանս: Ամէն:

 

 

Զհայրապետականն զարդարեցեր զաթոռ ի յերկրի, առաքելական առեր զպատիւ յերկնուստ՝ ծառայ Քրիստոսի, ո՜վ երանելիդ ի հարս սուրբ հայրապետ, քանզի քո վարդապետութեանդ սերմանք՝ բարեպաշտութեան բուսուցին հասկս, ուրախութեան պտուղ հատուցանելով եւ հաւատացելոցս զփրկութիւն շնորհելով. վասն որոյ բարեխօսեա՛ առ Տէր վասն անձանց մերոց:

 

 

 

Որպէս յետ աստուածասէր թագաւորին Իսրայէլի Եզեկիայ՝ յարոյց Աստուած զՅովսէ, որ զամենայն կռապաշտութիւնսն ի բաց ընկէց. որպէս եւ զբարեպաշտն Կոստանդիանոս, որ զԱրիոսի զմոլումն խափանեաց. եւ զմեծն Թէոդոս յարոյց՝ աստուածային նախանձու վառեալ՝ ընդդէմ այնոցիկ, որք զՍուրբ Հոգին հայհոյէին: Արդ, ո՜վ աստուածարեալ եւ ուղղափառ սուրբ թագաւոր, աղաչեա՛ զՏէր ի փրկել զմեզ ի մարդապաշտ հայհոյութենէ, զի եւ մեք տօնեսցուք զյիշատակս քո, խնդրելով ի Քրիստոսէ զհաշտութիւն եւ զմեծ զողորմութիւն:

 

 

Որպէս յետ աստուածասէր թագաւորին Իսրայէլի Եզեկիայ՝ յարոյց Աստուած զՅովսէ, որ զամենայն կռապաշտութիւնսն հնոյ ժողովրդեանն ի բաց ընկէց. որպէս եւ ի նորումս յարոյց զանդրանիկն թագաւորաց՝ զբարեպաշտն Աբգարիոս, որ ի հեռաստանէ ծանեաւ զերկնաւոր թագաւորն՝ զՔրիստոս, եւ եղեւ քարոզ աստուածութեան Նորա ընդ ծագս տիեզերաց: Յետ նորին եւ զմեծն Տրդատիոս, որ ի սպառ հալածեաց զդիւամոլ կռապաշտութիւնսն յաշխարհէս Հայաստանեայց, եւ զարդարեաց ճշմարիտ եւ ուղղափառ հաւատով: Արդ, ո՜վ աստուածարեալ եւ բարեպաշտ սուրբ թագաւոր, աղաչեա՛ զՏէր ի փրկել զմեզ յանօրէն բռնաւորաց, զի եւ մեք տօնելով զյիշատակս քո, խնդրեսցուք ի Քրիստոսէ զխաղաղութիւն եւ զմեծ զողորմութիւն:

 

 

Զխաղաղութիւն շնորհեա՛ Եկեղեցւոյ Քում սրբոյ, զխաղաղութիւն եւ զանշարժութիւն ի թշնամեաց պատերազմէ, եւ հաստատեա՛ ի մի հաւատ զԿաթուղիկէ Եկեղեցի. զՔեզ խոստովանիմք, Տէր եւ Աստուած, կեցո՛ զմեզ:

 

 

Երեւի Տէր այսօր աշակերտացն ի Թաբորական լերինն, եւ աշակերտացն զարհուրեալ աղաղակէին ասելով. Արասցուք երիս տաղաւարս. մի Տեառն, եւ մի Մովսէսի, եւ մի Եղիայի: Եւ մեք բանաւոր հօտքս՝ երգեմք ընդ Քո ճշմարիտ վկայիցդ. առաքեա՛ ի մեզ զլոյս Քո շնորհացդ ի Քո միւսանգամ գալստեանդ, եւ կեցո՛:

 

 

Առաջի պատուական ամենայաղթ Խաչի Քո անկանիմք երկրպագելով, եւ խնդրեմք զթողութիւն յանցանաց մերոց, քանզի սովաւ բարձեր զդատապարտութիւն ազգի մարդկան: Եւ այժմ վասն սրբոյ աստուածային Քո Նշանի՝ շնորհեա՛ զերկնային զխաղաղութիւնդ ամենայն աշխարհի:

 

 

Այսօր ահաւոր ձայնք որոտման հնչեցին յերկնից ի յերկիր, կոչելով յորդեգրութիւն զձեզ, որդիք Սիովնի. հաստատութիւն հաւատոյ եւ պարծանք Եկեղեցւոյ. որք ցօղով արեան ձերոյ՝ մաքրեցէք զտիեզերս յանօրէն կռապաշտութեանց: Արդ, հայցեցէ՛ք ի Քրիստոսէ զքաւութիւն տօնողացս անուան ձերոյ. մաղթանօք սոցա, Տէր, խնայեա՛ ի փրկեալ Քո ժողովուրդս, որ միայնդ ես մարդասէր:

 

 

 

