Գլուխ Բ. - Հոդված 1. ԱՍՏԾՈ ՀԱՅՏՆՈՒԹՅՈՒՆԸ / ա) Աստված հայտնում է Իր «բարյացակամության ծրագիրը»
-
01
-
-
02
-
-
03
-
-
04
-
-
05
-
51. «Բարեհաճո եղավ Աստծուն ըստ Իր բարության և իմաստության՝ հայտնել Ինքն Իրեն և ճանաչել տալ Իր կամքի խորհուրդը, որի միջոցով մարդիկ, շնորհիվ Քրիստոսի՝ մարդացած Բանի[1], Սուրբ Հոգու մեջ մուտք ստացան Հոր մոտ և այդպիսով մասնակից դարձվեցին աստվածային բնությանը»[2]:
52. Աստված, որ «բնակվում է անմատչելի լույսի մեջ» (1Տմ 6, 16), կամենում է հաղորդել Իր աստվածային կյանքը Իր կողմից ազատորեն ստեղծված մարդկանց՝ նրանց Իր միակ Որդու մեջ որդեգիրներ դարձնելու նպատակով[3]: Հայտնելով Իրեն՝ Աստված կամենում է ունակ դարձնել մարդկանց պատասխանելու Իրեն, ճանաչելու Իրեն և սիրելու Իրեն շա՜տ ու շա՜տ ավելի, քան կկարողանային լոկ իրենց ուժերով:
53. Հայտնության աստվածային ծրագիրն իրագործվում է միաժամանակ «իրադարձություններով ու խոսքերով», որոնք «սերտորեն շաղկապված են միմյանց»[4] և լուսաբանում են մեկը մյուսին փոխադարձաբար: Այն գործի է դնում մի յուրահատուկ «աստվածային մանկավարժություն». Աստված հայտնվում է մարդուն աստիճանաբար, պատրաստում է նրան հանգրվան առ հանգրվան՝ ընդունելու գերբնական հայտնությունը, որն Ինքը կատարում է Իր վերաբերյալ, և որն իր գագաթնակետին է հասնում մարդացած Բանի՝ Հիսուս Քրիստոսի Անձի և առաքելության մեջ:
Սբ. Իրենեուս Լուգդունացին բազմաթիվ անգամներ խոսում է այս աստվածային մանկավարժության մասին՝ Աստծո և մարդու միջև փոխադարձ ընտանության պատկերի ներքո. «Աստծո Բանը [...] Իր բնակությունը հաստատեց մարդկանց մեջ և դարձավ մարդու Որդի՝ վարժեցնելու համար մարդուն հասկանալ Աստծուն, և վարժեցնելու համար Աստծուն՝ մարդու մեջ հաստատելու Իր օթևանը, Հոր կամքի համաձայն»[5]:
