Գ. – Դրոշմ
- 01
- 02
- 03
-
04
-
-
05
-
-
06
-
435. – Ի՞նչ է Դրոշմը:
– Դրոշմը Ողջերի խորհուրդ է, որի նպատակն է մկրտվողին քրիստոնեական կատարելության հասցնել։ Աստված Դրոշմով լրացնում է մեր մեջ այն, ինչը որ Մկրտությամբ սկսեց անել։
436. – Դրոշմի խորհուրդն ա՛յլ անուն ունի՞:
– Քանի որ մկրտվածի հոգում դրոշմում է Սուրբ Հոգու կնիքը, կոչվում է նաև Կնունք:
437. – Դրոշմն ի՞նչ շնորհներ է տալիս:
– Դրոշմը մասնավորապես տալիս է Սուրբ Հոգու զորությունը՝ ճշմարիտ Հավատքի մեջ է՛լ ավելի հաստատվելու, այն աներկյուղ դավանելու և քրիստոնեական առաքինություններով աճելու համար։ Սրանից բացի, անջնջելի կերպով զինվորի կնիք է դրոշմում հոգու վրա, ուստի այս խորհուրդն էլ է մեկ անգամ ընդունվում։
438. – Դրոշմվողն իբրև Քրիստոսի զինվոր ի՞նչ պարտավորություններ է ստանձնում:
– Դրոշմվողը, Քրիստոսի զինվոր դառնալով. 1) պետք է պայքարի իր հոգու թշնամիների՝ մեղքի ու փորձությունների դեմ. 2) քաջությամբ ու սիրով կրի Աստծո թույլտվությամբ և մարդկանց չարությունից առաջ եկած նեղությունները. 3) առաքինությամբ և բարի գործերով հաճո լինի Աստծուն, Ով իր Թագավորն ու Հայրն է։
439. – Դրոշմի խորհուրդը կարևո՞ր է:
– Փրկվելու համար Դրոշմի խորհուրդն անհրաժեշտ չէ, բայց մեծապես օգտակար է քրիստոնեական կատարելության համար, ուստի այն արհամարհելն ու անտարբերությամբ չընդունելը մեղք է։
440. – Ո՞րն է Դրոշմի նյութն ու ձևը:
– Դրոշմի նյութը Եպիսկոպոսի կողմից օրհնված ձեթն է՝ Մյուռոնը, որով օծվում են դրոշմվողի ճակատն ու զգայարանները: Իսկ ձևը՝ ճակատն օծելու ժամանակ ասված խոսքերն են։
441. – Ո՞վ է Դրոշմի պաշտոնյան:
– Արևմտյան ավանդության եկեղեցիներում Դրոշմի սովորական պաշտոնյան Եպիսկոպոսն է, ով սակայն կարող է որոշ դեպքերում քահանային փոխանցել իր այդ իշխանությունը: Իսկ արևելյան ավանդության եկեղեցիներում, ներառյալ՝ Հայ Եկեղեցում, հնագույն սովորության համաձայն՝ Դրոշմի խորհուրդը մատակարարվում է Մկրտությունից անմիջապես հետո, և մկրտող քահանան է հանդիսանում Դրոշմի սովորական պաշտոնյան։
ԳՐԱՎՈՐ ՊԱՐՏԱԿԱՆՈՒԹՅՈՒՆ