Զոր օրհնեն անլռելի ձայնիւ իմանալի զօրութիւնք, երկնաւոր նահապետութիւնք, Հրեշտակք եւ Հրեշտակապետք, Աթոռք եւ Տէրութիւնք, Իշխանութիւնք եւ Պետութիւնք, Սերովբէք եւ Քերովբէք զԱմենասուրբ զԵրրորդութիւնն, եւ զՄի Աստուածութիւն:

 

 

Այսօր երկրաւորս Եկեղեցւոյ քահանայապետութիւն ցնծայ հրաշափառապէս՝ զերկնաւոր քահանայապետութեանցն կատարելով զտօնախմբութեան տօնս. անմարմնական դասուց հոգեղինացդ՝ մարմնականքս եւ հողեղէնքս, ո՜վ Սուրբ Գաբրիէլ եւ Միքայէլ մեծք, հրեշտակապետք Բարձրելոյն, որք կայք առաջի աթոռոյ Աստուածութեանն, անդադար բարեխօս լերուք վասն մեր առ Տէր, վերաբերել զամենեսեան ընդ ձեզ յԵրկնից Արքայութիւնն եւ միաձայն բարբառով երգել զփառս:

 

 

 

Գրիգոր Սուրբ Քահանայապետ, որ զՀաւատս ուսուցեր եւ զբանակս դիւացն հալածեցեր. մարդկան ուսուցեր քարոզել զԵրրորդութիւնն. պսակեցար յԱրքայութեան. արդ, բարեխօ՛ս լեր առ Տէր վասն մեր:

 

 

Ցնծայ այսօր, ցնծայ եւ զուարճանայ Եկեղեցի Սուրբ, տօնելով մեծաւ հանդիսիւ զհանրատենչ յիշատակս քո, ո՜վ գերազանցեալդ ի հարս՝ Սուրբ Հայրապետ եւ Լուսաւորիչ տանս Թորգոմայ, Սուրբդ Գրիգորիոս: Որ քոյով անտանելի չարչարանօքդ զաշխարհս ամենայն հիացուցեր, անօրինակ ճգնութեամբդ զհրեղէնսն զարմացուցեր, որք եւ գունդ գունդ յերկնից ի յերկիր խոնարհեալ՝ ի տես հանդիսի նահատակութեանդ փութային: Եվ անհամեմատ համբերութեամբդ զգոռոզացեալ արքայն, իւրական զօրօքն, ընդ ոտիւքդ նուաճեցեր: Եւ աստուածահաճոյ աղօթիւքդ զկուրացեալ միտս նոցին լուսաւորեցեր եւ Աւետարանին Քրիստոսի պաշտօնեայս արարեր: Ընդ նմին եւ զազգս Հայոց նորոգ հոգեւոր ծննդեամբ ի լոյս աստուածգիտութեան ածեր: Վասն որոյ եւ յատկապէս լուսափայլեցար ի մէջ ամենայն սրբոց, եւ զառաքելականն ընկալար զաթոռ եւ զպատիւ, եւ ընդ նոսին պսակեցար ի Քրիստոսէ Աստուծոյ: Արդ, ո՜վ հայր մեր եւ լուսաւորիչ հոգւոց մերոց, աղաչեմք զքեզ՝ միաբան ուխտիւք Եկեղեցւոյ քո, զի յաւուրս հրաշալւոյ տօնի քո, յատկապէս բարեխօսիցես առ Քրիստոս Աստուածն մեր, զի զԵկեղեցիս եւ զմնացորդս ժողովրդեան քո պահեսցէ ի խաղաղութեան, փրկելով ի հոգեւոր եւ ի մարմնաւոր թշնամեաց. զի եւ մեք միշտ զյիշատակս քո կատարելով՝ փառաւորեսցուք զՀայր եւ զՈրդի եւ զՍուրբ Հոգին, յաւիտեանս. Ամէն:

 

 

Որ ի վերայ Քերովբէիցն հանգչիս, եւ ի զօրացն հրեղինաց օրհնաբանիս, իջեր ի Բաբելոն եւ փրկեցեր զերիս մանկունսն ի հրոյն բռնութենէ. որք աղաղակելով գոչէին երգ նոր. Ամենայն գործք, օրհնեցէք եւ բարձր արարէք. Թագաւոր փառաց Քրիստոս, եւ Արարիչ բոլորից, որ մարդասիրապէս գթացար ի սուրբ մանկունսն ի բորբոքեալ բոցոյն. որք անարգեցին զբռնութիւն թագաւորին, եւ շիջուցին զզօրութիւն հրոյն. ընդ նոսին եւ մեք Քեզ վերագոչեմք. Փրկեա՛ զմեզ ի հրոյն յաւիտենից, զի Դու միայն ես բազմագութ Տէր, Քեզ փառք, յաւիտեանս. Ամէն:

 

 

Յաշխարհական ի ճակատամարտին, յաշխարհական ի ճակատամարտին եւ ի մեծ պատերազմին, ընդդիմամարտեալ լինէր անօրինացն պատերազմ, յաղթող գտայք, ո՜վ սուրբ երանելիք: Քանզի որոց աստուածային ստացեալ էր զօրութիւն, ոչ ժուժկալէր նոցա մարմնաւորական պատերազմն: Սոցա բարեխօսութեամբ, Քրիստոս, խնայեա՛ ի մեզ եւ ողորմեա՛: