ՀԱՎԵԼՎԱԾ Զ. – ՏԱՂ ՇՆՈՐՀԱԿԱԼՈՒԹՅԱՆ ԱՌ ԱՍՏՎԱԾ

Ա Ա Ա

Ըզքեզ Աստուած գովաբանեմք,

Եւ ըզքեզ Տէր խոստովանեմք.

Ըզքեզ Հայր մեր անժամանակ

Պաշտէ երկիր առ հասարակ:

Քեզ հրեշտակաց զօրք ամենայն,

Երկինք եւ պետք միանգամայն,

Հոյլք քրովբէից եւ սրովբէից

Անլըռելի լեալ ձայնակից:

Եղանակեն զերգս օրհնութեանց,

Սո՜ւրբ, սո՜ւրբ, սո՜ւրբ ես, Տէր զօրութեանց.

Լի են երկինք 'ւ երկիր համայն

Փառօք քո մեծ վայելչութեան:

Զքեզ պանծալի դասըք սըրբոց,

Երկոտասան առաքելոց,

Պարըք գովեալ մարգարէից,

Տնօրէնութեանդ նախատեսից,

Գունդք լուսազգեաց մարտիրոսաց,

Գովաբանեն զՏէրդ փառաց.

Ըզքեզ մինչեւ ի ծագս երկրի,

Դաւանէ Սուրբ Եկեղեցի:

ԸզՀայրըդ մեծ անբաւելի,

Ըզմիածինըդ քո զՈրդի,

Զմխիթարիչ քո Սուրբ Հոգի

Փառավորէ անլըռելի:

Քրիստոս փառաց Դու թագաւոր,

Անժամանակ ծընունդըդ Հօր,

Ի փըրկութիւն մարդկան ազգի,

Խոնարհեցար յարգանդ կուսի:

Դու կոխեցեր զմահու խայթոց.

Զերկինս բացեր յուսացելոց.

Եւ համբարձեալ յաջմէ նըստար,

Փառօք ընդ Հօր քո հաւասար:

Գալ միւսանգամ ես հանդերձեալ,

Ի դատել զազգս հողածնեալ.

Եւ արդ խնդրեմք օգնել մեզ Տէր,

Զոր պատուական արեամբ գնեցեր:

Ընդ սուրբըս քո դասաւորեա՛,

Ի փառս անանց եւ յարակայ.

Ըզժողովուրդըս քո փըրկեա՛,

Զժառանգութիւնս քո Տէր օրհնեա՛:

Հովուեա՛ զնոսա եւ խնամարկեա՛,

Յայսըմհետէ եւ առ յապա.

Զօր հանապազ զքեզ օրհնեսցուք,

Եւ զանուն սուրբ քո գովեսցուք:

Շնորհեա մեզ Տէր զաւուրս կենաց

Անցուցանել առանց մեղաց.

Ողորմեա՜ց մեզ, Տէր, ողորմեա՜ց,

Եւ գըթութեամբ ի մեզ հայեաց:

Ողորմութիւնդ լիցի ի մեզ,

Որպես եւ մեք յուսամք ի քեզ.

Ի քեզ անձինք մեր յուսացան,

Մի՛ ամաչեսցեն ի յավիտեան:

Ամէն^[1]:

^[1] Գիրք Արարողութեանց Վանական Հանդիսից, Սբ. Ղազար, Վենետիկ 1932, էջ 37:

Կայքին օգնելու համար կարող եք դիտել / ունկնդրել այս տեսանյութը։

Շնորհակալություն կանխավ։