ԿԱՆՈՆ ԱՊԱՇԽԱՐՈՒԹՅԱՆ ՍՈՒՐԲ ԽՈՐՀՐԴԻ (գրաբար)

Ա Ա Ա

ԿԱՆՈՆ ՍՈՒՐԲ ԽՈՐՀՐԴՈՅ ԱՊԱՇԽԱՐՈՒԹԵԱՆ

Քահանայն հաւանեալ առ ի լսել զխոստովանութիւն հաւատացելոց,

նստի յատենի խոստովանութեան՝ զգեցեալ ուրար.

եւ ապաշխարողն մատչի առ նա, եւ ծունր կրկնէ յորոշեալ տեղւոջ ատենին,

եւ կնքեն զինքեանս նշանաւ Սուրբ Խաչի։

Եւ ապաշխարողն ասէ.

Խոստովանիմ առաջի Աստուծոյ ամենակարողի, եւ երանուհւոյ Մարիամու միշտ Կուսին, երանելւոյն Միքայէլի Հրեշտակապետին, երանելւոյն Յովհաննու Մկրտչի, Սրբոց Առաքելոցն Պետրոսի եւ Պօղոսի, եւ Սրբոյ Հօրն մերոյ Գրիգորի Լուսաւորչին եւ ամենայն Սրբոց, եւ առաջի քո, Հայր Սուրբ, քանզի մեղայ յոյժ՝ խորհրդով, բանիւ եւ գործով. վա՜յ ինձ, վա՜յ ինձ եւ յաւէտ վա՜յ ինձ:

Եւ ապա զղջացեալ սրտիւ խոստովանի որիշ որիշ զմեղսն յանուանէ։ Իսկ քահանայն ըստ չորից պաշտամանց իւրոց՝ հօր, դատաւորի, ուսուցչի եւ բժշկի, ընդունի քաղցրութեամբ եւ մարդասիրութեամբ, քննէ եւ դատէ առանց ակնածութեան, ուսուցանէ իմաստութեամբ եւ ճշդութեամբ, դարմանէ ըստ պիտոյից եւ խոհեմութեամբ։ Եւ երբ գտանէ զնա արժանի շնորհի արձակման, կամ յետ տրամադրելոյ զնա առ այն, դնէ ի վերայ զպատշաճական ապաշխարանս՝ ըստ չափու եւ որպիսութեան յանցանացն, եւ կարողութեան յանցաւորին, զորս ապաշխարողն պարտի յանձն առնուլ առ ի կատարել զայնս անթերի։

Յետ այսորիկ կրկնէ ապաշխարողն զզղջումն եւ զառաջադրութիւն իւր՝ ասելով ի գրաբար կամ յաշխարհիկ բարբառ զներգործութիւն զղջման։

Առ ի դիւրութիւն դնի աստ ձեւ մի ներգործութեան զղջման։

Ով Աստուած իմ, վասն զի Դու անբաւ բարի ես, եւ զի սիրեմ զՔեզ ի վեր քան զամենայն, ճշմարիտ սրտիւ զղջամ եւ ցաւիմ վասն վշտացուցանելոյ իմ զՔեզ. եւ հաստատութեամբ առաջադրեմ Քոյին սուրբ օգնականութեամբդ այլ ոչ եւս այսուհետեւ վշտացուցանել զՔեզ եւ խորշել ի մասնաւորի յառթից մեղաց:

Ապա քահանայն տացէ զարձակումն ի մեղաց՝ ասելով զձեւն այսպէս.

Ողորմեսցի քեզ մարդասէրն Աստուած, եւ թողութիւն շնորհեսցէ ամենայն յանցանաց քոց, խոստովանեցելոցդ եւ մոռացելոցդ: Եւ ես կարգաւս քահանայական իշխանութեան եւ հրամանաւն աստուածային, թէ՝ զոր արձակիցէք յերկրի, եղիցի արձակեալ յերկինս. նովին բանիւն ես արձակեմ զքեզ յամենայն մասնակցութենէ մեղաց քոց, ի խորհրդոց, ի բանից եւ ի գործոց, յանուն Հօր եւ Որդւոյ եւ Հոգւոյն Սրբոյ. Ամէն:

Եւ դարձեալ տամ զքեզ ի խորհուրդս Սուրբ Եկեղեցւոյ, զի զոր ինչ գործեսցես բարիս՝ եղիցի քեզ ի բարեգործութիւն եւ ի փառս հանդերձեալ կենացն. Ամէն:

Իսկ ի ստիպել ծանր ինչ հարկի՝ ի վտանգի մահու, կարող է քահանայն կարճատել զձեւն արձակման՝ այսպէս.

Ես արձակեմ զքեզ յամենայն դատակնքոց եւ ի մեղաց, յանուն Հօր եւ Որդւոյ եւ Հոգւոյն Սրբոյ. Ամէն:

Քահանայն՝ եթէ գտցէ զապաշխարողն անկեալ ընդ դատակնքովք կամ ընդ վերապահութեամբք՝ յորոց ինքնին չկարասցէ արձակել զնա, մի՛ յառաջ քան զընդունելն զկարեւորն իշխանութիւն ի մեծաւորէն՝ արձակեսցէ զնա, բայց եթէ ի կէտ մահու։

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։