Գլուխ Ա. - Հոդված 1. - Հատված Դ. / բ) Արարչագործությունը Ամենասուրբ Երրորդության գործն է
-
01
-
-
02
-
-
03
-
-
04
-
-
05
-
290. «Սկզբում Աստված ստեղծեց երկինքն ու երկիրը» (Ծնդ 1, 1)։ Աստվածաշնչի այս առաջին խոսքերը պարունակում են երեք հաստատումներ. 1) հավիտենականն Աստված սկիզբ է տվել այն ամեն ինչին, որ գոյություն ունի Իրենից դուրս. 2) միայն Նա է Արարիչ («արարել» բայը – եբրայեցերեն՝ « בָּרָ֣א » - «բառա» – միշտ և միայն Աստծուն ունի որպես ենթակա). 3) գոյություն ունեցող ամեն ինչի ամբողջությունը, որ արտահայտվում է «երկինք և երկիր» բանաձևմամբ, կախում ունի Նրանից, Ով գոյություն է հաղորդում իրեն։
291. «Սկզբում էր Բանը[1]. [...] և Բանն Աստված էր։ [...] Ամեն բան Իր միջոցով եղավ, և առանց Իրեն չեղավ ոչինչ, որ եղել է» (Հվհ 1, 1-3)։ Նոր Կտակարանը հայտնում է, որ Աստված ամեն բան ստեղծել է հավիտենական Բանի՝ Իր սիրելի Որդու միջոցով։ «Նրա միջոցով են ստեղծվել բոլոր բաները՝ երկնայիններն ու երկրայինները [...] ։ Բոլոր բաները ստեղծվել են Նրա միջոցով և Նրա համար։ Նա բոլոր բաներից առաջ է և բոլորը Նրա մեջ է, որ գոյություն ունեն» (Կղս 1, 16-17)։ Եկեղեցու հավատքը հաստատում է նաև Սուրբ Հոգու արարիչ գործողությունը. Նա Նա է, Ով «տալիս է կյանքը»[2], «Արարիչ Հոգին» է (ինչպես որ երգում ենք «Ե՜կ, Սուրբ Հոգի» օրհներգի մեջ), «բոլոր բարիքների ակունքը»[3]։
292. Քողարկված կերպով նշմարվելով Հին Կտակարանում[4], Նոր Ուխտի մեջ հայտնվելով, Որդու և Սուրբ Հոգու արարիչ գործողությունը, որն անբաժանելիորեն մեկ է Հոր գործողության հետ, հստակ կերպով հաստատված է Եկեղեցու հավատքի կանոնի կողմից. «Գոյություն ունի միայն մեկ Աստված [...] . Նա Հայրն է, Աստված է, Արարիչը, Հեղինակը, Կարգավորողը։ Նա ամեն ինչ արել է ինքնուրույն, այսինքն՝ Իր Բանի և Իր Իմաստության միջոցով»[5]. «Որդին և Սուրբ Հոգին» կարծես «Իր ձեռքերը» լինեն[6]։ Արարչագործությունը Ամենասուրբ Երրորդության միասնական գործն է։
