ԽՈՍՔԻ ՊԱՇՏԱՄՈՒՆՔ կամ ԵՐԱԽԱՅԻՑ ՊԱՏԱՐԱԳ (գրաբար)

 

Օրհնեալ թագաւորութիւնն Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից: Ամէն:

 

 

 

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:

 

 

Օրհնութիւն եւ փառք Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից: Ամէն:

Խաղաղութիւն ամենեցուն:

 

 

Եւ ընդ հոգւոյդ քում:

 

 

Աստուծոյ երկրպագեսցուք:

 

 

Առաջի Քո, Տէր:

 

 

Տէր Աստուած մեր, որոյ կարողութիւնդ անքնին է եւ փառքդ անհասանելի, որոյ ողորմութիւնդ անչափ է եւ գթութիւնդ անբաւ. Դու ըստ առատ մարդասիրութեան Քում նայեա՛ց ի ժողովուրդս Քո եւ ի տաճարս յայս սուրբ: Եւ արա՛ ընդ մեզ եւ ընդ աղօթակիցս մեր առատապէս զողորմութիւն Քո եւ զգթութիւն: Զի Քեզ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից: Ամէն:

 

 

Որ հասարակաց զայս եւ միաձայն մեզ ամենեցուն ուսուցեր աղօթել, եւ զերկուց եւ զերից միաձայնելոց յԱնուն Քո զխնդրուածս պարգեւել խոստացար. Դու եւ այժմ զծառայից Քոց զխնդրուածս առ ի յօգուտն կատարեա՛, շնորհելով մեզ յայսմ յաւիտենիս զգիտութիւն Քումդ Ճշմարտութեան, եւ ի հանդերձեալսն զկեանսն յաւիտենականս պարգեւելով: Զի բարերար եւ մարդասէր ես, Աստուած, եւ Քեզ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից: Ամէն:

 

Տէր Աստուած մեր, որ կարգեցեր յերկինս զդասս եւ զինուորութիւնս հրեշտակաց եւ հրեշտակապետաց ի սպասաւորութիւն փառաց Քոց, արա՛ այժմ ընդ մուտս մեր մտանել եւ սրբոց հրեշտակաց, եւ լինել պաշտօնակից մեզ եւ փառաբանակից Քումդ բարերարութեան:

 

 

Զի Քո է կարողութիւն եւ զօրութիւն եւ փառք յաւիտեանս: Ամէն:

 

 

Պռօսխումէ:

 

 

Սուրբ Աստուած, Սուրբ եւ Հզօր, Սուրբ եւ Անմահ, ... ... ... , ողորմեա՛ մեզ:

 

Խաչի, Եկեղեցւոյ, Սրբոց տօնից, Պահոց. – ... որ խաչեցար վասն մեր ... :

Զատկի Յարութեան, Յինանց, Կիւրակամտից եւ Կիւրակէից. – ... որ յարեար ի մեռելոց ... :

Ծննդեան Տեառն եւ Յայտնութեան. – ... որ ծնար եւ յայտնեցար ... :

Տնօրէնութեան, Աւետման. – ... որ մարմնացար վասն մեր ... :

Տեառնընդառաջին, Ծաղկազարդին եւ Աւագ ԲՇ., ԳՇ., ԴՇ., ԵՇ.. – ... որ եկիր եւ գալոցդ ես ... :

Համբարձման. – ... որ համբարձար փառօք առ Հայր ... :

Հոգեգալստեան. – ... որ եկիր եւ հանգեար յԱռաքեալսն ... :

Վարդավառին. – ... որ յայտնեցար ի Թաբոր լերինն ... :

Վերափոխման. – ... որ եկիր ի փոխումն Մօր Քո եւ Կուսի ... :

 

 

 

Աստուած Սուրբ, որ ի Սուրբս հանգուցեալ ես, եւ երեքսրբեան ձայնիւ սերովբէք գովեն զՔեզ, եւ քերովբէք փառաբանեն, եւ ամենայն երկնային զօրութիւնքն Քեզ երկիր պագանեն: Որ ի չգոյէ ի գոյ ածեր զամենայն արարածս: Որ արարեր զմարդն՝ ըստ պատկերի Քում եւ նմանութեան, եւ ամենայն շնորհիւ Քով զնա զարդարեցեր, եւ ուսուցեր խնդրել զիմաստութիւն եւ զզգօնութիւն. եւ ոչ անտես արարեր զմեղուցեալն, այլ եդիր ի վերայ նորա զապաշխարութիւն փրկութեան: Որ արժանի արարեր զմեզ՝ զնուաստացեալ եւ զանարժան ծառայքս Քո ի ժամուս յայսմիկ կալ առաջի փառաց սրբութեան սեղանոյ Քո, եւ զօրինաւոր երկրպագութիւն եւ զփառաբանութիւն մատուցանել Քեզ: Դու, Տէր, ընկա՛լ ի բերանոյ մեղաւորացս զերեքսրբեան օրհնութիւնս, եւ պահեա՛ զմեզ Քոյին քաղցրութեամբդ: Թո՛ղ մեզ զամենայն յանցանս մեր՝ զկամայ եւ զակամայ: Սրբեա՛ զհոգի, զմիտս եւ զմարմինս մեր. եւ շնորհեա՛ ի սրբութեան պաշտել զՔեզ զամենայն աւուրս կենաց մերոց, բարեխօսութեամբ Սրբուհւոյ Աստուածածնին եւ ամենայն Սրբոց Քոց, որք յաւիտենից Քեզ բարեհաճոյացան: Զի Սուրբ ես, Տէր Աստուած մեր, եւ Քեզ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:

 

Տէր Աստուած մեր, զբազկատարած զաղաչանս ծառայից Քոց վերընկալցիս, եւ ողորմեսցիս ըստ մեծի ողորմութեան Քում: Զգթութիւն Քո առաքեա՛ ի վերայ մեր եւ ամենայն ժողովրդեանս, որք ակն ունին առ ի Քէն առատ ողորմութեանդ:

 

 

Զի ողորմած եւ մարդասէր ես, Աստուած գոլով, եւ Քեզ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:

 

 

 

Ալէլուիա, Ալէլուիա, Ալէլուիա: ... ... ...

Ալէլուիա: Օրթի՛:

 

 

Խաղաղութիւն ամենեցուն:

 

 

Եւ ընդ հոգւոյդ քում:

Երկիւղածութեամբ լուարուք:

 

 

Սրբոյ Աւետարանիս Յիսուսի Քրիստոսի որ ըստ Մատթէոսի (կամ՝ Մարկոսի, Ղուկասու, Յովհաննու):

 

 

Փառք Քեզ, Տէր Աստուած մեր:

Պռօսխումէ:

Ասէ Աստուած:

 

 

Տէրն մեր Յիսուս Քրիստոս ասէ:

 

 

Փառք Քեզ, Տէր Աստուած մեր:

 

 

Հաւատամք ի մի Աստուած՝ Հայրն ամենակալ, յարարիչն երկնի եւ երկրի՝ երեւելեաց եւ աներեւութից:

Եւ ի մի Տէր Յիսուս Քրիստոս, յՈրդին Աստուծոյ, ծնեալն յԱստուծոյ Հօրէ՝ Միածին, այսինքն՝ յէութենէ Հօր: Աստուած յԱստուծոյ, լոյս ի լուսոյ, Աստուած ճշմարիտ յԱստուծոյ ճշմարտէ, ծնունդ եւ ոչ արարած: Նոյն Ինքն ի բնութենէ Հօր, որով ամենայն ինչ եղեւ յերկինս եւ ի վերայ երկրի՝ երեւելիք եւ աներեւոյթք: Որ յաղագս մեր՝ մարդկան, եւ վասն մերոյ փրկութեան, իջեալ ի յերկնից՝ մարմնացաւ, մարդացաւ, ծնաւ կատարելապէս ի Մարիամայ սրբոյ Կուսէն՝ Հոգւովն Սրբով: Որով էառ մարմին, հոգի եւ միտք, եւ զամենայն որ ինչ է ի մարդ, ճշմարտապէս եւ ոչ կարծեօք: Չարչարեալ, խաչեալ, թաղեալ, յերրորդ աւուր յարուցեալ, ելեալ ի յերկինս նովին մարմնովն, նստաւ ընդ աջմէ Հօր: Գալոց է նովին մարմնովն եւ փառօք Հօր՝ ի դատել զկենդանիս եւ զմեռեալս: Որոյ թագաւորութեանն ոչ գոյ վախճան:

Հաւատամք եւ ի Սուրբ Հոգին՝ յանեղն եւ ի կատարեալն: Որ խօսեցաւ յՕրէնս եւ ի Մարգարէս եւ յԱւետարանս: Որ էջն ի Յորդանան, քարոզեաց յԱռաքեալսն եւ բնակեցաւ ի Սուրբսն:

Հաւատամք եւ ի մի միայն, ընդհանրական եւ առաքելական սուրբ Եկեղեցի: Ի մի Մկրտութիւն՝ յապաշխարութիւն, ի քաւութիւն եւ ի թողութիւն մեղաց: Ի յարութիւն մեռելոց: Ի դատաստանսն յաւիտենից հոգւոց եւ մարմնոց: Յարքայութիւնն երկնից եւ ի կեանսն յաւիտենականս:

 

 

 

Իսկ մեք փառաւորեսցուք՝ որ յառաջ քան զյաւիտեանս՝ երկիր պագանելով Սրբոյ Երրորդութեան եւ մի Աստուածութեան՝ Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից. Ամէն:

 

 

Տէր մեր եւ Փրկիչ Յիսուս Քրիստոս, որ մեծդ ես ողորմութեամբ եւ առատ պարգեւօք բարերարութեան Քո: Որ Դու Քոյին կամաւ ի ժամուս յայսմիկ համբերեցեր չարչարանաց, խաչի եւ մահու յաղագս մեղաց մերոց, եւ պարգեւեցեր առատապէս զպարգեւս Հոգւոյդ Սրբոյ երանելի Առաքելոցն: Հաղորդս արա՛ եւ զմեզ, Տէր, աղաչեմք զՔեզ, աստուածային պարգեւացդ՝ թողութեան մեղաց եւ ընդունելութեան Հոգւոյդ Սրբոյ:

 

 

Որպէս զի արժանաւորք եղիցուք գոհութեամբ փառաւորել զՔեզ ընդ Հօր եւ ընդ Սրբոյ Հոգւոյդ, այժմ եւ միշտ եւ յաւիտեանս յաւիտենից. Ամէն:

Խաղաղութիւն ամենեցուն:

 

 

Եւ ընդ հոգւոյդ քում:

 

 

Աստուծոյ երկրպագեսցուք:

 

 

Առաջի Քո, Տէր:

 

 

Խաղաղութեամբ Քով, Քրիստոս Փրկիչ մեր, որ ի վեր է քան զամենայն միտս եւ զբանս, ամրացո՛ զմեզ եւ աներկիւղ պահեա՛ յամենայն չարէ: Հաւասարեա՛ զմեզ ընդ ճշմարիտ երկրպագուս Քո, որք հոգւով եւ ճշմարտութեամբ Քեզ երկիր պագանեն: Վասն զի Ամենասուրբ Երրորդութեանդ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:

Օրհնեալ Տէր մեր Յիսուս Քրիստոս:

 

 

Ամէն: Օրհնեա՛, Տէր:

 

 

Տէր Աստուած օրհնեսցէ զամենեսեան:

 

 

Ամէն: