ԲՈՒՆ ՊԱՏԱՐԱԳ (գրաբար)

 

 

Ոչ ոք արժանի է յըմբռնելոցս մարմնաւոր ախտիւք եւ ցանկութեամբ մատչել ի սեղան Քո, կամ սպասաւորել արքունական փառաց Քոց. քանզի պաշտել զՔեզ՝ մեծ եւ ահաւոր երկնաւոր զօրութեանցդ իսկ է: Սակայն վասն անչափ բարերարութեանդ Քո, անպարագրելի Բանդ Հօր եղեր մարդ, եւ Քահանայապետ մեր երեւեցար: Եւ իբր Տէր ամենեցուն՝ այսմ սպասաւորութեան եւ անարիւն զենման զքահանայութիւն աւանդեցեր մեզ: Վասն զի Դու ես Տէր Աստուած մեր, որ տիրես երկնաւորաց եւ երկրաւորաց: Որ ի վերայ քերովբէական աթոռոյ բազմիս՝ սերովբէից Տէր, եւ Թագաւորդ Իսրայէլի: Որ միայն Սուրբդ ես, եւ ի Սուրբս հանգուցեալ: Աղաչեմ զՔեզ, միայն բարերար եւ հեշտալուր, նայեա՛ յիս ի մեղուցեալ եւ յանպիտան ծառայս Քո, եւ սրբեա՛ զհոգի եւ զմիտս իմ յամենայն պղծութենէ չարին: Եւ բաւականացո՛ զիս զօրութեամբ Սուրբ Հոգւոյդ, որ զգեցեալ եմ զքահանայականս շնորհ, կալ առաջի Սրբոյ Սեղանոյս, եւ քահանայագործել զՔո անարատ Մարմինդ եւ զպատուական Արիւնդ:

Քեզ խոնարհեցուցեալ զպարանոցս իմ, մաղթեմ՝ մի՛ դարձուցաներ զերեսս Քո յինէն, եւ մի՛ մերժեր զիս ի ծառայից Քոց. այլ արժանի արա՛ մատուցանել Քեզ զընծայս զայս յինէն ի մեղուցեալ եւ յանարժան ծառայէս Քումմէ. վասն զի Դու ես, որ մատուցանես եւ մատչիս եւ ընդունիս եւ տաս, Քրիստոս Աստուած մեր: Եւ Քեզ փառս մատուցանեմք՝ հանդերձ անսկիզբն Հարբդ, եւ ամենասուրբ եւ բարերար Հոգւովդ, այժմ եւ միշտ եւ յաւիտեանս յաւիտենից. Ամէն:

 

 

Լուացայց սրբութեամբ զձեռս իմ, եւ շուրջ եղէց զսեղանով Քով, Տէր:

 

 

Տէր Աստուած զօրութեանց եւ Արարիչ ամենայն լինելութեանց, որ յանէութենէ զբնաւս ի ցուցակութիւն ածեալ գոյացուցեր: Որ եւ զմեր հողեղէն բնութիւնս պատուեալ մարդասիրապէս՝ այսպիսի ահաւոր եւ անպատում խորհրդոյ կարգեցեր սպասաւորս: Դու, Տէր, որում պատարագեմք զպատարագիսս, ընկա՛լ առ ի մէնջ զառաջադրութիւնս զայս, եւ աւարտեա՛ զսա ի խորհրդականութիւն Մարմնոյ եւ Արեան Միածնի Քո. դեղ թողութեան մեղաց պարգեւեա՛ ճաշակողացս՝ զհացս զայս եւ զբաժակս:

 

 

Շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի, ընդ որում Քեզ Հօր, միանգամայն եւ Հոգւոյդ Սրբոյ, վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:

Խաղաղութիւն ամենեցուն:

 

 

Եւ ընդ հոգւոյդ քում:

 

 

Աստուծոյ երկրպագեսցուք:

 

 

Առաջի Քո, Տէր:

 

 

Ողջո՛յն տուք միմեանց ի համբոյր սրբութեան. եւ որք ոչ էք կարողք հաղորդիլ աստուածային խորհրդոյս եւ առ դրունս էք, աղօթեցէ՛ք:

 

 

Քրիստոս ի մէջ մեր յայտնեցաւ,

Որ Էնն Աստուած աստ բազմեցաւ:

Խաղաղութեան ձայն հնչեցաւ,

Սուրբ ողջունիս հրաման տուաւ:

Եկեղեցիս մի անձն եղեւ,

Համբոյրս յօդ լրման տուաւ:

Թշնամութիւնն հեռացաւ,

Սէրն ընդ հանուրս սփռեցաւ:

Արդ՝ պաշտօնեայք, բարձեալ զձայն,

Տուք օրհնութիւն ի մի բերան,

Միասնական Աստուածութեանն,

Որում սրովբէքն են սրբաբան:

 

 

Ահիւ կացցուք, երկիւղիւ կացցուք, բարւոք կացցուք, եւ նայեցարուք զգուշութեամբ:

 

 

Առ Քեզ, Աստուած:

 

 

Պատարագ Քրիստոս մատչի Գառն Աստուծոյ:

 

 

Ողորմութիւն եւ խաղաղութիւն եւ Պատարագ օրհնութեան:

 

 

Շնորհք, սէր եւ աստուածային սրբարար զօրութիւնն Հօր եւ Որդւոյ եւ Հոգւոյն Սրբոյ եղիցի ընդ ձեզ՝ ընդ ամենեսեան:

 

 

Ամէն: Եւ ընդ հոգւոյդ քում:

 

 

Ի վեր ընծայեցուցէք զմիտս ձեր աստուածային երկիւղիւ:

 

 

Ունիմք առ Քեզ, Տէր ամենակալ:

 

 

Եւ գոհացարուք զՏեառնէ բոլորով սրտիւ:

 

 

Արժան եւ իրաւ:

 

 

 

Արժան է ստուգապէս եւ իրաւ ամենայորդոր փութով միշտ երկիր պագանելով փառաւորել զՔեզ, Հայր ամենակալ: Որ Քոյին անզննելի եւ արարչակից Բանիւդ զանիծիցն բարձեր զկրճիմն: Որ ժողովուրդ Ինքեան առեալ զԵկեղեցի սեպհականեաց զհաւատացեալս ի Քեզ: Եւ զննելի բնութեամբ ըստ ի Կուսէն տնտեսութեան՝ հաճեցաւ բնակիլ ի մեզ: Եւ նորագործ աստուածապէս ճարտարապետեալ՝ զերկիրս երկին արար: Վասն զի որում ոչն հանդուրժէին առաջի կալ զուարթնոցն ջոկք՝ զարհուրեալք ի փայլակնացայտ եւ յանմատոյց լուսոյ աստուածութեանդ, եղեալ այսպիսիդ մարդ յաղագս մերոյ փրկութեան, շնորհեաց մեզ ընդ երկնայինսն պարել զհոգեղէն պարս:

 

 

Եւ ընդ սերովբէսն եւ ընդ քերովբէսն միաձայն սրբասացութեամբ յօրինել նուագս, եւ համարձակապէս գոչելով՝ աղաղակել ընդ նոսին եւ ասել.

 

 

Սուրբ, սուրբ, սուրբ, Տէր զօրութեանց,

Լի են երկինք եւ երկիր փառօք Քո.

Օրհնութիւն ի բարձունս:

Օրհնեալ որ եկիր եւ գալոցդ ես Անուամբ Տեառն.

Ովսաննա՛ ի բարձունս:

 

 

 

Սուրբ, սուրբ, սուրբ ես ճշմարտապէս եւ ամենասուրբ, եւ ո՛վ ոք պանծասցի բովանդակել բանիւ զՔո ի մեզ զանբաւ բարեգորովութեանդ զեղմունս: Որ եւ անդէն իսկ ի նախնումն, զանկեալն ընդ մեղօք՝ զանազան եղանակօք խնամեալ սփոփեցեր. մարգարէիւք, օրինացն տուչութեամբ, քահանայութեամբ եւ ստուերակերպ երնջոցն մատուցմամբ: Իսկ ի վախճան աւուրցս այսոցիկ՝ զբովանդակ իսկ զպարտեաց մերոց խզեալ զդատակնիք, ետուր մեզ զՈրդիդ Քո Միածին՝ պարտապան եւ պարտս, զենումն եւ օծեալ, Գառն եւ երկնաւոր Հաց, քահանայապետ եւ պատարագ: Վասն զի Ինքնդ է բաշխող եւ նոյն Ինքնդ բաշխի ի միջի մերում միշտ անծախապէս: Վասն զի եղեալ հաւաստեաւ եւ առանց ցնորից մարդ, եւ անշփոթ միութեամբ մարմնացեալ յԱստուածածին եւ ի սուրբ Կուսէն Մարիամայ, ճանապարհորդեաց ընդ ամենայն կիրս մարդկային կենցաղոյս՝ առանց մեղաց, եւ յաշխարհակեցոյց եւ յառիթն փրկութեան մերոյ՝ եկեալ կամաւ ի խաչն:

Առեալ զհացն ի սուրբ, յաստուածային, յանմահ, յանարատ եւ յարարչագործ ի ձեռս Իւր՝ օրհնեաց, գոհացաւ, եբեկ, ետ Իւրոց ընտրեալ, սուրբ եւ բազմեալ աշակերտացն՝ ասելով.

 

 

 

 

Ամէն:

 

 

 

Նոյնպէս եւ զբաժակն առեալ՝ օրհնեաց, գոհացաւ, էարբ, ետ Իւրոց ընտրեալ, սուրբ եւ բազմեալ աշակերտացն՝ ասելով.

 

 

 

 

Ամէն:

 

 

 

Եւ զսոյն միշտ Իւր յիշատակ առնել պատուիրան աւանդեաց մեզ բարերար Որդիդ Քո Միածին: Եւ իջեալ ի ստորին վայրս մահու մարմնովն՝ զոր ի մերմէս ընկալաւ յազգակցութենէ: Եւ զնիգս դժոխոցն աղարտեալ հզօրեղապէս, զՔեզ միայն ծանոյց մեզ ճշմարիտ Աստուած, զԱստուածդ կենդանեաց եւ մեռելոց:

 

 

Եւ արդ՝ մեք, Տէր, ըստ այսմ հրամանատրութեան՝ յառաջ բերեալ զայս խորհուրդ փրկական Մարմնոյ եւ Արեան Միածնի Քո, յիշեմք զԴորա՝ որ վասն մեր զփրկագործ չարչարանսն, զկենդանատու խաչելութիւնն, զերեքօրեայ զթաղումն, զերանելի յարութիւնն, զաստուածապէս համբարձումն, զնստիլն ընդ աջմէ Քո, Հայր, զահաւոր եւ զփառաւորեալ, զմիւսանգամ գալուստն խոստովանիմք եւ օրհնեմք:

 

 

Եւ զՔոյս ի Քոյոցս Քեզ մատուցանեմք, ըստ ամենայնի եւ յաղագս ամենեցուն:

 

 

Յամենայնի օրհնեալ ես, Տէր. օրհնեմք զՔեզ, գովեմք զՔեզ. գոհանամք զՔէն, աղաչեմք զՔեզ, Տէր Աստուած մեր:

 

 

 

ԶՔեզ արդարեւ, Տէր Աստուած մեր, գովեմք եւ զՔէն գոհանամք հանապազ: Որ զանց արարեր զմերով անարժանութեամբս, այսպիսի ահաւոր եւ անպատում խորհրդոյ կարգեցեր սպասաւորս: Ոչ յաղագս մերոց ինչ բարեգործութեանց՝ յորոց յոյժ թափուր եմք եւ միշտ ունայն գտանիմք հանապազ: Այլ ի Քո բազմազեղ ներողութիւնդ ցանկ ապաւինեալ՝ համարձակիմք մերձենալ ի սպասաւորութիւն Մարմնոյ եւ Արեան Միածնի Քո՝ Տեառնդ մերոյ եւ Փրկչիդ Յիսուսի Քրիստոսի, որում վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:

 

 

Խաղաղութիւն ամենեցուն:

 

 

Եւ ընդ հոգւոյդ քում:

 

 

Աստուծոյ երկրպագեսցուք:

 

 

Առաջի Քո, Տէր:

 

 

 

Երկիր պագանեմք եւ աղաչեմք, եւ խնդրեմք ի Քէն, բարերար Աստուած, առաքեա՛ ի մեզ եւ յառաջի եդեալ յընծայս յայս՝ զմշտնջենաւորակից Քո եւ զէակից Սուրբ Հոգիդ.

 

 

Որով զհացս օրհնեալ՝ Մարմին ճշմարտապէս արասցես Տեառն մերոյ եւ Փրկչին Յիսուսի Քրիստոսի.

Եւ զբաժակս օրհնեալ՝ Արիւն ստուգապէս արասցես Տեառն մերոյ եւ Փրկչին Յիսուսի Քրիստոսի.

Որով զհացս եւ զգինիս օրհնեալ՝ Մարմին եւ Արիւն ճշմարտապէս արասցես Տեառն մերոյ եւ Փրկչին Յիսուսի Քրիստոսի՝ փոխարկելով Հոգւովդ Քով Սրբով:

 

 

Որպէս զի եղիցի սա ամենեցուն մեզ մերձեցելոցս՝ յանդատապարտութիւն, ի քաւութիւն եւ ի թողութիւն մեղաց:

 

 

Ամէն: