Ողջույն
Իգնատիոսը, որին անվանում են նաև Աստվածակիր, Հիսուս Քրիստոսի՝ Հոր Որդու Անվամբ ողջունում է եկեղեցուն, որը ողորմություն ստացավ բարձրյալ Հոր և Հիսուս Քրիստոսի՝ Իր Միածին Որդու սքանչելի զորությամբ.
– եկեղեցուն, որ սիրվել և լուսավորվել է կամքով Նրա, ով կամեցել է այն ամենն, ինչ գոյություն ունի, Հիսուս Քրիստոսի՝ մեր Աստծո հավատքի և սիրո համաձայն.
– եկեղեցուն, որ գահերեց է Հռոմեացիների երկրում.
– եկեղեցուն, որ արժանի է Աստծուն, իրավամբ գովաբանված է, արժանավորապես՝ երանելի կոչված, արժանի՝ փառաբանվելու և հասնելու իր բոլոր նպատակների կատարմանը. արժանի՝ մաքրության.
– եկեղեցուն, որ նախագահում է սիրույն.
– եկեղեցուն, որ հիմնված է Քրիստոսի օրենքի վրա և զարդարված է Հոր Անունով:
Նրա հավատացյալներին, որոնք մարմնապես և հոգեպես միացած են Տիրոջ պատվիրաններից յուրաքանչյուրին, Աստծո շնորհով լի են առանց բաժանումների և մաքուր են օտար որևէ բծից, մաղթում եմ մեծագույն և ջինջ բերկրանք Հիսուս Քրիստոսի՝ մեր Աստծո մեջ:
