ՀՈԳԵՀԱՆԳՍՏԻ ԿԱՐԳ (աշխարհաբար)

 

 

 

Խաղաղության համար, հատկապես, Տիրոջն աղաչենք. ընդունիր, կյանք տուր և ողորմիր:

 

 

 

Օրհնությո՜ւն և փա՜ռք Հորը և Որդուն և Սուրբ Հոգուն, այժմ և միշտ և հավիտյանս հավիտենից: Ամեն:

 

 

 

Դու, որ գոյություն ունեցող ամենքի և ամեն ինչի ստեղծողն ես անէությունից, Հոր արարչակից՝ Բան Աստված, թողություն շնորհիր Քո ննջեցյալ ծառաներին, երբ գաս դատելու նրանց, որոնց անարատ ձեռքերով ստեղծեցիր:

Դու, որ Հորից առաքվեցիր և մարմնացար Սուրբ Կույսից, թողություն շնորհիր Քո ննջեցյալ ծառաներին, երբ գաս դատելու նրանց, որոնց անարատ ձեռքերով ստեղծեցիր:

Դու, որ խաչի վրա անշնչացար, [և] մահվան իշխանությունը կործանեցիր, թողություն շնորհիր Քո ննջեցյալ ծառաներին, երբ գաս դատելու նրանց, որոնց անարատ ձեռքերով ստեղծեցիր:

Դու, որ թագադրողն ես Քո սրբերի և անվախճան բարիքներ բաշխողն ես, թողություն շնորհիր Քո ննջեցյալ ծառաներին, երբ գաս դատելու նրանց, որոնց անարատ ձեռքերով ստեղծեցիր:

 

 

Գթա՜, Տեր, մեր ննջեցյալների հոգիներին և հիշի՜ր նրանց ողորմությամբ, քանի որ Քո Սուրբ Արյան գինն են, երբ շեփորի հրաշալի ձայնը լսելով՝ մեռյալները հարություն կառնեն և կկանգնեն Քո ահավոր դատարանի առաջ⁽¹⁾:

Փա՜ռք Հորը և Որդուն և Սուրբ Հոգուն, այժմ և միշտ և հավիտյանս հավիտենից: Ամեն:

Սուրբ Ավազանից ծննդյամբ լուսավորվածներիս մի՛ նախատիր բարկությամբ և մի՛ հանդիմանիր Քո սրտմտությամբ, երբ շեփորի հրաշալի ձայնը լսելով՝ մեռյալները հարություն կառնեն և կկանգնեն Քո ահավոր դատարանի առաջ:

 

 

 

[Նեղությանս անդնդի] խորքից աղաղակեցի առ Քեզ, Տեր. Տե՜ր, լսի՜ր իմ ձայնը:

Թող որ ականջներդ լսեն ձայնն իմ աղոթքի:

Եթե անօրենություններն իմ քննես, Տեր, Տե՜ր, իսկ ո՞վ կարող է կանգնել Քո առաջ, քանի որ Քեզնից է քավությունը:

Քո անվան համար համբերեցի ես, Տեր, Քո խոսքին սպասեց իմ անձը. հուսաց անձս Տիրոջը:

Վաղ առավոտից մինչև երեկո, վաղ առավոտից հուսաց Իսրայելը Տիրոջը:

Տիրոջից է առատ ողորմությունը, Նրանից է փրկությունը, և Նա փրկեց Իսրայելը նրա բոլոր նեղություններից:

 

 

Ալելուիա: Ոտքի՛:

 

 

Խաղաղությո՜ւն բոլորին:

 

 

Նաև քո հոգուն:

Երկյուղածությա՛մբ լսեք:

 

 

Հիսուս Քրիստոսի Սուրբ Ավետարանն ըստ Մատթեոսի (կամ՝ Մարկոսի, Ղուկասի, Հովհաննեսի):

 

 

Փա՜ռք Քեզ, Տեր Աստված մեր:

Ուշադրությո՛ւն:

Աստծո խոսքն է:

 

 

Մեր Տեր Հիսուս Քրիստոսը ... ... ... :

 

 

 

 

 

Երկնավորներին և երկրայիններին գերագույն շնորհներ բաշխող,

Կյա՛նք և կյանք տվո՛ղ Հոգի, Հորը և Որդուն արարչակից.

Խնդրում ենք Քեզնից, Աղբյո՜ւր բարիքների, Հագեցնո՜ղ ծարավածների,

Ողորմիր Քո այս արարածին, որ ննջել է Քո հանդեպ հույսով լի:

 

Կյանք Կյանքից, Լույս Լույսից, որ ստեղծեցիր մեզ հողից,

[Ապա] դարձյալ նորոգեցիր Սուրբ Ավազանից կրկին ծննդյամբ.

