Պաշտելի Արծվին վստահությամբ սպասող տկար թռչնակի նման
-
01
-
-
02
-
- 1886 թվականի Սուրբ Ծննդյան շնորհը
- Հոգիներ փրկելու եռանդն ու առաջին արդյունքը
- Հրապուրվելը պատմությամբ ու գիտություններով – Բարեպաշտ ընթերցումները
- Մտերմությունը Սելինի հետ – 15 տարեկանում Կարմեղոս մտնելու փափագը
- Հոր համաձայնությունը
- Խոչընդոտներ Գերեն մորեղբոր և վանքի խոստովանահոր կողմից
- Ապարդյուն փորձը Բեյեոյի Եպիսկոպոսի մոտ
-
- Ուխտագնացությունը Հռոմ՝ հոր և Սելինի հետ – Փարիզի «Հաղթանակների Տիրամոր» եկեղեցին
- Շվեյցարիան
- Միլանում, Վենետիկում, Պադովայում, Բոլոնիայում
- Լորեթոյի Սուրբ Տան մոտ
- Ժամանումը Հռոմ
- Այցելությունը Հռոմի Սրբազան Քահանայապետ Լևոն Տասներեքերորդ Պապին
- Դառնություն և վստահություն
- Վերադարձի ճանապարհին. Պոմպեյ, Նապոլի, Ասսիզի, Ջենովա
- Նամակներ Բեյեոյի Եպիսկոպոսին – Սպասման երեք ամիսները
-
03
-
- Մի մխիթարիչ երազ
- Վիթխարի և ընդդիմադիր փափագներ
- Եկեղեցում իր անձնական կոչման բացահայտումը. այդ կոչումը Սերն է – Այն իր մեջ բովանդակում է մյուս բոլոր կոչումները և հավերժական է
- Կամովին նվիրումը Սիրույն
- Ծաղիկներ սփռել երգելով
- Պաշտելի Արծվին վստահությամբ սպասող տկար թռչնակի նման
- Աղաչանք «փոքրիկ» հոգիների համար
-
04
-
- Ձոն
- Մայր Մարիամ Գոնձակայից ստացած խստակրոն դաստիարակությունը
- Աստվածային վերելակը
- Առաքելությունը նորընծաների մոտ
- Փեսայի գալստյան ավետումը
- Հավատքի փորձությունը
- Անտարբերությունը կարճ կամ երկար, սիրելի քույրերից հեռու կամ նրանց մոտ անցկացված կյանքի նկատմամբ
- Ապահովություն և խաղաղություն հնազանդության մեջ
- Թե ինչի՛ մեջ է կայանում իրական կատարյալ Սերը
- Հաղթական մարտավարության օրինակներ
- Հարկավոր է գործերով փաստել Սերը
-
- Հոգու աղքատությունը
- Սերը զոհողություններով է սնվում
- Հոգիներ առաջնորդելու դժվարին գործը
- Աղոթքի ուժը
- Նվաստացման կենսատու հացը
- Չդատել
- Քույր Սեն Պիեռը
- Երկու փոքրիկ պայքար
- Երկու քահանա և առաքյալ «եղբայրներ»ը
- «Ձգի՜ր ինձ, ընթանա՜նք ... » – Վերջին երեկոյի աղոթքը
- Բացատրություններ «Ձգի՜ր ինձ» և «Սիրեցյալի անուշահոտ բուրմունք» խոսքերի վերաբերյալ
-
-
05
-
- 06
-
07
-
260. Բայց մի թերի հոգի, ինչպիսին որ ես եմ, ինչպե՞ս կարող է կամենալ՝ տիրանալ Սիրո լիությանը: Հիսո՜ւս, իմ առաջին, իմ միակ մտերիմ Ընկեր, Դու, որ իմ միակ Սերն ես, ասա՜ ինձ, այս ի՞նչ խորհուրդ է: Ինչո՞ւ այս վիթխարի ներշնչումները չես վերապահում մեծ հոգիներին, արծիվներին, որոնք սավառնում են անհասանելի բարձունքներում: Ես ճանաչում եմ ինձ որպես մի տկար թռչնակ, մի քանի թեթև փետուրներով լոկ ծածկված: Արծիվ չեմ, արծվային միայն աչքեր ու սիրտ ունեմ, որովհետև չնայած բացարձակ փոքրկությանս, համարձակվում եմ աչքերս հառել դեպի Քեզ, դեպի Աստվածային Արևդ[1], դեպի Սիրո Արևդ, և սիրտս նույնպես զգում է արծվային բոլոր ձգտումները: Թռչնակը կուզենար ճախրել դեպի այդ Արևը, որ հմայք է պատճառում իր զմայլված հայացքին, կուզենար հետևել արծիվներին՝ իր եղբայրներին, որոնք սավառնում են ու բարձրանում դեպի Ամենասուրբ Երրորդության աստվածային բնակատեղին: Բայց ավա՜ղ: Այն, ինչ կարող է անել, իր փոքրիկ թևերի թափահարումն է միայն, իսկ թռչել ... դա իր փոքրիկ կարողությունների սահմաններում չէ: Ի՞նչ է լինելու նրա վերջը: Մի՞թե մահանալու է վշտահար, տեսնելով իրեն այսքա՜ն անուժ: Ա՜հ, ո՛չ: Թռչնակը սրա պատճառով չի վշտանալու: Աստծո ձեռքերի մեջ համարձակ ինքնահանձնումով, նա շարունակելու է հայել իր Աստվածային Արևին: Ոչինչ նրան չի վախեցնում, ո՛չ քամին, ո՛չ անձրևը, և եթե նույնիսկ մութ ամպերը ծածկեն Սիրո Աստղը, թռչնակը չի փոխի իր տեղը, որովհետև գիտի, որ ամպերից այն կողմ Արևը փայլում է միշտ անդադար, որ Նրա փայլը չի մթագնում ոչ մի վայրկյան:
261. Ճիշտ է, լինում են պահեր, որ նրա սիրտը հարձակման է ենթարկվում փոթորիկի կողմից, թվում է նրան, թե գոյություն ունեն միայն ամպերը, որ շրջապատում են իրեն: Բայց ճիշտ այդ պահերն են խեղճ ու տկար թռչնակի կատարյալ ուրախության րոպեները: Նրա համար ինչպիսի՜ երջանկություն է շարունակելն այնտեղ մնալը և իր հայացքն հառելը այն անտեսանելի լույսին, որ թաքնվում է իր հավատքի տեսադաշտից: Հիսո՜ւս, այժմ հասկանում եմ թռչնակի հանդեպ տածած սերդ, որովհետև չի հեռանում Քեզնից: Բայց ես գիտեմ, և Դու նույնպես իմանում ես դա, որ հաճախ այս փոքրագույն ու անկատար արարածը, իր տեղում մնալով հանդերձ (այսինքն՝ Արևի ճառագայթների ներքո), մի քիչ ցրվում է իր միակ զբաղմունքից, հատիկներ է կտցում այստեղ ու այնտեղ, վազում մի փոքրիկ որդի ետևից: Իսկ հետո, ջրափոսի հանդիպելով, թրջում է հազիվ աճած փետուրները, տեսնում է իր աչքերը շոյող մի ծաղիկ և իր ամբողջ փոքրիկ հոգին զբաղվում է այդ ծաղիկով: Վերջապես, չկարողանալով սավառնել ինչպես արծիվները, խեղճ թռչնակը դարձյալ զբաղվում է երկրային փուչ փոքրիկություններով:
Եվ սակայն, այս բոլոր չարաճճիություններից հետո, փոխանակ գնալու մի անկյունում թաքնվելու՝ իր թշվառությունը ողբալու և զղջումից մեռնելու, թռչնակը շրջվում է դեպի սիրասուն Արևը, Նրա բարերար ճառագայթներին է ներկայացնում իր թրջված փետուրները, ճռվողում է ծիծեռնակի նման[2], և քաղցրաձայն վստահությամբ պատմում է իր անհավատարմության բոլոր մանրամասները, մտածելով իր հանդուգն ինքնահանձնումով ձեռք բերել ավելի մեծ տիրապետություն, ավելի մեծ լիությամբ իր վրա հրավիրել սերը Նրա, ով չեկավ կանչելու արդարներին, այլ՝ մեղավորներին[3]:
262. Եթե պաշտելի Աստղը խուլ է մնում Իր փոքրիկ արարածի ողբաձայն դայլայլներին ի լուր, եթե մնում է քողարկված, շա՜տ լա՛վ, այնժամ փոքրիկ արարածը մնում է թրջված, ընդունում է ցրտից ընդարմանալու դատապարտվածի իր հանգամանքը, և նորից ուրախանում է այդ տառապանքի համար, որին սակայն իսկապես արժանացել է:
Հիսո՜ւս, որքա՜ն երջանիկ է թռչնակդ իր տկար ու փոքրիկ լինելու համար: Ա՜հ, ի՞նչ էր լինելու նրա վիճակը, եթե մեծ լիներ: Երբեք չէր ունենա վեհությանդ ներկայանալու, ներկայությանդ մրափելու համարձակությունը: Այո՛, դա էլ թռչնակի տկարություններից մեկն է. երբ կամենում է հայացքը սևեռել Աստվածային Արևին, ու մթին ամպերը նրան չեն տալիս գեթ մեկ ճառագայթ տեսնելու հնարավորությունը, չնայած իր բարի կամքին, նրա փոքրիկ աչուկները փակվում են, գլխիկը թաքնվում է թևի տակ և փոքրիկ խեղճ արարածը քուն է մտնում, կարծելով, թե շարունակում է սևեռուն հայացքով դիտել իր սիրասուն Աստղին: Իսկ երբ արթնանում է, չի տրտմում, նրա սրտիկը մնում է խաղաղ, վերսկսում է իր սիրո գործը, կանչում է Հրեշտակներին ու Սրբերին, որոնք արծիվների նման կարողանում են բարձրանալ դեպի սպառիչ Կրակարանը, առարկան իր տենչանքի, և արծիվները, խղճալով, պաշտպանում են իրենց քրոջը և փախուստի են մատնում բոլոր գիշատիչներին, որոնք ցանկանում են հոշոտել նրան:
263. Գիշատիչնե՜րը, որ պատկերն են դևերի, փոքրիկ թռչնակը չի վախենում նրանցից, սահմանված չէ նրանց զոհը դառնալու: Նա դառնալու է զոհը Արծվի, որին մտասևեռ դիտում է Սիրո Արևի կենտրոնում: Ո՜վ Աստվածային Բան[4], Դու ես այդ պաշտելի Արծիվը, որին ես սիրում եմ: Դու ձգում ես ինձ, Դու ես, որ նետվելով այս աքսորի երկիրը՝ կամեցար տառապել ու մեռնել, ձգելու համար հոգիներին դեպի Ամենասուրբ Երրորդության հավիտենական բովը: Դու ես, որ համբառնալով հանդերձ դեպի անհասանելի Լույսը, որ այսուհետև լինելու է բնակարանդ, Դու ես, որ դարձյալ մնում ես արցունքների այս հովտում, սպիտակ Նշխարի երևույթների ներքո թաքնված: Հավերժական Արծի՜վ, Դու կամենում ես սնել ինձ աստվածային էությամբդ, ինձ՝ խեղճ արարածիս, որ ոչնչության կվերածվեի կրկին, եթե աստվածային հայացքդ չշնորհեր ինձ կյանք վայրկյան առ վայրկյան: Ա՜հ, Հիսո՜ւս, թող որ ասեմ, երախտագիտությանս հորձանքից տարված, թող որ ասեմ, որ սերդ հասնում է խենթության ... : Ինչպե՞ս ես ուզում, որ ի տես այս խենթության, սիրտս չխոյանա դեպի Քեզ: Ինչպե՞ս կարող է սահմանների մեջ փակվել վստահությունս: Քո համար, գիտեմ դա, Սրբերը նույնպես կատարել են խենթություններ, կատարել են մեծամեծ գործեր, որովհետև արծիվներ էին:
264. Հիսո՜ւս, չափազանց փոքր եմ մեծագործություններ կատարելու համար, և իմ խենթությունը հույսս է, որ Սերդ կընդունի ինձ որպես զոհ: Իմ խենթությունը կայանում է արծիվներին՝ իմ եղբայրներին աղաչելու մեջ, որպեսզի ստանան իմ համար շնորհը՝ սլանալու դեպի Սիրո Արևը, նույն Ինքն աստվածային Արծվի թևերով[5]:
Հետևաբար, որքան ժամանակ Դու դա կուզենաս, ո՜վ Սիրելի իմ, Քո փոքրիկ թռչնակը կմնա առանց ուժի ու թևերի. աչքերը հառած կպահի դեպի Քեզ: Նա կամենում է հմայվել Քո աստվածային հայացքով, կամենում է զոհ դառնալ Սիրույդ: Մի օր, համարձակվում եմ հուսալ, ո՜վ պաշտելի Արծիվ, կգաս փնտրելու Քո փոքրիկ թռչնակին, և կրկին բարձրանալով նրա հետ դեպի հնոցը Սիրո, կընկղմես նրան Սիրո բոցավառ անդունդների մեջ, այն Սիրո, որին նա նվիրվել է որպես զոհ:
[1] Սուրբ Հայրերի գրություններում Հիսուսն հաճախ է այլաբանորեն ներկայացվում արևի կերպարով: Պատճառն այն է, որ ինչպես նյութական խավարն է մի քայլ անգամ կատարելու լիակատար անկարողությանը մատնում մարդուն, այնպես էլ հոգևոր խավարն է կուրացնում նրան ու զրկում միակ ճշմարիտ Աստծո՝ Ամենասուրբ Երրորդության գիտությունից: Եվ ինչպես արևն է լուսավորում նյութական խավարը (արևը, որն Աստծո ստեղծած սոսկ նյութական արարածներից մեկն է), այնպես էլ Հիսուսը՝ Աստծո Մարդացած Որդին, հայտնելով մեզ ճշմարտությունը՝ լուսավորեց հեթանոսական խավարում խարխափող մարդկությունը:
[2] Ես 38, 14
[3] Մտթ 9, 13
[4] Գրաբարյան «բան» եզրը (հունարեն՝ լոգոս), որ սովորաբար թարգմանվում է որպես «խոսք» (բայց կարող է նշանակել նաև «միտք», «իմաստ»), բան-ականության, բան-ավորության արմատն է, որով մատնանշվում է գոյություն ունեցող ամեն ինչի գոյութենական իմաստը և հակառակվում է անիմաստությանը, ան-բան-ությանը, ան-բան-ականությանը։ Հատկանշական է, որ հայերենում գոյություն ունեցող ամեն ինչ մատնացույց է արվում որպես «մի բան», այսինքն՝ իր մեջ բանականություն պարունակող միավոր։ Գրվելով մեծատառով՝ «Բան» («Լոգոս»), հասկանում ենք Աստվածային Միտքը, Իմաստությունը, Խոսքը (Ամենասուրբ Երրորդության երկրորդ Անձը՝ Որդին), որը ստեղծված որևէ բանականության արմատն ու աղբյուրն է, որից կտրվելու, հեռանալու դեպքում ամեն բան դառնում է անբան, իմաստազուրկ, հակասական, անտրամա-բան-ական:
[5] Հմմտ. 2Օր 32, 11