Նրան, ում Քո շնորհով փրկեցիր այն առաջին մահվանից,

Քո Հոր լուսեղեն օթևաններում մեր այս ննջեցյալին հանգստացրու:

 

Երկնային զորքերն ուրախությամբ իջնում էին երկնքից երկիր,

Երբ հարություն առար մեռելներից, և իբրև լույս ծագեցիր արարածների համար.

Քո կենարար Սուրբ Հարությամբ՝ հարություն տուր սրան անմահ կյանքի,

Լի լապտերներով մտցրու առագաստ՝ իմաստուն սուրբ կույսերի հետ:

 

Քահանաներ և ժողովուրդ՝ հայցում ենք Քեզնից, Տեր բարեգութ,

Հավատքով ննջածների հետ մեզ էլ ընդունիր նույն հույսով

Վերին քաղաք Երուսաղեմ, ուր արդարներն են հավաքվում,

Նրանց հետ միշտ փառաբանություններ վերերգել Երրորդությանդ Եռյակ Անձին:

 

 

Վերին Երուսաղեմում, հրեշտակների բնակարաններում,

Ուր Ենոքն ու Եղիան բնակվում են աղավնակերպ ծերացած,

Եդեմական դրախտում արժանապես պայծառացած.

Ողորմա՜ծ Տեր, ողորմիր մեր ննջեցյալների հոգիներին:

 

 

Հանգուցյալների հոգիներին, Քրիստոս Աստված, հանգիստ և ողորմություն պարգևիր, և մեզ էլ՝ մեղավորներիս, շնորհիր թողություն մեր հանցանքներին:

 

 

Խաղաղության համար, հատկապես, Տիրոջն աղաչենք:

Հանգուցյալ հոգիների համար աղաչենք մեր Փրկչին՝ Քրիստոսին, որպեսզի նրանց արդարների հետ դասի և մեզ էլ փրկի շնորհիվ Իր ողորմության:

Ամենակալ Տեր Աստված մեր, կյանք տուր և ողորմիր:

 

 

Տեր, ողորմի՜ր. Տեր, ողորմի՜ր. Տեր, ողորմի՜ր:

Քրիստոս, Աստծո անոխակալ և բարեգութ Որդի, Քո արարչական սիրովդ գթա՜ Քո հանգուցյալ ծառա (կամ՝ աղախին) Ա.Ա.-ի հոգուն: Հիշիր նրան Արքայութեանդ փառահեղ գալստյան օրը. արժանացրու ողորմության, մեղքերի քավության և թողության. դասիր նրան Քո Սրբերի հետ և պայծառացրու աջակողմյան դասում: Քանի որ Դու ես բոլորի Տերն ու Արարիչը, Դատավորը ողջերի ու մեռյալների. և Քեզ վայելում է փա՜ռք, իշխանությո՜ւն և պատիվ, այժմ և միշտ և հավիտյանս հավիտենից: Ամեն:

 

 

Այս Սուրբ Խաչով աղաչենք Տիրոջը, որպեսզի սրանով փրկի մեզ մեղքերից և կյանք տա շնորհիվ Իր ողորմության:

Ամենակալ Տեր Աստված մեր, կյանք տուր և ողորմիր:

 

 

Պահպանիչ և հույս հավատացյալների, Քրիստոս Աստված մեր, Քո սուրբ և պատվական Խաչիդ հովանու ներքո՝ պահպանիր Քո ժողովուրդը խաղաղության մեջ. փրկիր տեսանելի և անտեսանելի թշնամուց. արժանավորիր գոհությամբ փառավորել Քեզ Հոր և Սուրբ Հոգուդ հետ, այժմ և միշտ և հավիտյանս հավիտենից: Ամեն:

 

 

Օրհնյա՜լ Տեր մեր Հիսուս Քրիստոս: Ամեն:

 

 

Հայր մեր, որ երկնքում ես.

սուրբ թող լինի Քո Անունը.

թող գա Քո Արքայությունը.

թող Քո կամքը լինի երկրի վրա այնպես,

ինչպես որ երկնքում է:

Մեր ամենօրյա հացը տուր մեզ այսօր:

Եվ ներիր մեզ մեր պարտքերը,

Ինչպես մենք էլ մեզ պարտք եղողներին ենք ներում:

Եվ մեզ միայնակ մի՛ թող փորձության մեջ,

այլ՝ փրկիր մեզ չարից:

Քանի որ Քոնն են արքայությունը և զորությունը և փառքը հավիտյանս: Ամեն:

 

 

Օրհնելու եմ Տիրոջը ամեն ժամ, ամեն ժամ Նրա օրհնությունն իմ բերանում է լինելու:

 

 

 

Օրհնված եղեք Սուրբ Հոգու շնորհներով, գնացեք խաղաղությամբ, և թող որ Տերը ձեր բոլորիդ հետ լինի: Ամեն: